Epacerero 45

Yoseefe oniisuweliha wa axunneiye

1Emaareene yeele Yoseefe aahooceela ovilela. Aahaalamula yaale yaamvarela muteko: “Mukivenyerase.” Vano hiiho khaawo aahanle ni yoowo ehuhu Yoseefe iisuwelihaawe wa axunneiye. 2Yoseefe aakhuwela iinlaka moota wooweera mpaka awExipitu wiiwa, ni ihabari iye saaphiya vaate wa Farawu*. 3Yoseefe aaweerela axunneiye: “Miyo ti Yoseefe. Atithaka nlelo akumi?” Mene ale yaatteenguwa vamaithoniwawe woohiwera omwaakhula. 4Yoseefe aaweerela axunneiye: “Mukikhuveele.” Awosa emwaattamelakaru, aaweerela: “Miyo ti Yoseefe, munninyu yoole mwaamuthumihalaanyu wExipitu. 5Vano muhiithananiherase, naari muhiixoove niwoko na okithumiha wenno. Aari Muluku aakirumihale ohoolowanyu weera ancipale ekhale ni okumi. 6Hapo nrino iyaakha piili emvolaaya etala mweelaponi ni iyaakha ithanu sinrwa, khoorwa olimmwa naari ohemphwa. 7Muluku ookirumiha ohoolowanyu weera akhapelele ekhapiraanyu mweelaponimu, ni weera avuluxe okumaahu moota wootikhiniheya. 8Khamuhiyono nyuwosa mukiruuhale nno, mene aani Muluku muneene. Owo ookikhaliha ntoko namalaka a Farawu* ni muhooleli a vaatewawe wootheene ni elapo yootheene ya wExipitu. 9Muhokoleele woowaakuveya wa atithaka, mwaweerele: ‘Mwaninyu, Yoseefe, eenre ha: ‘Muluku ookikhaliha pwiiya a wExipitu wootheene. Nrwe wenno woowaakuveya.’ 10Nyuwosa mmwakhale elapo ya oGoxeni, ni hiiho mmwikhale vakhiviruwaka, nyuwosa vamoha ni anamwaniinyu, nitho osuulwaanyu, ikhondoolosanyu ni imombesanyu, ni sooreelasanyu sootheene. 11Miyo nkookhavihereni ni yooca, niwoko nlelo soohala iyaakha ithanu sa etala. Moota ola nyuwo ni amusaanyu ootheene ni mihuwosanyu sootheene khasirwa sihaawa. 12Nyuwosa ni munnaka Benyamini muneera moonaka ni maithwaanyu weera vekhaikhai ti miyo kinuuluma ni nyuwosa. 13Mwaaleele atithaka ovuwawaka wootheene wExipitu, ni sootheene nyeenyuweenesa moonnaanyu, ni mwaawiihe nno atithaka woowaakuveya.” 14Vano iinlaka, owo aamutuphela munneiye Benyamini anamukhubaara, ni Benyaminitho aamukhubaara, iinlaka. 15Woottharelana, Yoseefe aahaabeca axunneiye ootheene ni aahiinla ni yaawosa. Vahoolowaya paahi yaawenraaya ontthekulano. 16Wiiwanyeyakaru wa Farawu* weera axunneiye Yoseefe ahoowa, owo ni anamalakaawe ootheene yaahakalalasa. 17Farawu* aamweerela Yoseefe: “Waaleele axunneiyo weera eweliheke mirittisaya mwaaxinamanimwaya, ehokoleeleke elapo ya oKanaani. 18Muhokoleeleke nno mwaaruuhaka atithinyu ni emusaanyu. Kinimoovahani nipuro nooreeraxa na wExipitu ni nyuwosa mmweereke ocano sooruuweriwa sa elapo ela. 19Mwaalamuleleketho weera ekuxe ikaaro sikina sa wExipitu weera yaaruuhelekeno axaaraya, anamwanaaya ni atithaya. 20Muhitthukuruwe ni sooreelasanyu, niwoko sooreerelaxa sootheene sa wExipitu nsikhale sawinyu.” 21Vano anamwane a Yixrayeli yaapaka yeeyo. Yoseefe aahaavaha ikaaro ntoko Farawu* aalamulenlaawe, anaavahatho yooca wa mukwaahaaya. 22Wa khula mutthu aamvaha ikuwo sikina sinyowani. Wa soothesene, aamvaha Benyamini ixekeli* macira mararu ni ikuwo sinyowani sincipale. 23Aahaarumihela atithawe abuuru muloko ekunxeene sooreerelaxa saari wExipitu ni abuuru asithiyana muloko ekunxeene etrigu, ipaawu ni sooca sikina sa munkwahani. 24Vahoolowaya aahaaraxela axunneiye ni, epwahaka, Yoseefe aaweerela: “Muhicocopolaneke mphironi!” 25Vano yaavenya wExipitu, enahokoleela wa atithaya, elapo ya oKanaani 26ni yaahaathalihera ihabari iya: “Yoseefe ori ni okumi! Mwa yeeyo: Ti mutokweene a wExipitu wootheene.” Yakobe owanoni waamuuma ni khaawaakhulela. 27Mene emuthaliherakaru sootheene Yoseefe aaweerenlaawe, ni oonaka Yakobe ikaaro Yoseefe aaruminghaawe sookuxeriwano, munepaawe waakakhamuwa. 28Yakobe aaheera: “Kooviriyeliwa! Mwanaka Yoseefe nlelo mukumi! Kinoorowa kamoone kihinaaye okhwa.”

Currently Selected:

Epacerero 45: VMK2021

Highlight

Copy