Okhuma 14
14
Otthimakela wa awExipitu
1Vano Yave aamweerela Moisesi: 2“Mwaalamule aYixrayeli weera evenye akonenlaaya ni yakonele woowaattamela oPi-Hahiroti, eriyari ya oMigedoli ni ephareiya. Ekoneleke mukerekhere ephareiya okhopela oBahal-Zifeyoni. 3Farawu* onimuupuwela: ‘aYixrayeli anxoraxora oopupurumeene erukureeriweene nikare.’ 4Vano nkuumihe murima wa Farawu* ni owo onimwaatthimakela. Wa soothesene, Miyo nkittottopeliwe mwa Farawu* ni anakhottwaawe ootheene, ni awExipitu ootheene anoosuwela weera Miyo ti Yave.” Vano aYixrayeli yaapaka hiiho. 5Aathaliheriwa mwene a wExipitu weera aYixrayeli aatthawa. Farawu* ni anamalakaawe yaaceendya soowuupuwelasaya yeeraka: “Nipankeni? Nohaatthunihera aYixrayeli orowa ni vano nooyeleela ipotthasahu!” 6Hiiho Farawu* aarumiha olikanxiwa ekaarwaawe ya ekavalu*, anaarowano anakhottwaawe. 7Aakuxa ikaaro sa ikavalu* macira mathannamosa sooreerela vamoha ni ikaaro sa ikavalu* sootheene sikina sa wExipitu; khula ekaaro ni mutokweene. 8Yave aahuumiha murima wa Farawu*, mwene a wExipitu, ni owo aahaatthimakela aYixrayeli, mwa yaawo yeetta moowinani. 9awExipitu ni ikavalu*, ikaaro sa ekhotto sootheene sa Farawu*, vamoha ni anamweettiha a ikavalu* nitho anakhotto yaavenya yaatthimakelaka aYixrayeli. Vano yaahaaphwanya yaakonenlaayawo mukerekhere ephareiya ya oPi-Hahiroti, okhopela wa oBahali-Zifeyoni.
Olapuwa ephareiya
10Farawu* awaattamelaka, aYixrayeli yaaweha, enawoona awExipitu yaarweelasaka. Yaahoova vancipale, enamukhuwelela Yave. 11Yaamweerela Moisesi: “Yaahaleela mahiyaahu wExipitu muniruuhenlaanyu weera nikhwe munikareni? Munipankeni munivenxaka wuuwu? 12Hiyo nireene nlelo wExipitu naahooleelani: ‘Munihiyeke nikhale ipottha sa awExipitu. Fataari naari ipottha sa awExipitu ohikhanle okhwa munikareni!’” 13Moisesi aaweerela: “Muhoove, mminye murima ni moone olelo ovuluxa wa Yave. awExipitu mungwoonaanyu olelo khamurwa ngwoonatho. 14Yave onoowana aweerelakani nyuwo – mweereke omaala paahi!” 15Vano Yave aamweerela Moisesi: “Nyuwo munkikhuwelela heeni? Mwaaleele aYixrayeli weera epwaherere!” 16Mutheteye ekopwaanyu ni mookolele moonowaanyu mphareiya ni maahi anookawanyeya weera aYixrayeli elapuwe vatthayani yoowuumeene. 17Wa soothesene, Miyo kinimuumiha mirima sa awExipitu ni awosa animoottharelelani. Kinimwaakhela ovuwa moomphwatani Farawu*, anakhottwaawe ootheene, ikaarosawe sa ekhotto ni anamweettiha a ikavalu*. 18awExipitu anoosuwela weera Miyo ti Yave kaavuwihiwaka moomphwatani Farawu*, ikaarosawe sa ekhotto ni anamweettiha a ikavalu*.” 19Vano ndyelo a Muluku aahoolela anakhotto a aYixrayeli aavenya, anaakhalela ottuliwaaya. Hiihotho nrimbu na mahutte naavenya ohoolowaya, nnaakhalelatho ottuliwaya 20variyari wa awExipitu ni aYixrayeli. Nrimbu naaruuhela epiphi wa awExipitu ni waara wa aYixrayeli. Hiiho awExipitu khayaawenre owaattamela aYixrayeli ohiyu wootheene. 21Vano Moisesi aahookolela moonowaawe mphareiyani ni Yave aakawanyiha ephareiya, anatatuxa etthaya yoowuuma ni epheyo etokotoko yaaweela ninkhuma nsuwa yoopale ohiyu wootheene. Maahi yaakawanyeya 22ni aYixrayeli yaalapuwa ephareiya vatthayani yoowuuma sireene ixiri sa maahi moono mulopwana ni muthiyana. 23awExipitu yaahaattharelela ni ikavalu* sootheene, ikaaro sa ekhotto ni anamweettiha a ikavalu* sootheene sa Farawu* mpaka eriyari ya ephareiya. 24Oxiiyeene Yave aawona anakhotto awExipitu vanrimbuni na mahutte ni mooro ni aahaarukureerihasa nyuru. 25Aakhuliha mareko a ikaarosaya moota wooweera yaakhalano makacamiho ooweettiha. Vano awExipitu yaaheerelana: “Nrowe naatthawe aYixrayeli! Yave ongwana ni hiyo aweerelaka yaawosa!” 26Vanonto Yave aamweerela Moisesi: “Mookolele moonowaanyu mphareiyani weera maahi yaakhuneele awExipitu, ikaarosaya sa ekhotto ni anamweettiha a ikavalu*.” 27Moisesi aahookolela moonowaawe mphareiyani ni nsuwa nikhumaka ephareiya yaawalana. awExipitu yaatthawaaya yaakumana maahi ni Yave aahaamirengha mphareiya. 28Maahi yaakhuneela ikaarosaya sa ekhotto, anamweettiha a ikavalusaya* nitho anakhotto ootheene a Farawu* yaattharelenle aYixrayeli mpaka mphareiya. Khawowo aahanle ni okumi. 29Vaheera aYixrayeli yaalapuwasa ephareiya yeettaka vatthayani yoowuuma sireene ixiri sa maahi moono mulopwana ni muthiyana. 30Nihuku nne Yave aahaavuluxa aYixrayeli mmatatani mwa awExipitu ni aYixrayeli yaawoona awExipitu ookhweene mphareiya. 31aYixrayeli yaahoonasa ikuru sitokotoko sa Yave aawananaka awExipitu, yaamoova Yave ni yaamuroromela Yoowo nitho murumeiyaawe Moisesi.
Currently Selected:
Okhuma 14: VMK2021
Highlight
Share
Copy
Want to have your highlights saved across all your devices? Sign up or sign in
Makhua Shirima Bible © Christelike Lektuurmaatskappy NPC, 2021.
