Romanos 15
15
Ko njuuky'ajtmëty ijxtëm ja Critë jyuuky'äjtyën
1Ëëts'ajtëm, mëti'ipë mëk yajpatëpën ma mëpëjkënën, mëpaat mputëjkëmë mëti'ipë ka'ap oy myëpëktënëm, ets ka'ap yi'iyë n'ixtä'ämyëty mëti'ipë ntukjotkëtakmëpën. 2Ni'ëmukë ëëts xypyaat'ajtëmë ntukjotkëtakmëty ja nmëku'uk'ajtëmë ets tuk'oy'atëty wi'ix wäänë oy tmëpëktëty ja Kristë. 3Ka'ap ojts kë'ëm ja Kristë nyätyukjotkëtä'äkyë, jëtu'un ijxtëm ja Dios ja y'aaw y'ayuk kyëxja'ayëtyën: Ko ja ja'ay mwinkajpxpätëtëty, aak'ëjts xytyukkëtakp. 4Paaty ojts tu'kë'ëyë winë yajjaaywyi'imy ets xytyuk'ijx xytyuknija'awëmëty, ets amëk jotmëk nmëtënä'ämyëty ja ëyo'on mëti'ipë nmënajx nyajnajxëmën, jëtu'un nmëët'ajtmëty ja jotkujk'ajtën ko ja Dios ëmuumtu'ukjot njëjp'ijxëmë. 5Ja Dios, mëti'ipë xyajmä'kxtujkëmën ets xyajjotmëktakëmën, yë'ë mmo'ojëtëp ja winma'any ets tu'ukyë mjuuky'attëty xim yam, jëtu'un ijxtëm ja Kristë Jesús najtstu'unëyën, 6jëtu'unts tu'ukyë xymyëjjaw xyjyääntyjyawëtëty ja Dios, Wintsën Jesukristë Tyeety.
Ko ja aaw ayuk oypyë yajkajpxwä'kxy ma ja ja'ayëtyën ka'apë jyutiis'atën
7Paaty näkyupëkëtë nixim niyam ijxtëm ja Kristë të mkupëkëtën ets ja Dios mëjjaw jaantyjawë y'itëty. 8Ja Kristë tëë jëyëjp tniminy ja Jutiis ja'ay ets tpatuny ja aaw ayuk mëti'ipë ja Dios tyukwinwa'anëyën ja n'ap'ajt nteety'ajtëmë, ets tyajnikëxë'ëky jëtu'un ko Dios pyatuumpy yë'ë ko tii twinwanë. 9Näyjyëtu'un ojts tniminy mëti'ipë ka'ap jyutiisëty ets tmëjjaw tjaantyjawëtëty ja Dios ko tëë pya'ëyowëtë, ijxtëm ja Dios ja y'aaw y'ayuk kyëxja'ayëtyën:
Paaty mijts nmëjjaw njaantyjyawë ma ja ja'ayëtyën mëti'ipë ka'ap jyutiis'atën
etsës nkuuy'ëwëty ja mxëëw.
10Jëtu'un ja Dios ja y'aaw y'ayuk y'ënä'äny jatu'kpëky:
Miitsëty, mëti'ipë ka'ap jyutiis ja'ay'atën, itë xontë mëët ja Dios ja jyä'äyëty.
11Ets jatu'kpëky y'ënä'äny:
Miits, naaxwiinyëtë ja'ayëty, ni'ëmukë naax kajpn,
mëjjaw jaantyjyawëtë ja Dios.
12Näyjyëtu'un ja Jeséas ojts y'ënä'äny:
Jotkujk ja Jesé ja y'u'unk y'ok y'ita'any, mëti'ipë yajkutukaanpën ma ja naax kajpnën,
ets ja ja'ay yë'ë tyuk'ijxpäta'anyë.
13Ja Dios, mëti'ipë njëjp'ijxëmën, wä'än yë'ë ni'ëmukë mmo'ojëtë ja xoontakën ets ja jotkujk'ajtën mëët ko yë'ë xymyëpëktë ets wä'än mmo'ojëtë ja jotkujk'ajtën mëët ja myëk'ajtën ja Kënu'kxymyëkajtën.
14Mëku'uktëjkëty, nmëpëjkpës ko tyiyëty ko miits ni'ik xymyëët'atë ja oyjyot oywyinma'any, ja wijyajtën kejyajtën ets mjajtëp wi'ix mnäkyajpxwijëtëty. 15Paaty miits tyam ya'atë noky ntuknijayëtë ets ntukja'amyätstë. Jä'äkyëjxmës jëtu'un ntuny ko ja Dios të xytyuknipëkyës mëët ja y'oyjyot y'oywyinma'any 16etsës nmëtunëty ja Jesukristë ets ja ja'ay tuk'oy'atëty mëti'ipë ka'ap jyutiis'atën. Yë'ës ntukmëtuumpy ja Jesukristë etsës nkajpxwa'kxëty ja oy aaw oy ayuk mëti'ipë tso'onën ma ja Tiosën. Jëtu'untsës ntuny ets y'itëty mëti'ipë ka'ap jyutiisëty ijxtëm ja wintsë'kën mëti'ipë Dios y'oyjya'apën, mëti'ipë Kënu'kxymyëkajtën të tyajwa'atsyën.
