Amos 4
4
Ja ixuke ma' jel ja jastik sb'aje b'a Samaria
1Sok ja we'nlex ixuke b'a Samaria,
maklayik ja jas wax k'ana oj kali:
Ja we'nlexi kojlelexta jastal ja
wakax jumasa b'a lu'um Basan,
waxa wixtalanex sok jel ch'in waxa wilawex ja ma' ajula sb'aji,
sok ja statame'i
waxa k'anawex yi' pajal yalel ts'usub' b'a oj yak b'anik.
2Ja'yuj ja Dyos it jel ja yip sb'a israelenio
wax yala jelxa mojan ja k'ak'u
oj i'janik najat lek yuj ja il
ja we'nlex sok wa wuntikilex jumasa.
Jach'ni ja ye'nle sok ja we'nlexi
oj a'ji och slokolab'il wa ti'exi,
3Ja we'nlexi, ti oj a'ji elanik
b'a sjotol ja cha'anil ts'akab' toni,
oj a'ji el june b'ajtan tsa'an ja juni,
b'a ti oj i'janik b'a wax milji ja chante'i.
Mix sutxi jas k'ujole ja israelenio
Ja Dyos kujtiki wax yala wabyex:
4-5—Ja we'nlexi, yujni
jel lekxa wabyex ja sle'jel wa mulexa,
mok a wa'wex kan stoyjel wa k'u'lub'al dyosex
b'a snajtsil tsomjel b'a Betel
sok b'a snajtsil tsomjel b'a Guilgali—
Ja skochel ja ke'n ja jas waxa k'u'lanexi.
Ja ke'n Dyoson yuj ja israelenio,
Ja jas wax kala yujni jachuka.
—Moka wa'wex kan sle'jel wa mulexi—
Moka wa'wex kan ya'jel yi smajtan wa dyosex
b'a spetsanil ja sakb'el jumasa,
cho i'ajik och b'a oxtike k'ak'u
ja slajunil wa jas a b'ajexi
awik spetsanil chikan ja smajtanalil,
alawik ja majtanal jumasa ma wa sk'ana oj ya'i.
6—Ja yajni ka a tek' ex wa'ini,
—Mini jun chonab' sta'a swa'ela—
Jach'ni ek' jastal jawa,
jaxa we'nlexi, mi sutxi wa k'ujolexi.
Ja ke'n Dyoson yuj ja israelenio,
Ja jas wax kala yujni jach' waj ja.
7—Oxe ixaw b'ajtan yuj ja waxa tulu ja sb'a'al wa walajexi
kala mi oj ka ya' ja';
jaxa b'a jun chonab'i wanix ya'a ja'a,
b'a pilan chonab'i, mini jun t'uje ja' wax ya'a a;
chab' oxe alaj po'xi kan lek,
jaxa tuk jumasa takin lek.
8Ja ma'tik mi ajyi ya'ali
—Ti waye b'a chonab' jumasa b'a ay ya'ale,
a'nima mi oj ek'uk ja takin sti'i.
Jachuk sok ja jawi,
ja we'nlexi mi sutxi wa k'ujolexi.
Ja ke'n Dyoson yuj ja israelenio,
Ja jas wax kala yujni jach' ek'a.
9—Ke'n jch'aka ja sb'a'al wa walajexi
oj cho jch'ak sna'jel ja te' jumasa b'a wax satini;
ke'n jeka jitsan yal chante
b'a wa walajex jumasa
sok k'ak'al ik' b'a takin lu'um k'inali;
jachuk mini sok ja jawi,
ja we'nlexi mi sutxi wa k'ujolexi.
Ja ke'n Dyoson yuj ja israelenio,
Ja jas wax kala yujni jach' waj ja.
10—Jeka a wi'ex ja wokol jumasa,
jastal ka' yi ja swinkil Egipto;
kala a ch'ayjuk sna'jel b'a tiro'anel
wa kawu'ex sok wa lekil soldado'exi;
—Ja stu'ujil ja cham winik jumasa
chikanxta b'a wax ab'xi ek'a—
jachuk, mini sok ja jawi,
ja we'nlexi mi sutxi wa k'ujolexi.
Ja ke'n Dyoson yuj ja israelenio
Ja jas wax kala yujni jach' waj ja.
11Jel jitsan ja we'nlex jch'aya a na'jelex
jach' jastal jch'aya sna'jel ja chonab' jumasa
b'a Sodoma sok b'a Gomorra;
—lajane sok ja chakal k'ak'
wantox el b'a yoj k'ak'i—
jachuk mini sok jawi,
ja we'nlexi mi sutxi wa k'ujolexi.
Ja ke'n Dyoson yuj ja israelenio,
Ja jas wax kala yujni jach' waj ja.
12—B'a spetsanil ja jaw israelenio
ja ya'n oj ka'a tup'ex;
yuj ja mi oj b'ob' a kolta b'ajexi,
—Chapa b'ajik yuj ja oj ja ta'onexi—
13—Ke'n jk'u'lan
ja ik' sok ja yaxk'ul jumasa;
Ke'n wax ka sutxuk
sakal k'inal ja k'ik'inali;
Ke'n wax kala yab' ja jastal
waxa chapawex ja kristyano jumasa;
ke'n ja wala b'ejyiyon
b'a cha'anil ja lu'umi;
—Ke'n ja Dyos it jel ja kip yuj ja israelenio—
Currently Selected:
Amos 4: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
