aRooma 3

1Yooreera heeni okhala muYuda, hoye hoye muteko heeni omvaraaya wiineliwa? 2Vancipale, mwa mikhalelo sootheene. Woopacera niwoko masu a Muluku yaaroromeliwa wa aYuda. 3Ankha akina a yaawo yaahiroromeleya? Ohiroromeleyawaya onuumalihe ororomeleya wa Muluku? 4Hata vakhaani! Muluku akhaleke a ekhaikhai, ni atthu ootheene anamootha. Ntoko elempwalaaya: “Weera yaakhuleliwe maswaanyu ntoko ekhaikhai nyuwo muulumaka, ni mmwiwine nyuwo mwaathorihiwaka.” 5Vano, soohitteelasahu sooniheraka moota wa nnenesene ekhaikhai ya Muluku, nneere hai? Weeraka Muluku ti oohireera woonihela isarasawe? Kinuuluma moota wa omutthu. 6Vekhaikhai hoye! Waari hiiho, moota heeni Muluku eeraawe athorihe elapo ya vathi? 7Woothawaka wooniheraka ekhaikhai ya Muluku, ni hiiho waandyeereraka ovuwawawe, heeni nlelo kinthorihiwaaka ntoko namattheka? 8Heeni muhineeraanyu yeeyo anamwaapa akina annootheraaya ninghimaahu: “Nipakeke yoonanara weera ekhumemo yooreera?” Othorihiwa wa atthweene yaawo ti woophwanela.

Khaawo mutthu ori a ekhaikhai

9Eheeni nneeraahu nimalihe? Hiyo nohaapwaha yaawo? Hoye! Noothaliha nnene weera aYuda ni aGrego anlamuliwa ni soottheka. 10Ntoko elempwalaaya: “Khaawo mutthu a ekhaikhai, naari mmoha; 11khaawo mukina oniiwexexa, khaawo ommwaasa Muluku. 12Ootheene aahapuwa ni aathatuwa a siiyo. Khaawo ompaka yooreera, hata mmoha. 13Mimilosaya siri mahiye oohuleya; ni malumaaya annalokottha. Yoohapala ya inowa eri mmwaanomwaya. 14Iyanosaya soosareya sa olapha ni owaawa. 15Inaawosaya sineetta woowaakuveya weera sivuuvihe ephome; 16milepe ni ohaawa simphwanyiwa mphironimwaya, 17ni khaasuwenle ephiro ya murettele. 18Atthweene yaawo khaammoovaru Muluku.” 19Noosuwela weera sootheene nlamulo ninghimaaya, ninaaleela yaale alamuliwe ni nne, weera iyano sootheene simaale, ni elapo ya vathi yootheene ekhale yoothorihiwa ni Muluku. 20Tivawo khaawo anaakheleliwe ni Muluku niwoko na wiiwelela nlamulo, weenre okhalaka mwaha wa nlamulo hiyo noosuwela nnenesene soottheka.

Waakhuleliwa niwoko na nroromelo

21Vanonto wohoonihereya waakhuleliwa ni Muluku, onrweela wa Yoowo, ohikhanle mwaha wa nlamulo. Nlamulo ni maprofeeti ankhalela onamoona mwaha wa waakhuleliwa iwo. 22Vano, waakhuleliwa ni Muluku iwo onrweela niwoko na nroromelo mwa Yeesu Kristu wa ootheene animuroromela. Khaniwowo nthalu, 23niwoko ootheene aattheka ni ari ottaiwene wa ovuwa wa Muluku, 24yaakhuleliweenetho ni Muluku mahaleene, eyo tiiyo mwa mahalaawe niwoko na ovuluxiwa ori mwa Kristu Yeesu. 25Muluku oomwiiyaathi Yoowo ntoko yoowiiveleela weera awere wiiraaniha ni ephomaawe niwoko na nroromelo. Owo aapaka yeeyo weera oonihere ororomeleyawawe, niwoko moovilelanimwawe aahiya soohittaruxiwa soottheka saapakiwe khalayi. 26Aapaka iye weera oonihere ororomeleyawawe wa vaanaano, weera akhale namaroromeleya ni namwaakhulela wa yaale animuroromela Yeesu. 27Vano, nri woowi nthowa na wiivuwiha? Khanaalikeliwe. Niwoko heeni nihaalikeliwaaya? Niwoko na wiiwelela nlamulo? Hoye. Niwoko na nroromelo paahi. 28Hiyo nlelo ninnanyeserera weera mutthu onaakhuleliwa ni Muluku niwoko na nroromelo, ohiya wiiwelela nlamulo. 29Muluku ti Muluku a aYuda paahi? Owo khahiyonotho Muluku a amalapo? Aani, a amalapotho, 30woonaka weera Muluku ori mmoha paahi, anaawaakhulele oowiineliwa nitho oohiineliwa niwoko na nroromelo nenenenno. 31Hiyo noomaliha nlamulo niwoko na nroromelo nenenenno? Hata vakhaani! Ohiyanawaya, ninnalipiha nlamulo.

Currently Selected:

aRooma 3: VMK2021

Highlight

Copy