Okhuma 15
15
Ecipo ya Moisesi
1Vano Moisesi ni aYixrayeli yaamwiipelasa Yave ecipo ela: “Kinimwiipela Yave niwoko ti oowina moovuwani. Oovonyera mphareiya ekavalu* ni namweettihaaya. 2Yave ti ikurusaka ni ecipwaaka; ti ovuluxiwawaka. Owo ti Mulukwaaka ni nkimuttottopele; ti Muluku a atithaka ni kinoomvuwiha. 3Yave ti Nakhotto; Nsinanawe ti Yave. 4Owo oovonyera mphareiya ikaaro sa ekhotto ni anakhotto a Farawu*. Ephareiya yooxeera yaahaamira asitokweene ooreerela a anakhottwaawe Farawu*. 5Maahi oowiixera yaahaakhuneela; aaneela woowiixa ntoko nluku. 6Ntatananyu noolopwana, Yave, naari noovuwihiweene mooweraxani. Ntatananyu noolopwana, Yave, nohaanyaanya amwiittana. 7Moowinanimwanyu otokotoko mohaaphwata amwiittanaanyu. Moorumiha isarasanyu soovarela ni iyo sohaahisa ntoko malaxi. 8Ngwiya woolipa wa mphulanimwanyu waathukumanya maahi; maahi oowuupa yaari ntoko exiri. Maahi oowiixera aavaraana mmirimani eriyari ephareiya. 9Mwiittana aahiihima: ‘Nkaattharatthare; nkaaphwanye; nkakawanye soohuhula ni nkaanyaanye. Ni ekatanaaka nkaahonone.’ 10Nyuwotho mohiiseelela mphareiya ni eyo yohaakhuneela. Aaneela ntoko eyuuma yoolemela mmaahini oowiixera. 11Taani a miluku sikina ori ntoko Nyuwo, Yave? Taani onlikana Nyuwo? Mutokweene mootteelanimwanyu; ooweraxa mmutekoni woovuwa, Muneene a sootikhiniha. 12Munookola moonowaanyu mulopwana ni elapo enaamira. 13Moosivelanimwanyu muneettiha muloko mooponlaanyu; mukurunimwanyu munrongha vaNipuroniwanyu Nootteela*. 14Miloko sinniiwa ni sinthukumela; othanana onnaavara aFilisti. 15Asitokweene a wEdomi anoopopiheya; asitokweene a oMowabi woohaavara woova ni yaawo amanke oKanaani aatteenguwa. 16Woova ni otteenguwa ongwuuwela yaawosa. Ni ikuru sa moonowaanyu ankhala ooweemeleene ntoko nluku mpaka ovira mulokwaanyu, Yave, mwa yoowo muthummaanyu. 17Nyuwo mmwivolonghe ni mmwiphattheye vamwaakoniwanyu wa yoohiyeriwa; elapo Nyuwo, Yave, mpakenle wookhalawaya; Nipuro Nootteela* matataanyu atenkaaya. 18Nyuwo Yave munlamula wa mahuku ootheene.” 19Ikavalu*, ikaaro sa ekhotto ni anaweettiha a ikavalu* sa Farawu* evolowakaru mphareiya, Yave aahaakumanyihera maahi a ephareiya. Vaheera aYixrayeli yaalapuwa ephareiya vatthayani yoowuuma.
Ecipo ya Miriyami
20Vano Miriyami, mprofeeti muthiyana ni murokoriye Aharoni, aakuxa ekoma ni asithiyana ootheene yaamutthara, yiipaka ikoma ni yiinasaka. 21Miriyami aawaakhulela iipaka: “Mmwiipele Yave, niwoko oowina moovuwani. Oovonyera mphareiyani ekavalu* ni namweettihaaya.”
Maahi a oMara ni wElimi
22Vahoolowaya Moisesi aaweettiha aYixrayeli okhuma Ephareiya Yooxeera mpaka munikareni na oXuri. Yaaheetta mahuku mararu munikareni ehiphwanyaka maahi. 23Yaaphiyasa oMara, mene khayaawera owura maahi a mwemmwe, niwoko yaari oowaawa. Tivawo nipuro nne nniitthaniwaaya oMara. 24Vano muloko waapacera omuttaandawula Moisesi weeraka: “Niwureni?” 25Moisesi aamukhuwelela Yave ni Owo aamuthoonyera nthatu noowuuma. Moisesi aavonyera mmaahini ni awo yaathatuwa ooreera. oMara Yave aahaavaha aYixrayeli ikano ni malamulo ni aawoota murima, 26aweerelaka: “Nyuwosa mwamwiiwelela Yave, Mulukwaanyu, ni mwapaka yeeyo onaakhulelaawe ni mwiiwelela malamulowaawe muttharaka ikanosawe sootheene, nkoorumihelasani hata eretta emoha sa seiye kaarumihenlaaka awExipitu, niwoko Miyo ti Yave onoolamihani.” 27Vahoolowaya yaaphiyasa wElimi yaaraayawo anaattuuttu muloko neeli a maahi ni mavare miloko mithannamiili. Vano yaakonelasa vamaaheene yaale.
Currently Selected:
Okhuma 15: VMK2021
Highlight
Share
Copy
Want to have your highlights saved across all your devices? Sign up or sign in
Makhua Shirima Bible © Christelike Lektuurmaatskappy NPC, 2021.
