Romanos 13
13
1Ni'ëmukë mëpaat yajmëmëtoy ja ja'ay mëti'ipë myëët'ajtëpën ja kuttujkën. Jä'ä ko ka'ap ma kutuunk mëti'ipë ka'ap jam kyutukyën ma Tiosën, mëti'ipë jääjëtyën Dios yë të pyëjkta'akëtë. 2Paaty ko pën ja kutuunk tkamëmëtowëty, wyiink'ijxyp ënety mëti'ipë ja Dios të tuknipëjktaakën. Ets mëti'ipë käjpxy kumëtoownajxpën nëjkxëp ja yajtëytyuny. 3Yë kutuunktëjk ka'ap yë'ëkyëjxmëty të yajpëjkta'aktë ets tyajjotkëxtëty mëti'ipë oy winë tyuunpyën, yë'ë të yajtuknipëjktaakëtë ets tpaye'eytyëty mëti'ipë ëxëëk ëtëtstëp ënantëpën. Pën ka'ap mëët ja tsë'ëkë mjuuky'ata'any, tun kajpxp mëti'ipë oyën ets ja kutuunk m'oyjyawëtëty. 4Dios yë'ë të tyuknipëjktaakëtë ets miits jotkujk myajpaattëty. E pën mijts ëxëëk m'ëtë'ëtsy m'ëna'any kopkpëky ko mtsë'ëkëty; jä'ä ko ka'ap ja kutuunktëjk nëkoo ja mëk'ajtën të yajmo'otë, yë'ë ets ja Dios tmëtuntëty ets tëytyuntëty ja ja'ay mëti'ipë ëxëëk ëtëtstëp ënantëpën. 5Yë'ë oy ko kutuunktëjk nmëmëto'owmëty, ka'ap tyim yë'ëkyëjxmëty ets yajkumëtowëty ja ëxëëkpë, yë'ëkyëjxm ets ntu'unmëty mëti'ipë mëtëyën. 6Paaty miits myaktë mkëpätë ma ja kutuunktëjkën, jä'ä ko Dios myëtuuntëp paatykyëjxm jam të yajpëjkta'aktë.
7Yaktë nijä'äjaty mëti'ipë paat'ajtëpën. Mëti'ipë mëpaat xykëpätën, yaktë ja m'ayajk m'ako'onënëty; pën jam ja këpäjtën myuky, yaktë ja mjä'äjëty; pën nitëjkëyëp yajwinkutsë'ëkëty, wiinkutsë'ëkëtë; pën paat'ajtëp mëj y'itëty, mëj yajnaxtë.
8Këtii pën xymyënu'kxy'atëty, yi'iyë ja oyjyot oywyinma'any miits mnätyukmënu'kxy'atëtëp nixim niyam; pën ja myëku'uk tsyojkpy, tëë ënety tpatuny wi'ix ja ënä'ämën y'ënä'änyën. 9Jëtu'un ja ënä'ämën y'ënä'äny: ka'ap xyajtëkoytyëty ja nyiwintsë'kën ja pëjkën ukën, ka'ap myajja'ay'ookëty, ka'ap mmäätsëty, ka'ap mmëku'uk nyaax kyam xy'atsojkëty. Tu'kë'ëyë ya'atë ets wiinkëtypë ja ënä'ämën, ënät tsyoowtëjkëtyä'äy ko yajpatuny ja ënä'ämën mëti'ipë ënaanpën: Tsok ja mjëëky mmëku'uk ijxtëm kë'ëm mnätsyokyën. 10Mëti'ipë ja'ay tsojkp ja'apën, ka'ap yë myëku'uk t'ëxëëktuny, ma ja nätsyok näjyawën jam ja ënä'ämën yajpatuunta'ay.
11Ixtë tuntë wi'ix ja xëëw jëmëjt tyu'uye'eyën, ets yë'ë mëmay mëtajtë ko tëë tpatnë jëna'a ja ja'ay myä'äywijtëtyën. Jä'ä ko ja nitsokën'ajtëm tim winkon ja yajpatnë, ka'ap y'ëkjëtu'un'ajnë ijxtëm ojts nmëpëjktso'onëmën. 12Tëë ja tsu'um'it nyajxnë, jëtu'un tyamnë ijxtëm jeexyë xyiinyëjanën, paaty ka'ap n'ëkpokytyu'unënëty, ka'ap n'ëk'ijtënëty akootstuuy; wä'än nyajpatëmë ajajtuuy ijxtëm tu'uk ja tsiptuunpë y'ijx'ity kyëwent'atyën. 13Tsojk winë oy ntu'unëm ijxtëm xëëny tii yajtunyën. Ka'ap je'eyë xëmë n'ukmëty nmukëmëty, ka'ap xim yam yë ye'etyëjk t'ixëty yë to'oxytyëjk ëkë yë to'oxytyëjk xim yam yë ye'etyëjk, ëkë xim yam pën mëët ntsiptu'unmëty. 14Ni'ikyë miits mnätyukxoxëtëty ja mëpëjkën mëti'ipë jam mmëët'ajtëpën ma ja Wintsën Jesukristën ets ka'ap yi'iyë xymyëmay xymyëtajtëty wi'ix ja mjot mnini'kx tii t'oyjawëtyën.
Currently Selected:
Romanos 13: QUETZMIXE
Highlight
Share
Compare
Copy
Want to have your highlights saved across all your devices? Sign up or sign in
Biblia Dc en Mixe de Quetzaltepec, Oaxaca México © Sociedad Bíblica de México, A.C.
