Amos 5
5
Ja israelenio t'ilan oj sutxuk ja sk'ujole'i
1-4Israelenio,
maklayik ja ts'eb'oj it wax ya' cham k'ujoli
jach' wax ts'eb'ojta yuj ja jas ojxa ek'uki.
Israelenio,
ja Dyos kujtiki wax ya'a na'ex:
—Ja we'nlex ja ya'n alawik lajan sok chamelexa.
Ojxta kananik lib'an b'a lu'umi,
mixani oj b'ob' a tula b'ajexa;
lajanex sok jastal jun ak'ix chamelxa
mixa oj sak'wuk.
—Mi oj ek'uk a wujilex lek b'a tiro'aneli.
B'a jun chonab' oj el mil soldado,
kechan syen oj kumxuke sak'an;
ma jun chonab' oj el syen soldado,
kechan lajune oj kumxuk sak'an.
—Wan k'axa k'ana sak'an oj ajyanik,
kumxanik b'a oj ja k'u'ukonex.
5Mok wajanik b'a snajtsil tsomjel b'a Beteli,
ja jawi jelxa mojan oj jomuk;
mok cho wajanik b'a snajtsil tsomjel b'a Beerseba
mok ek'anik b'a Guilgali,
yuj spetsanil ja swinkil jumasa
oj i'juke b'a oj waj lutjuke b'a pilan niwan chonab'.
6—Wa'nto k'axa k'ana sak'an oj ajyanik
kumxanik b'a oj ja k'u'ukonex.
Mi k'axa k'u'lanex
ke'n oj ch'ak sna'jel ja israelenio;
—Oj chim sk'ajk'al ja snajtsil tsomjel b'a Beteli,
mini ma' oj b'ob' stupa—
7—Ja we'nlexi me'xa k'u'lanex yi b'a lek
ja ma'tik jel ixtalaji ye'i,
sok me'xa kisawex ja jastale'i;
—Ja jas leki, mini t'un lekxa wilawexa—
8-9—Ke'n ja ma' sk'u'lan
spetsanil ja k'anal jumasa b'a satk'inali;
Ke'n wax ka sutxuk
k'ik'inal ja sat k'ak'u,
ja k'ik'inal b'a a'kwali,
k'ak'u wax ka'kani;
Ke'n ja ma' wa sjeka ja ason jumasa
b'a oj ya jak ja ja' b'a oj ya po'xuk ja lu'umi;
Ke'n ja ma'wa sjema ja cha'anil ts'akab' ton jumasa
cho ke'n wax ka pax kan
jitsan jipub'al na'its;
—Ke'non ja Dyos it jel ja kipi—
10—Ja we'nlexi mixa kisawex
ja ma wa sle'a jastal toj oj ajyuki
sok ja ma wax yala ja smeranili;
11Ja we'nlexi jel ch'inxa wilawex ja ma'tik ajula sb'aji
waxa japawex yi ja swa'ele
yuj ja jel cha'an waxa tajb'ayex ja skontribusyone'i.
Ja'yuj mi oj b'ob' ajyanik
ja b'a tsamalik na'its a k'u'lunejexi,
cho mini oj b'ob' a wu'ex ja ya'lel ts'usub'
ja b'a tsamal ya'k'il jumasa it a ts'unuwexi.
12—Ja ke'n wax ch'ak jna' spetsanil wa mulexi;
wax jna'a ja jastik mi lek waxa k'u'lanexi.
Wax na'a jastal wa syamawe tak'in ja k'ela ab'al k'umal jumasa
b'a wa skoltaye ja ma' ay smul merani
ja wax st'enawe ja ma'tik jun k'ujoli.
Ja'yuj ja yajni wax k'elji ja mulali ja wax b'ob' yuj ja ma' ay stak'ini
jaxa ma mey stak'ini wax ch'aye.
