Epacerero 44

Ekoomixi ya Yoseefe musaakhoni ya Benyamini

1Yoseefe aamulamulela mutokweene a vaatewawe: “Osarihe etrigu musaakhoni sa asilopwana ale, ni ohokoloxere musurukhu wa khula mutthu owanoni wa esaakhwaawe. 2Vahoolowaya ohele ekoomixaaka ela ya eyuuma yoorikaxa owanoni wa esaakho ya neetthaako, vamoha ni musurukhu owo olimvaaweno etrigu.” Mulopwana ole aapaka sootheene ntoko Yoseefe aamulamulenlaawe. 3Oxaawaya, axunna ale ni abuurwaaya yaaraxeliwa. 4Hiiho, nlelo ehinaaye orakamela esidade, Yoseefe aamweerela mutokweene a vaatevawe: “Waatthimakele woowaakuveya asilopwana ale ni waaphwanya, waweerele: “Heeni mwaakakhanyihalaanyu yooreera ni yoonanara? 5Mohiiya ekoomixi ya apwiyaaka, mwa yeeyo yaawurelaaya ni yaatthomaayano. Nyuwosa moopaka etthu yoonanaraxa!” 6Mulopwana ole aaphwanyakaru, aaphitela masu ale. 7Ale yaamwaakhula: “Heeni apwiya aneeraaya hiiho? Ottai wa arumeiyaaya opaka etthweene yeela. 8Moone, musurukhu hiyo naaphwannyaahu musaakhonimwahu, nohoohokoloxerani mweelaponi ya oKanaani. Ongwereya hayi wiiya itthu sa iyuuma soorikaxa sa vaate wa apwiyaanyu? 9Mmoha a hiyo aphwanyaniwa yeeyo, anaakhwe. Vano hiyo ootheene akina nnikhale ipottha sa Yoseefe.” 10Mulopwana ole aawaakhula: “Kinimwaakhulela. Nneere ha: Yoowo kineeraaka kimpwanyane ekoomixi, anaakhale epotthaaka, mene wa akina kheekhalano mulattu.” 11Khula mutthu a yaawo aakuruxa esaakhwaawe, anataphula. 12Mulopwana ole aakungura apaceraka wa mutokweene mpaka wa mukhaani, anaphwanya ekoomixi musaakhoni ya Benyamini. 13Vahoolowaya awosa yaahaahula soowarasaya, enawelihatho isaakho mwaabuurunimwaya, enahokoleela osidade. 14Yuda ni axunneiye yaaphiyaaya vaate wa Yoseefe, owo nlelo aari weiwo. Vano awosa yaahiikuhera vathi ohoolowawe. 15Yoseefe aahaakoha: “Mukipanke eheeni? Khamusuwenle weera miyo kinoowera oloha?” 16Yuda aamwaakhula: “Nneereke hai wa apwiyaaka? Nnihimekeni? Moota heeni nneeraahu nooviriyeleni weera hiyo khaninono nthowa? Muluku oomwaleela nthowa na arumeiyaanyu. Vano noolikana weera nikhale ipotthasanyu vamoha ni yoowo ophwanyaningwe ekoomixaanyu.” 17Wa soothesene, Yoseefe aawaakhula: “Hata vakhaani nkimpaka etthweene yeeyo. Paahi yoowo ophwanyaningwe ekoomixaaka aneera akhale epotthaaka, mene nyuwosa muhokoleeleke vaate wa atithinyu mmuretteleni.” 18Yuda aamwaattamela anamweerela: “Dyoontte apwiyaaka. Muntthunihere murumeiyaanyu ola weera uulume nsu nimoha vamaithoniwanyu, ni muhikinyoonyeriwe muroolikanaru ni Farawu*. 19Apwiyaaka mwaanikoha weera nookhalano atithihu ni munnihu mukina. 20Hiyo naawaakhulani weera nlelo nookhalano atithihu oowuuluvaleene, mwanaya neetthaako amuyanre yuuluvanleene. Vano amunnawaawe a amayawe amoharu ahookhwa ni ola ohanle meekhaawe ni atithawe, annamusivela vancipale. 21Apwiyaaka mwaaweerela arummeyaanyu ala: ‘Mwakiruuhele wenno weera kimoone.’ 22Vano hiyo naawaakhulani apwiyaaka, weera mmiravo owo khawaawereya waahiya atithawe, niwoko aahiya, atithawe animookhwa. 23Apwiyaaka mwaanyeserera mweeraka: ‘Mwaahimuruuha munninyu neetthaako, khamungwera ohokoleela wenno. 24Nihokoleelakaru wa murumeiyaanyu, atithihu, naahaathalihera yeeyo apwiyaaka mwaahimalaanyu. 25Atithihu yaanirummaaya ohokoleelatho wExipitu weera nithume etrigu, 26hiyo naawaakhula: ‘Nnihokoleelewo paahi namukuxa munnihu neetthaako. Vano khoongwereya ophiya ohoolo wa mulopwana ole munnihu neetthaako aahikhala ni hiyo. 27Tthiri, murumeiyaanyu, atithihu, aneerenle: ‘Moosuwelasa nnenesene weera amwaaraka kaayaranne anamwane eeli paahi. 28Mmoha a yaawo oottakaneela ni kaaheera: ‘Vekhaikhai oonyaanyiwa ni mpaka olelo nkimmoona. 29Vano nyuwosa mwakaakha Benyamini olatho ni yamukhumelela erisa, namuuluvala ola anaakhwe moothananani.’ 30Tivawo, nahokoleela wa murumeiyaanyu, atithihu, nihimurowanne munnihu, yanoonaru atithihu, ehireere osiveliwa ni yoowo, 31yoona weera munnihu khakhanle ni hiyo, vano arumeiyaanyu eniyaatannyere atithaya okhwa moothananani. 32Ohiya hiiho, murumeiyaanyu ohaaroromeliha atithawe omulipano mmiravo aweerelaka: ‘Kaahooruuhelani ola, miyo nkikhaleno nthowa wa mmiravo ola mookuminimwaka wootheene.’ 33Tivawo kinoovekelaakani, dyoontte munghiye murumeiyaanyu akhale ntoko epotthaanyu vanipuroni na mmiravo ni mutthunihere weera owo ahokolowe ni axunneiye. 34Khoongwereya ohokoleela wa atithaka kihimukuxale mmiravo. Hoye, kihoone erisa eneera yaarweele atithaka.”

Currently Selected:

Epacerero 44: VMK2021

Highlight

Copy