Deuteronomio 11
11
Ja yip ja Dyosi
1Ti cho yala ja Moisesi:
—Je'awik syajal a k'ujolex sok ja wa Dyosexi, sok k'u'anik ja yab'al jumasa. 2-4Man ya'n na'awik lek ja jastal stojowex ja Dyosi, ja iti mito sna'a ja wa wuntikilexi, a jak a k'ujolex ja jastal sje'a a wi'ex ja yip ja Dyos b'a Egipto sok ja jastal sk'u'lan ja niwak senya jumasa, ja yajni sjekayi niwak wokol ja mandaranum sok spetsanil ja swinkil ja chonab'i. Ja egipsiano jumasa yi'aj a patikex man b'a yoj ja' b'a it jel ja yakili, jaxa Dyosi ya slut sb'aj ja ja'i, ch'ak sch'ay sna'jel spetsanile: —Ch'ak ya ib'el ja'axuk kan ja skawu'e sok ja skarro'e b'a ilk'ujolaneli.
5—Na'awik lek ja janek' skoltayex ja yajni ek' a k'uts'ex jan ja takin lu'um k'inal man julyex ja ili. 6—Jastal oj ch'ay k'ujolal ja jas k'u'laji yile' yuj ja Dyos ja Datan sok ja Abiram yuj ja lom mi sk'anawe oj st'oj'on ja Dyos b'a jel niwan ja ka'tel yuj ja israelenio jumasa. Ja ye'nle'i ja state ja Eliab sok ja yintil ja Rubeni, yuj ja skistalil sk'ujole'i, ja'yuj yala ja Dyos lek b'i a b'uk'juke yuj ja lu'umi, —Sok b'uk'ji ye'ni yuj ja lu'uma, cho jach'ni ja yuntikile sok spetsanil ja jastik sb'aje'i. Ja iti ch'akni a wil'ex ja we'nlexa. 7Sok a sat we'nlex a wilawex jastal jel niwan ja yip ja Dyosi.
Ja slekil jumasa k'apji'i
8—Ch'akan k'u'anik spetsanil ja yab'al jumasa wa xka' wi'ex ja ya'n. B'a jach' oj ja ta' a wipex b'a oj ochanik ja b'a lu'um it oj a'juk a wi'exi. 9Ta a k'u'anex k'a, jel jitsan k'ak'u oj ajyuk ja wa sak'anilex b'a lu'um it oj ya' wi'ex ja Dyosi, —Ja lu'um jawi, jel lek, jel x'ajyi ja jastik junuki. 10Ja lu'um b'a Egipto t'ilan tsats lek oj ja wa'telta'uk b'a oj ja ts'un ja sb'a'ali, sok t'ilan ulb'anub'al. 11Jaxa lu'um b'a oj a'juk a wi'exi, spetsanil k'ak'u wa'n ya'lel b'a wa xya po'xuk ja lu'um jumasa man b'a yoj k'ul wax ko' ya'lel. 12—Ye'n ja Dyos wa stalnan spetsanil ja k'ak'u jumasa b'a jab'ili.
13—Ja'yuj ta wan k'axa k'u'anex ja yab'al jumasa wax ka'wi'ex ja ya'n, yajtayik, sok toyowik ja Dyos sok spetsanil ja jastalexi, sok wa k'ujolexi, 14-15Ja Dyosi, oj sjek ja ja' b'a yixawili, sok ja b'a sk'ak'u'ili, b'a jach' we'nlex oj ja jach' ex ja wa trigo'exi, mi oj k'ot tik'an ja pajal ya'lel ja ts'usub'i, mini ja aceite; jel oj ajyuk ja jas oj ja wabyexi, jach'ni ja wa wakaxexi, mi oj ch'akuk ja swa'ele'i.