13—Ja ya'n jelxa jelxita ja jas mi leki
ja'yuj ja ma' je sna'a jel lek a ch'ab'anuke—
14-15—Ja we'nlexi, waxa walawex
ti ayon a mokexa.
Yuj k'a jach' waxa k'anawex jastal jawi,
awikan sk'u'lajel ja jas mi leki,
ochan k'u'lanik ja b'a leki
toj ajyanik sok b'a spetsanil.
B'ob'ta ja jachuk
ja ke'n ja Dyos it jel ja kipi,
ti' oj ajyukon a mokex oj ka' a sak'anilex.
B'ob'ta ja jachuk
ja ke'n ja Dyos it jel ja kipi,
oj kil lek ja t'usan
kanelex sak'ani—.
Ja jastal ok' ye ja israelenio
16-17Ja Dyos kujtiki, cho ja Dyos jel ja yip yuj ja israelenio yalata:
Yajni oj jak ka' a tup wa mulexi,
ja ok'eli b'a spetsanil chikan b'a'a ojni ab'xuka.
Oj ajyuk ok'el b'a kaye jumasa,
oj ajyuk ok'el b'a wax chonji jastik,
oj ajyuk ok'el b'a yaljil ts'usub',
oj ajyuk ok'el b'a wits jumasa,
—cho jach'ni b'a wa stalnaye ja cham winiki—
18—Jel wokol oj ek' a wujilex ja we'nlex
ja ma'tik jel tsamal wa'nex smajlajel
ja k'ak'u oj jakoni—
—Mixa na'awex ja jas ti jakum a b'ajexi—
—Mi b'a jun sat k'ak'u'uk,
ti b'a jun yoj niwan k'ikinal—
19Ja k'ak'u jawi oj sna'e ja jas wax yabye'i
jastal wa spakawe ajnel yuj jun choj
tiwa sta'a sb'aje sok b'ej jun tan oso.
Ja k'ak'u jawi oj sna'e ja jas wax yabye'i
ja ma'tik wax och b'a yoj snaji
ti wax k'uxjiye yuj jun tan b'its'il chan
ja yajni wax yipane ja smak b'al na'itsi.
20—Ja smeranili, jach' jastal jaw
ja k'ak'u oj jakoni:
—Mi jun lekil k'ak'u'uk,
jun k'ak'u b'a sniwanil cham k'ujol—
21—Ja ke'n mi lek oj ki wa k'inex yuj wa relijyonexi—
—Mixax kuch kuj wa kulto jastal waxa toyowonexi—
22Ja we'nlexi wala mojxiyex jmok
waxa wi'ajex jan ki spetsanil tik'e majtanal,
jaxa ke'n mix k'ana oj k'ele.
23—Le'awik b'a pilan oj ts'eb'ananika—
—Mix k'ana oj makla yok'el arpa—
24Jel lek kax k'u'lanik yi b'a lek ja tuk jumasa
toj ajyanik jastal ja ke'n.
—Awik niwanb'uk ja jas lek waxa k'u'lanexi
jastal wax niwanb'i ja yok ja'
b'a minix tupi.
25—Israelenio,
b'a yojol ja chab' tajb'e jab'il
b'ejyiyex b'a takin lu'um k'inali,
ja we'nlexi mi b'a a wa'wex ki jmajtana.
26—Jaxa k'u'lub'al dyos Sicuti,
k'echub'al waxa wi'ajex ek'e,
ja dyos it waxa wa'wex sb'i'iluk mandaranumil
sok waxa kuchuwex ek' ja dyos Quiiun
it lajan sok jastal jun k'anali.
27Ja'yuj ja we'nlexi oj ka i'janik
b'a oj waj lut janik b'a pilan niwan chonab'
it ek'elto lek ja snajtil yuj ja Siria.
Ja ke'n ja Dyos it jel ja kipi,
Ja jas wax kala yujni jach' oj ek'uka—.
Currently Selected:
Amos 5: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
