Deuteronomio 12

Ja ab'al jumasa a'jiyi ja schonab'il ja Dyosi

1Jaxa Moisesi, ti yala yab' ja kristyano jumasa:

—Yajni ti'xa kulanex b'a yojol ja lu'um it sk'apa a wi'ex ja Dyosi, ja' ab'al jumasa it, ja jel t'ilan oj ja k'u'ukex spetsanil k'ak'u:

2-3—Ja lu'um b'a oj ja wi'ex kani, jel t'ilan oj ch'ak a jom'ex spetsanil ja b'a wa stoyowe ajyi ja sk'u'lub'al dyose ja kristyano jumasa. Yuj ja it jumasa chikan b'atik aya, ay ja b'a yax k'ul jumasa, b'a b'ujan yaman, b'a yib' te' jumasa. Ch'akan jomowik spetsanil, xe'nti yaman a'wikan ja ton jumasa b'a tojb'el sok ja dyos yujile'i, ch'akan tsikawik ja te' jumasa wa sk'u'ane'i. —Mok jas wa'wex kan b'a ti'to oj sna'e'a. 4Yajni oj ja toy'ex ja Dyosi, mok a tsajlayex ja jastal ja kristyano jumasa jawi.

5-6—Ja Dyosi, ye'n oj stsa' jun lu'um b'a ti oj ajyuk amokexa, ja b'a lu'um oj stsa'i, ti oj waj ja toy'ex tiwi, ti oj a wi'ex och tiw ja majtanal it wax tsikxi b'a stoyjeli. B'a spetsanil ja janek' waxa ta'awexi, ti oj ja wi'ex och tiw ja slajunili, ja wa limosna'ex b'a spetsanil wa k'ujolex oj ja wa'exi, ja sb'ajtanil yal wa chante'exi, yal wakax, ma yal chej, ma chikan ja smajtanil a waloj oj ja wa'ex yi'i.

7-12—Ja b'a lu'um jawi, oj a k'u'lukex jun k'in, yuj ja tsamalil wa k'ujolexi sok ja wa wuntikilexi, sok ja wa wa'tijumex jumasa, jach'ni sok ja k'ole jumasa sb'a Levi it tey a mokexi. Na'awik t'ilan oj ja k'ep ab'ajex soke ja jas oj ka' wi'exi, ja ye'nle'i mini xen lu'um oj yi'e b'a oj sb'ajuke'a.

—Yajni ti'xa ayex b'a lu'um oj ya'wi'ex ja Dyosi, ja tiwi mi oj b'ob' a k'u'lukex ja jastal wa'nex sk'u'lajel ja ya'n, yuj ja lu'um b'a ayex ja ya'n, mi ja'uk ja lu'um b'a oj ya'wi'ex ja Dyos b'a laman oj ajyaniki; b'a oj k'otanik ja b'a lu'um jawi, t'ilan oj ek' a k'utsex ja niwan ja' Jordani. Yajni ch'akta a wa'wex kulan wa jas a b'ajexi, ch'akta a wil k'ujolukex ja m'a wax yil k'ujolanexi, ti'to oj ajyanik lamana.

13-18—Na'awik lek mi chikanxta b'a oj ja tsikex yi ja smajtan ja Dyosi, kechani ti oj b'ob' a tsik ex ja b'a lu'um oj stsa' ja Dyosi. Ti' oj ja k'u'lukex tiw ja jastal kaloj a wabyex oj ja k'u'lukexi, oj ja wa'wex yi ts'akatal ja Dyos yuj ja jel wax ya'wi'ex wa jas a b'ajexi. Ja janek' oj alb'uk ja k'ini, oj b'ob' a wabyex spetsanil ja jas oj ja wi'ex ochi. Spetsanil ja schonab'ili ojni b'ob' wa'uke'a, a'nima was k'anawe ma mi sk'anawe oj sje' sb'aje, ja b'a sti' sat ja Dyosi, ojni b'ob' wajuke ja b'a k'ina. Kechan mi oj b'ob' yabye ja b'ak'et b'a ay schik'eli; a ya'we kan lokan b'a oj ch'ak eluk ja schik'eli.