16—Mok a wa'a b'ajex lo'lajel. Ta waj k'a a toy'ex k'u'lub'al dyos, na'awik ja wa'nex ya'jel kan pilan ja Dyos kujtiki, 17ja ye'n ojni tajkuka, mixa ojto ya jakuk ja ja'i. Mi jas oj ajyuk wa jas a b'ajexi, a'nima jeluk lek ja lu'umi ojni ch'ak chamanik wa'ina.
18-20—Neb'awik b'a wa olomex ja ab'al jumasa iti, ja' xa neb'awex; le'a b'a oj ja ts'ijb'ayexa, tixa mocho b'a snuk' a k'ab'ex ma b'a wa patanex, b'a jach' mi oj ch'ayuk a k'ujolexa. Cho ts'ijb'ayik b'a wax ajyi ochel b'a wa najexi, cho jach'ni b'as niwanil wax ajyi ochel ja b'a wa chonab'ilexi. Chikan b'a ayex ek'a spetsanil k'ak'u je'awik yi ja wa wuntikilexi, 21ta yuj k'a jach' a k'u'lanexi, jel oj ya najatb'uk ja wa sak'anilex ja Dyos ja b'a lu'um sk'apunej a wi'exi. —Spetsanil ja k'ak'u janek' tey ja satk'inali, ti'ni oj ajyanik tiw ja we'nlexa—
22—Ta oj k'a a k'u'ukex spetsanil k'ak'u ja ab'al jumasa it oj ka' wi'ex ja ya'n, oj k'a a yajta ja wa Dyosexi, toj k'a oj ajyanik soki, 23-24ye'n ja Dyos oj ch'ak snuts el ja kristyano jumasa ma tey tiw ja ya'n. Ja we'nlexi ojni b'ob' a wujilex a'nima niwak chonab' jumasa, ma kristyano jumasa b'a jel a'ay, ma yuj ja jel ja yipe'i. B'a k'e'el k'inal ma b'a ko'el k'inal, b'a stojol wax jak ja k'ak'u ma b'a yojol wax ochi, mini jun ma oj b'ob' sjap a wi'ex ja lu'um ja wa. 25Mini ma oj b'ob' yil a k'ujolex ja we'nlexa, ja Dyosi ojni ya xiw a wujilex spetsanil ja kristyano jumasa'a. Yuj ja jach'ni yalunej ja Dyosi.
26—Ya'n oj b'ob' a tsa'ex b'aya waxa k'ana oj ja wi'exi, ja ma b'a lek oj ek'uk a wujilexi, ma ja b'a mi lekuki. 27Ja ya'n ta oj k'a a k'u'ukex ja yab'al jumasa wax ya'wi'ex ja Dyosi, jelni lek oj ek'uk a wujilexa; 28kechan ta yuj k'a mixa k'u'anex, och k'a a toy'ex pilan dyos, a wa'wex k'a kan pilan ja jas je'a a wi'exi, jel wokol oj ek'uk a wujilex.
29—Yajni xyala ja Dyos ojxa b'ob' ochanik ja b'a lu'um wax yala, t'ilan oj wajanik ja b'a wits Guerizim b'a ti oj waj a wal'ex tiw ja slekil jumasa oj ja ta'exi, ta yuj k'a oj ja k'u'ukexi. Kechan ta mik'a ti oj wajanik b'a wits Ebal, ti oj ajyuk tiw jas wokolil oj a wi'ex ta yuj k'a mixa k'u'anexi. 30Ja chab' wits jawi, tey b'a stojol wax och ja k'ak'u b'a niwan ja' Jordani, b'a sti' sat ja Guilgali, lajan ay sok ja te' jumasa b'a More, b'a slomanal ja b'ay ja cananeo jumasa.
31—Ja we'nlexi ojxa ochanik ja b'a lu'um b'a k'ax niwan ja' Jordani, ye'nani oj ya b'a a k'ab'ex ja Dyosi. Yajni ti'xa ayex tiwi, 32jel t'ilan oj ch'ak a k'u'ukex spetsanil ja ab'al jumasa ka oj a wi'exi.
Currently Selected:
Deuteronomio 11: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
