Okhuma 21

Ikano mwaha wa ipottha

1Mwaathalihere aYixrayeli ikano iya: 2‘Mwathuma epottha muHeberi, eyo yoovareleni muteko iyaakha ithannamosa. Vano eyaakha yanaathannapiili etapuxiweke, ohitthuneyaka oliva etthu. 3Yarwa moothupani, epwaheke yootapuxiweene moothupani. Vaheera yarwa yootheleene, mwaaraya erowekeno. 4Apwiyaaya yavaha muthiyana ni owo aayarano anamwane asilopwana hoye hoye asithiyana, muthiyana owo ni anamwanaawe eniikhale a apwiyaaya; epottha paahi eniipwahe yootaphuweene. 5Wa soothesene, epottha eyo yeera: ‘Miyo kinnaasivela apwiyaaka, amwaaraka ni anamwanaaka ni nkintthuna opwaha ootaphuweene, 6apwiyaaya eroiheke wa aphuki. Erongheke vamulako hoye hoye vaseremuni ni ethoroleke naarunaya. Hiiho epottha eyo eniikhale ya apwiyaaya wa mahuku ootheene. 7Mutthu amuthumiha mwaniye muthiyana ntoko epottha, owo kharwa atapuxiwa ntoko ipottha ilopwana. 8Epottha eyo ethiyana yaahimusiveliha pwiiyaaya, atthunihereke weera eyo yoopoliweke. Ehithumiheriweke anamarwa, niwoko ti pwiiya okattannye wiiwanana. 9Vano apwiyaaya yamuthanlela mwanaya epottha eyo, epwattheke ntoko mwanaya muthiyana. 10Mwaana a pwiiya owo amuthela muthiyana anaaveeli, ahimukhootteleke oopacera yooca, ikuwo ni sookwanela sa vatthokoni. 11Mulopwana owo aahikwanihera soonyesererihiwa tthaaru iya, vano muthiyana oopacera owo apwaheke ootaphuweene ahilivaka etthu.

Ikano mwaha wa nipuhero ni irisa

12Yoowo onimuvulaliha mukina mpaka okhwa, vekhaikhai, iiviweke. 13Wa soothesene, aahipaka mwayiini, yapakeya ni erisa, atthaweleke nipuro Miyo kineeraaka kimoonihere. 14Mukina uupuwela omwiiva mukhwaawe mwayiini, mumvenxe valtaariniwaka* weera iiviwe. 15Yoowo onaamana atithawe hoye hoye amayawe, vekhaikhai iiviweke. 16Yoowo ommwiiya mukina anamuthumiha hoye hoye anaphwanyaniwa, vekhaikhai iiviweke. 17Yoowo onaalapha atithawe hoye hoye amayawe vekhaikhai iiviweke. 18Asilopwana eeli yawana ni mmoha amvulaliha mukina ni nluku naari ecipakhira, mene oomaniwa aahikhwa anummaathi, 19vano yoowo ovulalinghe khathorihiwa oomaniwa avenya anapacera weetta ni muttontto. Wa soothesene, owo amuliveke ehuhu oyeleenlaawe wiixaasera ni amukhavihereke mpaka olama. 20Mulopwana avulaliha epotthaawe elopwana hoye hoye ethiyana ni muruputtho enakhwa, attaruxiweke. 21Vaheera epottha yavira mahuku meeli hoye hoye mararu ehikhwiiye, ahittaruxiweke yeenre ekhalaka yawawe. 22Akina yawana enamvulaliha muthiyana oorupala enamutathiha aahikhalano makacamiho, namapahula aliveke yeeyo aneeraawe anyeserere iyawe muthiyana ole attharaka olakela wa aphuki. 23Yakhala makacamiho matokotoko, waakakhanyihiwe okumi ni okumi, 24niitho nniitho; niino nniino; ntata ni ntata; nnaawo ni nnaawo; 25ohisa ni ohisiwa; nikhwatta nnikhwatta, aani omana ni omaniwa. 26Mulopwana apwexa niitho na epotthaawe elopwana hoye hoye ethiyana ehinoona, owo atapuxeke okaporwaaya niwoko na niithonaya. 27Akhula niino na epottha elopwana hoye hoye ethiyana, owo atapuxeke okaporwaaya niwoko na niinonaya. 28Emombe elopwana yamuhoma mulopwana hoye hoye muthiyana mpaka omwiiva, eyo evonyiweke maluku mpaka okhwa ni khoontthuniheriwa okhuura enamaaya. Wa soothesene, muneene a emombe eyo khakhalano mulattu. 29Wa soothesene, emombe yaari yaakhovelenle ohoma ni mwaneene asuwenleene ahinatthuka, ni emombe eyo enamwiiva mulopwana hoye hoye muthiyana, vano emombe evonyiweke maluku ni muneenetho iiviweke. 30Wa soothesene, muneene anyesereriwa oliva, oopoleke okumaawe alivaka yeeyo onnyesereriwaawe. 31Nthorihelo nna nivareliweketho muteko emombe yamuhoma mmiravo hoye hoye mwaamwali. 32Emombe yahoma epottha elopwana hoye hoye ethiyana, vano muneene a emombe eyo amuliveke ixekeli* miloko miraru muneene a epottha ni emombe evonyiweke maluku. 33Mukina athipa nlitti ahinakhuneela ni yamorelamo emombe elopwana hoye hoye buuru, 34muneene a nlitti aliveke yoolamuliwa; amulivaka muneene a mwaamunama ni amuhalaneke mwaamunama ookhwa. 35Emombe elopwana ya mukina yavulaliha emombe ya mukhwaawe ni yiiva, ethumihiweke emombe ekumi ni ekawaneke musurukhu eriyariru ni mooteene yoowo enama yookhwa. 36Wa soothesene, emombe elopwana yaari yaakhovelenle ohoma ni muneene ahinatthukelela, owo aliveke emombe ekumi ahalaneke yookhwa.

Currently Selected:

Okhuma 21: VMK2021

Highlight

Copy