Amos 3
3
1-2—Israelenio jumasa,
maklayik ja jas wax yala wa Dyosexi—
b'a spetsanil ja swinkil ja lu'umi,
kechan we'n jtsa'awex;
kechan we'n ka elanik b'a Egipto.
Ja'yuj ojni ka'a tup'ex
spetsanil ja jas mi lek a ak'ulunejexi—.
Ay jun lo'il b'a a petsanilex
3Ay k'a chawane lajan wax b'eyiye
yuj lajan lek aye.
4Wan k'ax nilili' ja choj b'a yaxk'uli,
yuj wa'nx yab'i;
ti k'a wax nilili b'a sk'e'en'
yuj syamata jun chan.
5Yuj k'a wax kan lokan ja yal chani,
yuj ay ma ya'oj och syak.
6Wan k'ax k'e wo'oljuk ja kristyano'i
yuj ok'ta ja kacho;
Wa'n k'a xiwel ja kristyano'i
yuj ay jas mi lek wa'n ek'el.
Jayuj ta ay k'a jas mi lek wa'n ek'el,
yujni jach' wa sk'ana ja Dyosi.
7—Ja Dyosi mi ja sk'u'lan ta yuj k'a
mi yalojuk yab' ja yaluman jumasa—
8Wan k'ax nilili ja choji,
spetsanil kristyano wax k'itk'uni yuj ja xiweli.
Yuj k'a wax k'umani ja Dyos kujtiki,
spetsanil aluman Dyos oj k'umanuk.
Ja Samaria ojni ch'akuka
9-10Ja Dyos kujtiki yalunej:
—A'wik sna' ja it
ja ma'tik tey b'a niwan na'its jumasa yuj ja Asdod
sok b'a niwan na'its jumasa yuj ja Egipto—
—Alawik yab' ja kristyano a stsom sb'aje
b'a yaxk'ul jumasa b'a Samaria—
—A yil'e jastal wa sk'okowe sok ja jastal mi lek ja jas wa sk'u'lane
b'a chonab' jawi—
Ja swinkil Samaria mi sna'awe
ja sb'ej ja yala ja oj k'u'laxuk b'a leki.
Kechan wa sna'awe ja elk'aneli,
ti wa snolowe b'a niwan na'its ja yelk'ale'i—.
11-12Ja'yuj israelenio, ja Dyos kujtiki wax ya'a na'ex k'inal:
Jun soldado mi lekxa wila b'ajex sok ti oj jak b'a Samaria
oj sjoyb'a ele b'a jach' oj b'ob' yi' kani;
oj ch'ak sjem ja jastik yipuneji
mi' jas oj ya'kan b'a niwan na'itsi.
Ja choj ja yajni wa sk'ana oj syam ja chej jumasa;
jaxa talna cheji wa sle'a jastal oj skolta,
jasa, kechan oj b'ob' skolta
chab' yok ma xe'n schikin;
Jachuk ja we'nlex israelenio jumasa
ma' ti ayex b'a Samaria ja ya'n,
waxa k'ana oj ja pak ex ajnel waxa kana oj ch'aka wi'ex spetsanil,
jasa, kechan ja oj b'ob' awi'ex
ja yok ja ch'ati
ma ja k'u'uts wax lib'xi b'a lu'um b'a Damasco—.
13Ja Dyos kujtik it jel ja yip ja Dyos yuj ja israelenio, cho yalunejni'a:
—Maklayik lek—
—Awik sna' ja yintil jumasa ja Jacobi
14jelxa mojan ay oj ka stup
ja smule jumasa sk'uluneje'i—
Yajnix k'ot ja k'ak'u jawi,
oj ch'ak jom ja altar jumasa
sk'uluneje b'a Beteli;
oj jom jas xulub' jumasa ja altari
ti oj pok'tsuk b'a lu'um.
15Oj ch'ak jom spetsanil ja snaje'i
sok spetsanil ja niwan na'its jumasa;
oj ch'ak jom ja snaje jumasa it jel tsamal tojb'el yujile sok marfil,
ye'n stojb'ese ja ma'tik jel jas tak'in
b'a ti oj yawe ek' tiw ja sk'ak'u'il che'e
sok ti oj jijluke tiw ja yajnix lemxi eli.
—Ja jas wax kala yujni jach' oj k'u'luka—
Currently Selected:
Amos 3: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
