Deuteronomio 15
15
Ja sjab'ilil elel yib' k'ab'ali
1-5Cho yala ja Moisesi:
—B'a juktike jab'il oj ja ch'ay ex yi ja ma ay sjel a wujilexi. Ja iti, ja ta yuj k'a ay ma aya wuj sjeli, mi oj b'ob' a tajb'a ja jelal jawi. Ja Dyosi yalunej ja jab'il jawi oj ch'ak ch'ayxuk yi spetsanil ja ma ay sjeli. Ta wan k'axa k'u'anex ja yab'al jumasa ja Dyosi, oj ya tojb'uk lek ja lu'um it ya'oj a wi'exi, spetsanil ja israelenio jumasa mixa ma ajula sb'aj oj ajyuk. Ja ma majan ay b'a wa lu'umexi, oj b'ob' a tajb'ayex, jaxa wa mojex israelenio'ili, mi jas oj b'ob' a wal'ex yabye.
—Yajni ti'xa ayex b'a lu'um oj ya'wi'ex ja Dyosi, 6yuj k'a jel lek yilawa ja Dyos ja jastal ni yaloji, ojni a ta' b'a oj ja wa'yi majan ja tuktukil kristyano jumasa'a, ja we'nlexi mini jas oj ja maj'exa; sb'ej we'n oj ja wal'ex yab' jas oj sk'u'luke'i ja tuktukil kristyano jumasa. —Yuj ja jach'ni yalunej ja Dyosi.
7-9—Ja janek' ayexi, ay k'a ma jel ajula sb'aj xa wilawex, mok a k'u'lukex yi b'a mi sb'ejuk mok a wil k'ujolukex; a'a b'ajik lek sok ja ye'nle'i, awik yi'e majan ja jas wa sk'anawe'i. Mok a wal'ex mi oj b'ob' koltananik. Mok jas ek' a k'ujolex yuj ja wa'n mojxel ja jab'il ay ma oj el b'a yib k'ab'ali, b'a ti oj ja wal'ex mixa sb'ejuk oj a'xuk majan ja tak'ini. Waj k'a sle'e skoltajele sok ja Dyos yuj ja mi b'i la koltaniyexi, ojni a ta'a mulex sok ja Dyosi. 10Ja slekili ja ni oj ja koltayex ja ma ajula sb'aji, ja'yuj sok slekil a k'ujolex k'u'lanik. Ta wan k'axa k'u'lanex jel lek oj ek' a wujilex, ja Dyosi, jel lek oj yil spetsanil ja jas oj ja k'u'lukexi. 11Ja b'a lu'um iti, ojni ajyuk kristyano jumasa ma jel ajula sb'aja. Ja'yuj wax kala wabyex ja we'nlexi a'a b'ajik lek sok ja ma jel ajula sb'aji, cho jach'ni ja ma mi jas yi'oj ti' aye' amokexi.
Ja jastik oj sk'u'l ja ma'tik yib' k'ab'al ayi
12-14—Ja janek' israelenio'exi, a'nima winik ma ixuk ta wan k'a schono sb'aj a'telil, mi oj b'ob' jelxuk oj a'tijuke ja wake jab'ili. Yajnix k'ot ja sjukil jab'ili ojni eluk b'a yib' k'ab'ala. Jaxa ma ya'tijum ajyi'i, ojni sk'epyi ja jastik wax a'jiyi yuj ja Dyos ja ye'na. B'a mi jach' telan sk'ab' oj ya wajuk, oj yi' swakax, sat trigo, ya'al, ts'usub'. 15Mok ch'ay a k'ujolex, jach ni ja we'nlexi, choj ti ajyiyex b'a yib k'ab'al ajyi b'a Egipto, jani ja Dyos ya elanik yib' k'ab'ali, ja'yuj jach' wax ka' wi'ex ja ab'al iti.
16-17—Ta yuj k'a wa xyila jel wax yajtaji ja ma tey b'a yib k'ab'al sok ja a'tijum ixuki sok jel wa stalnan sya'ujlal ja yajwal sok ja yuntikil jumasa ye'n k'a mi sk'ana oj sjip kani, jaxa yajwali oj sjotyi ja schikini. B'a ti oj chiknajuk yujni sb'aj xa ye'n spetsanil k'ak'u.
18—Mok tajkanik ja yajni oj ya'wex kan ja wa wa'tijumexi. B'a yojol wake jab'il a'tiji ye a mokex sok kechan snalan a tupunejex ja janek' wax tupxi jun a'tijumi. Ch'akan tupuwik ja janek' to wa sk'ana b'a jach' lek oj yil ja Dyos sok spetsanil ja jas ojto a k'u'lukexi.
Ja jastal oj ja wa'wex ja sb'ajtanil yal chante'i
19—Spetsanil ja yal chante jumasa b'a yal swaw oj manxuki, a'nima chej ma wakax jani sb'a ja Dyosi. Mi oj b'ob' a wa'wex a'tijuk ja sb'ajtanil yal wakax oj manxuki, sok mi oj b'ob' a wa'wex elyi ja sk'u' ja sb'ajtanil yal chej oj manxuki, ja yal chante jumasa jawi jani sb'a ja Dyosi.
20—B'a jujune' jab'il oj b'ob' a yam'ex ja yal chante jumasa jaw b'a oj ja wabyex b'a jun niwan k'in mi tukuk, ja k'in jawi ti oj ja k'u'lukex b'a snajtsil tsomjel sok ti oj wa'anik tiw sok ja wa wuntikilexi. 21Mok a wa'wex yi ja Dyos ja yal chante jumasa jaw ta yuj k'a waxa wilawex mix b'ob' b'ejyuki, ma yuj mix yila k'inali. 22Ja yal chante jastal jawi mi t'ilanuk oj ja wi'ex och b'as snajtsil tsomjel, oj b'ob' a k'ux'ex b'a wa najex. A'nima mi a sak'unejuk a b'ajex mi chapan ayukex b'a oj ja wabyex, ojni b'ob' a wabyex spetsanil ja yal chante jumasa ja wa. Jach' oj cho a k'u'lukex sok jastal it ja k'ujlal chej jumasa. 23Ja b'a mi oj b'ob' a wabyexi ja' schik'el ja chante jumasa jawi; ch'akan pek'awik el b'a lu'um.
Currently Selected:
Deuteronomio 15: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