—Ta ti k'a ayex b'a wa chonab'ilex mi oj b'ob' a wabyex ja majtanal waxa wa'wex yi ja Dyosi, man oj k'otanik ja b'a lu'um oj stsa' ja Dyos b'a oj ajyuk ja snaj b'a tsomjeli. Mok ch'ayuk a k'ujolex spetsanil t'ilan oj ja k'ep a b'ajex soke ja k'ole jumasa sb'a Levi it tey a mokexi. 19Talna lek a b'ajex, ja janek' ay ja wa sak'anilexi, mok waj ja ch'ay a k'ujolex ja ye'nle'i. 20Jaxa yajni sk'u'lan ja Dyos ja jas yaluneji, yajnix ya pojxanik leki, ta yuj k'a waxa k'ana oj ja k'ux'ex b'ak'et, oj b'ob' a wabyex janek' waxa k'anawexi. 21-22Ta yuj k'a najat wax kan a wujilex ja na'its b'a wax ajyi ja tsomjeli, mi oj b'ob' wajanik, oj b'ob' a mil'ex b'a wa lu'umex ja jas waxa k'ana oj ja wabyexi, wakax ma chej oj b'ob' a k'ux'ex tiw ja b'ak'et jawi. Ja jastal jawi mi t'ilanuk oj k'u'laxuk sk'inil, jach'ni jastal Yajni oj k'uxtik b'ak'tel k'ujlal chej mix k'u'laxi sk'inil. 23-25Ja b'a mi oj ja wabyexi, ja b'ak'et b'a ay schik'eli, a'wik sts'ab' sb'aj b'a lu'um ja schik'el jastal ja'. Ta a k'u'anex k'a meran ja Dyosi, jel lek oj ek'uk a wujilex cho jach'ni ja wa wintilex jumasa. 26-27Jach' oj cho a k'u'lukex sok ja schik'el ja chante waxa wa'wex yi b'a smajtan ja Dyosi: B'ajtan oj ch'ak a pek' ex ja schik'el b'a sat altar, tsa'an ojxa b'ob' a k'ux'ex ja b'ak'et jawi.

28—Na'awik lek ja jas ch'ak kal a wabyexi. Yuj k'a waxa k'ana oj ek' a wujilex lek sok ja wa wintilex jumasa, kechan k'u'anik ja yab'al ja Dyosi, sok k'u'lanik spetsanil ja b'a lek ja jastal yaloj a wabyexi.

Maklayik, ja b'a mi sb'ejuk oj ja k'ulukexi

29Ja Moisesi, mix ch'ak yaljel yab' ja kristyano jumasa:

—Ja Dyosi, oj ch'ak sch'ay sna'jel spetsanil ja kristyano jumasa b'a oj ja nutsex eli, b'a we'n oj ja wi'ex kan yi' ja slu'ume'i. 30Yajni xwaj ek' jachuki, talna lek a b'ajex b'a mi jach' oj ja k'u'lukex ja jastal sk'u'lane jan ja kristyano jumasa jawi, mok a toy'ex yi ja dyos yujile' ajyi. 31Mok a neb'ex oj ja k'u'lukex ja jastal jawi, ja yuj ja Dyosi, mi lek wax yila ja kristyano jumasa ma wa sk'u'an ja dyos yujile' jawi. —wa stsikawe ja yuntikile b'a sat yaltar ja dyos yujile'i. 32Ja'yuj ja lek k'u'anik spetsanil ja yab'al ja Dyosi, mok jas a wa'wex kan pilan, mok cho jas a wa'wex och smoj.

Currently Selected:

Deuteronomio 12: YABD

Highlight

Copy

Compare