Okhuma 13

Otteelihiwa wa matthaara

1Yave aamweerela Moisesi: 2“Mukitteelihere matthaara ootheene. Khula ntthaara na muloko ti nawaka; khaahiyono paahi atthuru, menetho axinama.” 3Vano Moisesi aaheerela muloko: “Muupuwelele nihuku nna nyuwo mwaakhumalaanyu wExipitu, elapo ya okaporwaanyu, niwoko Yave ohookhumihani iwe ni ntatanawe nooweraxa. Muhiceru yooheliwa eferementu. 4Nihuku nna na mweeri wa Abibi, nyuwo mookhuma. 5Yave oovoleihakani mweelaponi ya aKanaani, aHiti, awAmori, aHivi ni aYebusi, vano muupuwelele opaka efesta mweereene yoola. Ti elapweene yeeyo Owo aaroromelinghaawe ni nlipelo makholowaanyu weera aarwa woovahani; elapo yoosareya oravo ni mukaka. 6Wa mahuku mathannameeli muceeke epaawu yoohikhalano eferementu ni nihuku nanaathanameeli mumpakele Yave efesta ela. 7Muceeke epaawu yoohikhalano eferementu wa mahuku mathanameeli awo. Ehiphwanyaneyeru yookhalano eferementu variyariwanyu, hata ehikhaleru eferementu mweelaponimwanyu. 8Nihuku nno khula mutthu amweereleke mwanawe mulopwana: ‘Kimpaka hiiha, niwoko na yeele Yave okipakenlaawe kaakhumaaka wExipitu.’ 9Eyo eniyookhaleleni eneneero mmatatanimwanyu ni yoowuupuwelela vayuuciwanyu, weera Nlamulo na Yave nikhale vayanoniwanyu, niwoko Yave ohookhumihani wExipitu ni ntatanawe nooweraxa. 10Mukwanihere ikano iya ehuhu emoharu yeeyo wa khula eyaakha. 11Vahoolo woowoovoleihani Yave mweelaponi ya aKanaani ntoko oororomelinghaaweni ni nlipelo nyuwo ni makholowaanyu, ni woovahani, 12vano muntteelihere Yave ntthaara na khula engyariwa. Mwaxaana napunci a mihuwo sootheene ti a Yave. 13Matthaara ootheene a abuuru yoopoliwe ni eputtiputthi, mene mwaahitthuna woopola, vano mwintake exiko. Moopoleletho matthaara ootheene a anamwaniinyu ni eputtiputthi. 14Muhoolommo anamwaniinyu yookohani: ‘entaphulela eheeni yeela?,’ vano mwaaleele: ‘Yave onikhuminghe wExipitu, elapo ya okaporo ni ntata nooweraxa. 15Farawu* aakhoottaawe ni murima woowuuma weera nipwaheke, Yave aahiiva matthaara ootheene wExipitu, okhuma a atthu mpaka a axinama. Tivawo nnimveleelelaahu Yave khula napunci mwaaxaana a ntthaara ni nnoopolela matthaaraahu malopwana ootheene.’ 16Eyo eniyookhaleleni eneneero mmatatanimwanyu ni yoowuupuwelela vayuuciwanyu, weera Yave oonikhumiha wExipitu ni ntatanawe nooweraxa.”

Ottimula wa aYixrayeli

17Farawu* aatthuniheraawe muloko orowa, Muluku khaavirihale mpatta wa aFilisti yaarookhalaru ephiro yoothikila, niwoko Muluku eenre: “Awosa yavolowa mukhottoni, kapena eniirukunuwe, ehokoleelaka wExipitu.” 18Hiiho Muluku aahaarukureeriha aYixrayeli munikareni ekuxeraka ephiro enrowa Ephareiya Yooxeera. aYixrayeli yaavenya wExipitu oolikaneene owana. 19Moisesi aakuxa makhuva a Yoseefe, niwoko Yoseefe aahaalipeliha anamwane a Yixrayeli aweerelaka: “Vekhaikhai Muluku anookhaviheraseni ni ehuhuweene yeeyo ekuxeke makhuvaaka nno.” 20aYixrayeli yaattimula oSukoti, enakonela wEtami, mukerekhere nikare. 21Othana Yave aakhala ohoolowaya ni nrimbu na mahutte weera aweettihe mphironi, ni ohiyu ni nrimbu na mooro weera aamwaleele. Hiiho yaangwera weetta othana ni ohiyu. 22Nrimbu na mahutte ni nrimbu na mooro naakhala ohoolowaya ehuhu yootheene.

Currently Selected:

Okhuma 13: VMK2021

Highlight

Copy