Amos 2
2
Ja jas mi lek oj ek' yuj ja Moab
1Ja Dyos yuj ja israelenio yalata:
Ja we'nlex swinkil Moab,
Jelxa jalxiyexta sok ja jas mi leki.
Ja'yuj, —Mini oj ch'ay wa mulexa—
A tsikawex ja sb'akel ja mandaranum b'a Edomi
man ta'an a wa'wex kani.
2Ja'yuj oj ek slap sk'ajk'al
ja chonab' Moab
ta'anxta oj ka'kan
ja niwan na'its jumasa b'a Queriot;
—Ja we'nlex swinkil Moab ti' oj chamanik
b'a yoj awanel jastal b'a tiro'anel
sok b'a yok'el korneta—
3—Ke'n oj ka elyi jas sak'anil wa
mandaranumex sok ja olomal jumasa a wi'ojexi—
Ja jas wax kala yujni jach' oj ek'uka—.
Ja jas mi lek oj ek' yuj ja Juda
4Ja Dyos yuj ja israelenio yalata:
Ja we'nlex swinkil Juda,
jelxa jelxiyexta sok ja jas mi leki.
Ja'yuj, —Mini oj ch'ay wa mulexa—
Mi a kisawex ja jas je'a wi'exi
cho mi a k'ana oj ja k'u'ukex.
Ja a toyowex ja k'u'lub'al dyos jumasa
it cho stoyowe ja ma ek' paxta a wujilexi.
5—Ja'yuj oj jlap sk'ajk'al
ja chonab' Juda,
ta'axta oj ka'kan ja niwan
na'its jumasa b'a Jerusaleni—.
Ja jas mi lek oj ek' yuj ja israelenio
6Ja Dyos yuj ja israelenio yalata:
Ja we'nlex israelenio,
Jelxa jelxiyexta sok ja jas mi leki.
Ja'yuj —mini oj ch'ay wa mulexa—
Ja ma'tik ch'in wax ya'a sb'aj sok jun k'ujoli
a chonowex b'a yib' k'ab'al oj ajyuke
sok chab' oxe sat tak'in a wa'awex
jun ita ch'ajpe xanab'al a wa'wex sts'akoluk;
7Ja ma'tik ajula sb'aji ja ma' jun k'ujoli,
waxa wa'wex kichichuk b'a lu'um
mini t'un lekxa wa'a b'ajex sok ja ye'nle'i;
ja tatal jumasa sok ja yuntikile'i, wax ya'we tajkukon
yuj ja wa sta'a sb'aje sok
junxta ixuki.
8Ti wax waye lajan sok ja ixuk jaw
b'a chikan jas altarila;
wa swaynub'ane ja sk'u'
ja ma' jel ajula sb'aj ti ya'oj kan
yuj ja oj stup meran ja sjeli;
sok ja tak'in wa sk'anawe yuj ja mulal it mey sb'eji
wa smanawe sok ya'lel ts'usub' wax yakb'iye lek
b'a snajtsil stsomjel ja dyose'i.
9-10—Israelenio,
ke'n ka elanik b'a Egipto,
b'a yojol chab' tajb'e jab'il
je'a wi'ilex b'a oj ek'anik b'a takin lu'um k'inali;
jch'aya sna'jel spetsanil ja amorreo jumasa
we'n ka'wi'ex ja schonab'ile'i,
a'nima jel cha'anike
sok jel ja yipe'i.
11Ja b'a janek' wa wuntikil we'nlexi
jtsa'a chab' oxe sb'a aluman Dyos
ja tuki jpila b'a ke'n oj ya'teltayone.
—Alawik kab' ta wa'non le'uj ab'al—
ja jas wax kal yujni jach' ek'a.
12—Jaxa we'nlex israelenio,
a wa'wex yakb'uk ja ma'tik oj ya'teltayoni
cho mi a k'anawex oj yal'e ja aluman
Dyos jumasa ja jastik wax kala.
13—Ja'yuj israelenio
—ke'n oj ka spach' ex kan ja lu'um
jastal wa spach'awex
jun karreta b'ut'el trigo—
14-15Sok ja ke'n b'a oj wajanika
mini ja ma jex ajni,
mini ja soldado jumasa ma' jel tsatsi,
mini ja tiro'anum jumasa ma' mi xiwi,
mini ja ma'tik jel juts'in wa sjipaye ja pulte'i,
mini ja ma oj spak ajnel sok kawu;
16—Jach'ni ja ma'tik mi t'un xiw ye'i
b'asan oj spak e ajnel ja k'ak'u jawi—
Ja jas wax kala yujni jach' oj ek'uka.
Currently Selected:
Amos 2: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
