Okhuma 20

Malamulo muloko

1Vano Muluku aahuuluma masu ootheene ala: 2“Miyo ti Yave Mulukwaanyu, mwa Yoowo ookhumihaleni wExipitu, elapo ya okaporo. 3Muhikhalane miluku sikina okihiya Miyo. 4Muhiipakele ecaambulo ya miluku sikina mulikanxeraka yakhalaru etthu eri wiirimu hoye hoye vathi, naari mmaahini. 5Muhikokhorele seiyo naari muhilape, niwoko Miyo, Yave Mulukwaanyu, ti Muluku a ehace. Miyo kinaattaruxa anamwane niwoko na soottheka sa asitithaya mpaka ekhapira yanaararu ni yanaaxexe ya yaawo ankithanya. 6Vaheera kinaakosoopa ni onnene wa mahuku ootheene yaawo ankisivela ni aneettela malamulowaaka. 7Muhinyemule Nsina na Yave Mulukwaanyu niwoko vekhaikhai Yave onimuttaruxa yoowo onnyemula Nsinanawe. 8Muupuwelele nihuku na eSaabadu mutteelihaka. 9Mahuku mathannamosa a khula esimana mvareke mitekosanyu sootheene, 10mene nihuku nanaathannameeli ti eSaabadu ya Yave Mulukwaanyu. Nihuku nno muhivareru muteko nyuwo, hata anamwaniinyu asilopwana naari asithiyana, hata arumeiyaanyu asilopwana hoye hoye asithiyana, naari axinamaanyu, hata anamarwa ankhala musidadenimwanyu. 11Vano wa mahuku mathannamosa Yave aapattuxa erimu ni vathi, ephareiya ni sootheene siri mwemmo, mene nihuku nanaathannameeli aahiitthuuwa. Tivawo Yave oreelinghaawe nihuku nanaathannameeli atteelihaka. 12Mwaattiitiimihe atithinyu ni amayinyu weera woorakameleni okumi mweelaponi Yave Mulukwaanyu onoovahaaweni. 13Muhiive. 14Muhiraruwe. 15Muhiiye. 16Muhikhale namoona oowootha a mukhwiinyu. 17Muhiinlele vaate wa mukhwiinyu. Muhimwiinlele mwaara a mukhwiinyu, naari epottha elopwana hoye hoye ethiyana, naari emombaawe, hata buurwaawe, naari sakhalaru itthu sikina sa mukhwiinyu. 18Atthu yoonaka etari, overinya ni mwaako wookhuneeliwa ni mwiixi, ni yiiwaka oruma wa nipalapatta, yaatuthuwa, enathukumela. Yaarakamela, 19emweerelaka Moisesi: “Nyeenyuweene muulume ni hiyo ni nnimwiiwa. Muluku ahuulume ni hiyo weera nihikhwe.” 20Moisesi aaweerela atthu: “Muhoove. Muluku orweenle owootani murima weera woopiha wa Muluku okhale ni nyuwo owooceelihakani ottheka.” 21Atthu yaari erakamelelo, mene Moisesi aahaattamela nihutte nooripihana aaraawemo Muluku.

Ekano mwaha wa altaari* a Yave

22Vano Yave aamweerela Moisesi: “Mwaaleele aYixrayeli: ‘Nyuwo mohiixoonela weera Miyo kohuuluma ni nyuwo wiirimu. 23Muhipake miluku sa eparatha* naari eyuuma yoorikaxa weera mukilikanxerele. 24Mwakitekele altaari* a etthaya ni mwa yaawo mukipakeleno sooveleela soohisa ni sa murettele, eyo tiiyo ikhondoolosanyu ni imombesanyu. Weiwo kineeraka kitthunihere ovuwihiwa Nsinanaka, kinimoorweelani ni kinimooreelihani. 25Mwakitekela altaari* a maluku, muhaateke ni maluku ooraatteliwa, niwoko ni ikaruma munimwaahiiriha altaari*. 26Muhaawele ni ixikada altaaraaka* weera etiriyaanyu ehooneye.’”

Currently Selected:

Okhuma 20: VMK2021

Highlight

Copy