Amos 7
7
Ja k'ujlub' jumasa
1Ja Dyos kujtiki yala, lek b'i ja oj k'el ja k'ujlub' jumasa it ojxa sjip b'a yalaje ja israelenio. Stuluwe'ta ja sb'ajtanil sb'a'al yalaje it sb'aj ye'n ja mandaranumi. Jasa, mito stuluwe ja b'a schab' majkili, ja jawi ja'xa sb'aj ye'nle'i. 2Yajni kila ja k'ujlub' jumasa ja'xa wa'ne sk'uxjel ja k'ul jumasa, ti jk'ana yi ja Dyosi:
—Mok wa stup ja smul wa wuntikili, Dyos kuj— ¿Jastal oj ajyukotikon jelto t'usanotikon tak?
3Jaxa Dyosi, stalnan jya'ujlaltikon, ti yala'a:
—Lek ay. Mi oj jek ja k'ujlub' jumasa b'a oj waj sk'u'l b'a mi lek sok ja we'nlexi.
Ja k'ak'i
4Ja Dyos kujtiki, yala lek b'i ja oj kil ja k'ak' it ek'ta sk'ujol ja oj ya jtuptikon sok ja multikoni. Ja k'ak' jawi oj ch'ak stsik spetsanil ja lu'umi, jach'ni b'a cha'anil ja niwan paman ja'i. 5Jaxa ke'n ti jk'ana yi ja Dyosi:
—Mok a k'u'l jachuk Dyos kuj— ¿Jastal oj ajyukotikon jelto t'usanotikon tak?
6Ja yuj ja Dyosi, stalna jya'ulaltikon, Ti yala'a:
—Lek ay. Mi oj cho jek ja k'ak' jaw b'a oj waj sk'u'l b'a mi lek sok ja we'nlexi.
Ja plomo sb'a k'ulu na'itsi
7Ja Dyos kujtiki, yala lek b'i ja oj k'el ja yajni tey mojan sok jun cha'anil ts'akab' toni, cho ti yaman yuj jun plomo sb'a k'u'lu na'its. 8Ti sjob'oki'a:
—¿Jasunk'a waxa wila b'a Amos?
Ti jak'a ja ke'n:
—Wax kila jun plomo sb'a jun k'u'lu na'its.
Ja'yuj ti yala kab' ja Dyosi:
—Sok ja plomo iti, oj kilta oj stojb'es sb'aj ja kuntikil jumasa. Yuj k'a miyuki, ja ke'n mixa oj ch'ay tuk mulal. 9Oj ch'ak jom ja ch'in snajtsil tsomjel jumasa b'a wa stoyowe ja sk'u'lub'al dyose ja israelenio jumasa, oj kale, ojni ajyuk ja tiro'anel sok ja smoj alijel jumasa ja mandaranum Jeroboami.
Ja Amos sok ja Amasiasi
10Jun pagre b'a Betel, sb'i'il Amasias, sjeka aluman yab' ja Jeroboam mandaranum yuj ja israelenio:
Ja Amosi, ay jas wa'n schapjel ek' a wab'alil ja we'n niwan mandaranum. Ja ke'ntikon ja israelenio mi oj k'antikon ja oj sk'u'l jachuki. 11Ja ye'n wax yala niwan mandaranum ti b'i oj chaman b'a tiro'anel jaxa israelenio jumasa oj i'juke oj waj lutjuke b'a pilan niwan chonab'—.
12Ja Amasiasi cho lo'lani jmok ja ke'ni, ti yala kab'a:
—Ja we'ni, waxa wala a wilata ja jas oj ek'uki: —Elan ja ili— Ti la waj b'a Juda. Ja tiwi oj b'ob' ek' awuj wa sak'anil jastal aluman Dyos. 13A'xa kan yaljel wa lo'il ja il b'a Beteli, yuj ja b'a chonab' iti tey ja snajtsil tsomjel it jel niwan wax ilxi sok ti b'a il wax jak ja mandaranum b'a wax jak stoy ja Dyosi.
14Jaxa ke'n ti jak'a yi'a:
—K'elawile, ja ke'n mi jun aluman Dyosukon, cho mini ja jtati mi jach' ek' jastal jawi. Ja ke'n talnuj wakax wax ekuj ja sak'anili sok ya'jel el igo b'a yoj k'ul. 15Ja ya'n ta wan k'ax kala ja jas wax ya na' ja Dyosi, yuj ye'n yala kab' oj ka'kan ja talnuj wakaxi, cho sjekawon b'a oj waj kal yab' ja lo'il it ja yuntikil israelenio.
16-17—Ja we'n waxa wala mi stojoluk oj kal yabye b'a mi sb'ejuk ja israelenio jumasa, yuj ja, ja yintile ja Isaaki. Jaxa yan makla ja we'n ja jas yala kab' ja Dyos oj kala wab'i:
Ja b'a chonab' iti,
ja wa che'umi oj sutxuk jastal ja ixuk chikanxta jas winikil wa sta'a sb'aj soki,
jaxa wa wuntikil ixuk sok winiki
oj chamuke k'utsub'al punyal.
Pilan ma oj kan sok wa lu'um jumasa
jaxa we'n jel najat oj waj chaman kan yuj wa chonab'ili,
jaxa israelenio jumasa oj i'juke
b'a jun niwan chonab' najat lek.
Currently Selected:
Amos 7: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
