Romanos 14
14
Ka'ap mmëku'uk xypyoky'ixëty
1Oyjyawëtë ja ja'ay mëti'ipë wäänë ja mëpëjkën myëët'ajtypyën ets këtii nëkoo mnäy'oj mnäya'axëtëty mëët. 2Tää jënaakën ja ja'ay mëti'ipë ënantëpën ko jyëkyejpy oytyiijëty tjë'kxtëty ets tää jënaakën mëti'ipë wäänë ja myëpëjkënëtyën, yi'iyë na''aay na'ujts jyë'kxtëp. 3Pën jyi'kxyp oytyiijëty, ka'ap tpäxëty mëti'ipë ka'ap oytyiijëty tjë'kxyën; ets pën ka'ap oytyiijëty tjë'kxyën, ka'ap tpäxëty pën jyi'kxyp oytyiijëty, jä'ä ko tëë ja Dios kyupëkyë. 4¿Mpën mijts ko xypyoky'ixy ja ja'ay mëti'ipë Dios myëtuumpyën? Pën oy ëkë ëxëëk winë tuny, yë'ë kë'ëm nyija'ap. E yë'ë oy wyë'ëma'any, jä'ä ko yë Wintsën myëët'ajtyp yë mëk'ajtën ets oy yajwë'ëmëtëty.
5Jatu'kpëky, tää ja'ay jënaakën mëti'ipë tu'ukpë xëëw mëj'äämpy yajnajxypyën ets tää mëti'ipë ënantëpën ko aak'oy yë xëëw oyjyëna'ajëty. Nitu'ukjaty ja ja'ay kë'ëm tmëmay tmëtajëty ja oypyë mëti'ipë myëpëkäämpyën. 6Pën tu'uk ja xëëw y'ëmaay'äjtyp, Dios wyintsë'këp ko t'ëmaay'äty; pën tii jyi'kxyp, Dios wyintsë'këp ko tii tjë'kxy ets yë'ë kyukajpxëp; e pën ka'ap tii tjë'kxyën nän Dios wyintsë'këp ko ka'ap tii tjë'kxy, ets nän kyukajpxëp ma Tiosën.
7Ka'ap kë'ëmwinma'any njuuky'ajtëm ets ka'ap kë'ëmwinma'any n'o'këm. 8Pën juuky'ajtëm, Dios xyajjuuky'ajtëm; e pën o'këm, Dios ënety jatëkok xy'ëxajëmë. Oy njuuky'ajtmëty ëkë n'o'kmëty, Dios ëëts xyjyä'ä'ajtëmë. 9Paaty ja Kristë y'o'ky ets jyuukpyijky jatëkok, jëtu'unts tniwintsën'atëty mëti'ipë juukyëtyën ets mëti'ipë ookyëtyën.
10¿E tii ko mijts ja mmëku'uk xynyi'ojë? ¿Ëkë tii ko xywiink'ixy? Ni'ëmukë ëëts nëjkx nwa'këxë'këmë Dios wyintum ets yë'ë nëjkx xypyaye'eyëmë. 11Jä'ä ko jëtu'un ja Dios ja y'aaw y'ayuk kyëxja'ayëty:
Jëtu'un ja Wintsën y'ënä'äny:
Ijxtëm tyiyëtyën koos njuuky'äty,
ni'ëmukë ja naaxwiinyëtë ja'ay xywyinkoxtänëtyës,
ni'ëmukë ja ja'ay y'ëna'antëty koos nTiosëty.
12Paaty, ni'ëmukë ëëtsajtëm nëjkx nwinkuwa'këmë ja Dios ets ntuk'ëwa'anëmëty tii ënety të ntu'unëmën.
Ka'ap ja nmëku'uk'ajtëm npoky'ijxmëty
13Paaty ka'ap mnäpyoky'ixëtëty nixim niyam. Yë'ë tuntë mëti'ipë ka'ap yajwiink'ixëtyën ets mëti'ipë ja mmëku'uk ka'ap ja myëpëjkën yajma'txëtëty. 14Ëjts njanija'apës ko aak'oy aak wa'ats winë; ets yë'ëkyëjxmës jëtu'un n'ëna'anyës koos ja Jesús nmëpëky. E pën winmääpy ko tää ja jë'kxy pëky mëti'ipë ka'ap y'oyëtyën, jëtu'un ja myäy tyäjy ko ka'ap y'oyëty. 15E näjyëtu'un ënät, pën yë mmëku'uk wyiink'ijxyp ko tii xyjyi'kxy, ma jëtu'un winë xytyunyën ka'ap ënety y'ëknätsyokë'ajnë. Ka'ap mëpaat yë'ë tyajtëkoy ja mmëku'uk ja myëpëjkën ma ja Kristën ko tii xyjyë'kxëty xypyëkëty. 16Ka'ap yë'ë xytyunëty mëti'ipë ja wiinkëtypë wyiink'ijxtëpën oy mijts xyjyanijawë ko ka'ap pyokyëty mëti'ipë mtuunpyën. 17Ka'ap yë'ëkyëjxmëty jam m'itë ma Dios ja kyutujktaknën ko tii xykyäytyë xy'uuktë, jä'äkyëjxm jam m'itë ko xytyuntë xykyajpxtë mëti'ipë paat'ajtëpën, wi'ix xymyëët'attëty ja jotkujk'ajtën ets ja xoontakën mëët ja Kënukxymyëkajtën. 18Mëti'ipë ja Kristë myëtuumpyën, jä'ä ja Dios tukjotkëtakëp ets näjyëtu'un ja ja'ayëty.
19Wä'än yë'ë n'ixta'ayëmë wi'ix npatmëtyën ja jotkujk'ajtën ets nnäpyutëjkëmëty nixim niyam wi'ix nwinpäjtmëtyën ma ja mëpëjkën. 20Ka'ap mëpaat ja Dios ja tyuunk kyutëkoy ko tii yajjë'kxy yajpëky. Tëy ko aak wa'ats yë kääky uuky. Yë'ë tëy ka'ap y'oyëty ko jä'ä një'kxmëty mëti'ipë ja nmëku'uk'ajtëm ja myëpëjkën tukyajtëkooyëtëpën. 21Nikë oy ko tsu'utsy nkatsu'tsmëty, ni ja tsatsym nyëë nka'ukmëty, ëkë oytyiijëty ka'ap mëpaat yë'ë ntu'unëm mëti'ipë ja nmëku'uk'ajtëm yajpokykya'ajëtëpën. 22Ja mëpëjkën mëti'ipë mijts mmëët'ajtypyën, mëët'at mijts kë'ëm Dios wyintum. Jotkujk ja ja'ay yajpaaty ko ka'ap tuny mëti'ipë yajkuma'ay yajkutajëpën. 23Ja ja'ay mëti'ipë ka'ap oy yajxon tnijawën pën mëpaat tjë'kxy tkajë'kxy winë, ko tjë'kxy kë'ëm tpokyjyawë ok, jä'ä ko ka'ap të tjë'kxy akujk jotkujk mëët ja mëpëjkën; tu'kë'ëyë mëti'ipë ka'ap tii ëmuumtu'ukjot yajtunyën, poky yë'ë.
Currently Selected:
Romanos 14: QUETZMIXE
Highlight
Share
Compare
Copy
Want to have your highlights saved across all your devices? Sign up or sign in
Biblia Dc en Mixe de Quetzaltepec, Oaxaca México © Sociedad Bíblica de México, A.C.
