aRooma 4

Abrahaamu aahaakhuleliwa niwoko na nroromelo

1Vanonto, nneere hai sa nikholonahu Abrahaamu? Yaamweereenle eheeni owo? 2Waari weera Abrahaamu aahaakhuleliwa niwoko na miteko, owo aamukhalano etthu yoowiivuwihera, ohikhanletho vamaithoni wa Muluku. 3Enghima eheeni Yoolempwa*? Abrahaamu aamuroromela Muluku, ni niwoko na yeeyo, owo aahaakhuleliwa. 4Moone, nlivo na namuteko khanooneliwa ntoko yamahala, mene ntoko yoonyesereriwa. 5Wa soothesene, yoole ohimvara muteko, mene anroromelaka Muluku ommwaakhulela namattheka, nroromelonawe ningwera weera owo onaakhuleliwa ni Muluku. 6Davide aahima etthweene yeeyo, uulumaka sa yooreelihiwa ya yoowo Muluku ommwaakhulelaawe, ohikhanle wa miteko: 7“Ooreelihiwa yaawo sootakhalasaya siri sooleveleliwa, sootthekasaya siri sookhuneeliwa. 8Ooreelihiwa mutthu sootthekasawe Apwiya ahinaalikelaaya.” 9Yooreelihiwa eyo eri paahi ya oowiineliwa, hoye hoye ya oohiineliwatho? Noohima weera mwaha wa Abrahaamu aahaakhuleliwa niwoko na nroromelonawe. 10Vano, yaakhani aakhuleliwaawe Abrahaamu? Ahinaaye, hoye hoye vahoolo wa wiineliwawawe? Khoohiyono iinelingweene, mene ahinaaye! 11Hiiho owo aahaakhela wiineliwa ntoko eneneero, ethoonyero weera owo aakhuleliwaawe niwoko na nroromelo, ahinaaye nlelo wiineliwa. Tivawo awo ari atiithi a ootheene yaawo anroromela ehiineliwe, weera awotho ekhale oowaakhuleliwa. 12Awo aritho atiithi a oowiineliwa, ehikhanle paahi oowiineliwa, menetho a yaawo aneetta mphironi ya nroromelo yeettaaya atithihu Abrahaamu ehinaaye wiineliwa. 13Abrahaamu ni anamwanaaya yaahaakhela yoororomelihiwa weera awo yaarwa waakhela elapo ya vathi ntoko yoohiyeriwa*. Khayaakhenle yeeyo niwoko na nlamulo, mene niwoko yaahaakhuleliwa mwaha wa nroromelonaya. 14Vano, yaawo ankhala munlamuloni yaari anamwaakhela, nroromelo nri na siiyo ni yoororomelihiwa eri yoohivareleya muteko. 15Nlamulo ninruwera isara, ni weiwo nihikhanlaayawo nlamulo, khoowowo otakhaliwa. 16Tivawo, yoororomelihiwa enrwa niwoko na nroromelo, weera evahiwe mahaleene, ni hiiho ekhale oororomelihiwa wa anamwane ootheene a Abrahaamu, ehikhanle paahi wa yaawo ari vathi wa nlamulo, mene wa yaawotho arino nroromelo nenenenno Abrahaamu aarinaawe. Awo ari atiithi a hiyo ootheene. 17Ntoko elempwalaaya: “Miyo koohookhaliha tiithi a miloko sincipale,” aani, vamaithoni wa Muluku mwa Yoowo aamuroromenlaawe, Muluku owo omvaha okumi wa akhwiiye ni onkhaliha itthu sahaakhanle weera sikhale. 18Waarookhalaru woorika ororomela, Abrahaamu aaroromela, ni hiiho aakhala atiithi a miloko sincipale, ntoko yaahimmwalaaya mwaha wa yoowo: “Hiiho eniikhale anamwanaanyu.” 19Ahikhulumuwaka munroromeloni, owo aahoona weera erutthwaawe yaahuuluvala, niwoko saaphiyera iyaakha wookwanaka ncira, nitho weera niphwanya na Saara khanaawera. 20Hata hiiho owo khaahovenle ni ohiroromela mwaha wa yoororomelihiwa ya Muluku, mene aalipiheriwa munroromeloni ni aamvuwiha Muluku, 21areene ooviriyeliwa ni murima wootheene weera Muluku aari a ikuru okwanihera yeeyo aaroromelinghaawe. 22Tivawo Muluku aamwaakhulenlaawe niwoko na nroromelo. 23Masweene yaale weera “aahaakhuleliwa ni Muluku” khayaalempwale paahi wa yoowo, 24menetho wa hiyo Muluku aneeraawe anaakhulele, wa hiyo ninroromela mwa Yoowo omvenyererihale mookhwaani Yeesu, Apwiyaahu. 25Owo aavahereriwa okhwa niwoko na sootthekasahu, ni aavenyererihiwa weera hiyo naakhuleliwe ni Muluku.

Currently Selected:

aRooma 4: VMK2021

Highlight

Copy