Epacerero 46

Yakoobe onthaamela wExipitu

1Yixrayeli aattimula ni soorelasawe sootheene. Aaphiyaawe oBerxeba, aampakela yooveleela Muluku a atithawe Isaki. 2Vano Muluku aamuulumano Yixrayeli mmooneloni moohiyuni: “Yakobe, Yakobe!” Owo aamwaakhula: “Miyo kiri va.” 3Owo aamweerela: “Miyo ti Muluku, aani, Muluku a atithinyu. Muhoove orowa wExipitu, niwoko kinimookhalihaniwo muloko mutokotoko. 4Miyo Yoomeene kinimoohoolani wExipitu ni vekhaikhai kinimoohokoloxani. Vano ntata na Yoseefe nniwale maithwaanyu.” 5Yakobe aattimula oBerxeba. Anamwane a Yixrayeli yaahaakuxa atithaya Yakobe, anamwanaaya ni axaaraya mukaaroni Farawu* aaruminghaawe. 6Yaakuxatho mihuwosaya ni sooreela yaaphwannyaaya oKanaani. Hiiho Yakobe aarowa wExipitu ni ekhapiraawe yootheene. 7Aahaarowano wExipitu anamwanaawe, asilopwana ni asithiyana ni axisulwaawe asilopwana ni asithiyana, eyo tiiyo ekhapiraawe yootheene. 8Vano masina a anamwane a Yixrayeli (eyo tiiyo Yakobe ni anamwanaawe) yaarongwe wExipitu ti ala: Rubeni, ntthaara na Yakobe. 9Anamwanaawe Rubeni yaari ala: Hanokhi, Palu, Hezironi ni Karimi. 10Anamwane a Simeyoni yaari ala: Yemuyeli, Yamini, Ohadi, Yaki, Zowari ni Xawuli, mwaana a muthiyana muKanaani. 11Anamwane a Leevi yaari ala: Gerxono, Kohathi ni Merari. 12Anamwane a Yuda yaari ala: Eri, Onani, Xela, Perezi ni Zera. Eri ni Onanitho yaahookhwa mweelaponi ya oKanaani. Anamwane a Perezi yaari ala: Hezironi ni Hamula. 13Anamwane a Isakari yaari ala: Tola, Puwa, Yope ni Ximeroni. 14Anamwane a Zebuloni yaari ala: Serede, Eloni ni Yaleyeli. 15Yaari yaala anamwane Leya aamuyarannaawe Yakobe oPadan-Arami omuhiya mwanawe muthiyana, Dina. Vano ekhapiraawe yootheene yaari miloko miraru naararu. 16Anamwane a Gadi yaari ala: Zifeyoni, Hagi, Xuni, Ezeboni, Eri, Arodi ni Ariyeli. 17Anamwane a Axeri yaari ala: Yimena, Yixeva, Yixevi ni Beriya. Vano murokoriye aari Sera. Anamwane a Beriya yaari ala: Heberi ni Malekiyeli. 18Ela yaari ekhapira Zilipa aamuyarannawe Yakobe. Vano aari Zilipa Labani aamvanghaawe mwanawe muthiyana, Leya, ntoko murumeiyi. Zilipa aahaayara wookwana anamwane muloko ni athannamosa. 19Anamwane a Rakheli, mwaariye Yakobe yaari ala: Yoseefe ni Benyamini. 20wExipitu, Asenati, mwaana muthiyana a Potifari musaserdoti* mmoha a wOni, aamuyarano Yoseefe anamwane eeli ala: Manaxe ni Efrayimi. 21Anamwane a Benyamini yaari ala: Bela, Bekeri, Axebeli, Gera, Nahamani, Ehi, Roxi, Mupimi, Hupimi ni Arede. 22Ala yaari anamwane Rakheli aamuyarannaawe Yakobe – muloko ni axexe. 23Mwaana a Dani aari Huximi. 24Anamwane a Nafitali yaari ala: Yakhezeyeli, Guni, Yezeri ni Xileme. 25Ala yaari anamwane Biliya aamuyarannaawe Yakobe. Vano aari Biliya yoowo Labani aamvanghaawe mwanawe muthiyana, Rakheli, ntoko murumeiyi. Biliya aahaayara anamwane athanneeli. 26Ootheene yaale yaarongwe wExipitu ni Yakobe – ekhapiraawe yootheene waahiya axaaraya anamwanaawe waapwexerera yaari atthweene miloko mithannamosa ni athannamosa. 27Navetho, yaalikeleliwa anamwane eeli Yoseefe aayanraawe wExipitu, epuumba ya emusi ya Yakobe yaarongwe wExipitu yaaphiyera miloko mithannamiili.

Yakobe onkhala oGoxeni

28Vano Yakobe aamuhooliha Yuda wa Yoseefe weera asuwele moota woorowa oGoxeni, enaphiya elapo ya oGoxeni. 29Yoseefe aawela ekaaro, anarowa oGoxeni weera aakumaneno atithawe Yakobe. Akumanakaru ni atithawe, aatthimaka weera aakhubaare, ni aakhubaaraka yaawo, aahiinla vancipale apisaka omaala. 30Yakobe aamweerela Yoseefe: “Vano kikhweeke hapo kohoona ekhovaawo ni koosuwela weera weyo nlelo mukumi!” 31Yoseefe aaweerela axunneiye ni emusi yootheene ya atithawe: “Kinoorowa kaaleele aFarawu* weera axunnaka ni emusi yootheene ya atithaka yaamanke mweelaponi ya oKanaani, ahoorwa wenno. 32Nkeere weera asilopwanaawo akukhuli ankosoopa mihuwo ni aarwaano mihuwosaya ni sootheene arinaaya.’ 33Vano Farawu* alamula owiitthanani ni ookohani: ‘Mumvara mutekoni?,’ 34mwamwaakhule ha: ‘Arumeiyaanyu anghuwa muhuwo okhuma enamwanaaya ntokotho yaapakaaya makholowaaya.’ Hiiho munootthuniheriwa omaka mweelaponi ya oGoxeni, niwoko akukhuli ootheene ari oonyoosiwa ni awExipitu.”

Currently Selected:

Epacerero 46: VMK2021

Highlight

Copy