17Nmëët'ajtypës ja mëk'ajtën etsës nämyëjjawëtëty ma ja Kristë Jesús, jä'äkyëjxm koos ja Dios nmëtuny. 18Ka'apës nnätyuk'a'ixëty tii nimëtya'aktëty, yi'iyës nimëtyäkpy mëti'ipë ja Kristë të tunyën ëjtskyëjxm etsës nputëkëty mëti'ipë ka'ap jyutiis ja'ay'atën ets ja Dios tmëmëtowtëty. Ya'atë yë'ë mëët wyintu'upëky ja käjpxy mëtyä'äky ets ja tuunk, 19ets mëët yë myëk'ajtën ja Kënu'kxymyëkajtën ko yajtuny ja mëj'ajtën. Jëtu'unës të nkajpxwä'kxy ja oy aaw oy ayuk ma ënety ka'anëm ja Kristë yajnimëtyä'äkyën, jam Jerusalén ets Lirië y'itjotm. 20Xëmës ntsoky etsës nkajpxwa'kxëty ja oy aaw oy ayuk ma ka'anëm yajnijawën ja Kristë. Ka'apës jyamëty të ntëkë ma ja ja'ay të yajtuk'ëwaanëtën ja Kristë këtiipës nyajpaatëty jëtu'un ijxtëm ja ja'ayën mëti'ipë jyëjpkojëpën tu'uk ja tëjkkojtuk ma wiink ja'ay të tkojtso'ontä'äkyën. 21Nikë jëtu'unës të ntuny ijxtëm ja Dios ja y'aaw y'ayuk kyëxja'ayëtyën:
Yë'ë nëjkx t'ixtë nijawëtë
mëti'ipë ënety ka'anëm tnijawëtën,
yë'ë nëjkx tja'akyyukëtë mëti'ipë ënety ka'anëm tja'akyukëtën.
Ko ja Pablo tuknipëjktaakë nyëjkxa'any jam Roma
22Paaty miits ka'ap nninëjkxtë oyës kanaak ok të njatuknipëjktaakë. 23E tëë tyam ja ntuunkës nyaj'apaatë ma ya'atë itën ets tëë kanaak jëmëjt nyajxnë ma miits të njaninëjkxa'antë, 24njëjp'ijxypës ko jääjës jam nnëjkxëty koos ënety nnëjkxy España. Ko ënety miits wäänë mëët të n'it të nxontë, xypyutëkëtëpës etsës nja'tëty maas ntijyën. 25E jam Jerusalén tyam nnëjkxyës, yë'ëjës ja näypyutëkë nmënëjkxyp ma ja nmëku'uk'ajtëmën mëti'ipë ëyoopëja'ayëtyën. 26Jä'ä ko tëë ja näypyutëkë tyajmuktë ja nmëku'uk'ajtëmë mëti'ipë jam tsënaaytyëpën Macedonia ets Acaya ets tuknikäxtë ja mëpëjkpëtëjk, ëyoopëja'ayëty jampë Jerusalén. 27Kë'ëmwinma'any të tyajmuktë, oy n'ëna'anmëty jëtu'unyëm ënety pyaat'atëtë; jä'ä ko jëtu'un ijxtëm ja Jutiis ja'ayëtyën ojts ja myëpëjkën tpëjkwa'kxtë mëët ja mëti'ipë ka'ap jyutiis ja'ay'atën; jëtu'un tyam pyaatëtë tpukëtëty ja ka'apë jyutiis ja'ayëtyën ets tputëkëtëty mëët ja pyëjktä'äkyëty ja jutiis ja'ayëty. 28Jëtu'unts, koos ënety ya'atë tuunk të nyajjëjpkëxy ets ko ënety të ntukkë'ëtëkëtë ja näypyutëkë, ënätës nnëjkxëty jam España ets jam miits nninaxtëty. 29Nija'apës ko mëj këjää ja Kristë xykyënu'kxa'anëmë ko ënety nja'tyës jam ma miitsëtyën.
30Mëku'uktëjkëty, mëët ja Wintsën Jesukristë ets ja Kënu'kxymyëkajtën ja tsyojkën jya'awën mëti'ipë të xymyo'oyëmën, n'amëtoyës miitsëty mëktä'äky ets ëmuumtu'ukjot ja Dios nja'amyäjtsmëty tu'ukyë ets miits ja Dios xytyuknija'amyätsëtëtyës. 31Amëtowtë pëjktsowtë ja Dios etsës xy'akëëytyuk xy'axajtukëty ma ja ja'ayëtyën mëti'ipë Judea yajpatëpën mëti'ipë ka'ap tmëpëktën ja Kristë ets näjyëtu'un oy yajkupëkëty ja putëjkën mëti'ipë yajtuknikäjxtëpën ja mëpëjkpëtëjk jampë tsyëënëtën Jerusalén. 32Pën ënaanp ja Dios etsës jotkujk nja'tëty ma miitstsëtyën ets nxoontakmëty, npo'kxmëty npëjkmëty ko miits ënety jam nku'ixëtë. 33Ja Dios mëti'ipë jotkujk'ajtën yäjkpyën wä'än yë'ë tyajpaaty ma miitsëtyën. Oy jyëtu'un'atëty.
Currently Selected:
Romanos 15: QUETZMIXE
Highlight
Share
Compare
Copy
Want to have your highlights saved across all your devices? Sign up or sign in
Biblia Dc en Mixe de Quetzaltepec, Oaxaca México © Sociedad Bíblica de México, A.C.
