Okhuma 12
12
Okhalihiwa wa mPaska*
1Yave aamweerela Moisesi ni Aharoni wExipitu: 2“Mweeri ola okhaleke mweeri woopacera wa eyaakhaanyu. 3Mulamule muloko wootheene wa aYixrayeli weera vanihukuni nanaamuloko na mweereene yoola khula mutthu a nyuwosa athanle eputtiputthi emoha hoye hoye epuri wa emusaawe; emoha wa khula etthoko. 4Emusi ekina yaahaatta atthu wa mwaamunama mpurukuma, ameelaneke ni mwaattamanaawe okhuveelananxaawe, attharihaka waatta wa atthu ni ongweraawe okhuura khula mutthu. 5Mwaamunama oothanliwa akhaleke mulopwana a eyaakha emoha oohirakala hata ekhalaka eputtiputthi naari epuri. 6Amuthokororeke mpaka nihuku na naamuloko ni maxexe na mweereene yoola ni aarooka oveleeliwa ni muloko wootheene wa aYixrayeli, nsuwa nineelaka. 7Vano atthu ekuxeke ephome vakhaani ya mwaamunama iiviwe, ettikittheleke musereemuni soorakama ni yookhuveya sa masele a impa mwemmo eneeraaya ekhuurelemo enama. 8Ohiyuweene yoowo ekhuureke enama eyo yoowooxiwa ni makukhu oonyuunya ni epaawu yoohikhalano eferementu. 9Muhikhuure enama ekithi hata yoowaapeiwa, mene yoowooxiwa – muru, nyetto ni marupo. 10Muhixeeleleru mpaka waaxiiye; yakhala enghala, muhise. 11Mwaakhuuraka mukhale oolikaneene ovenya: Laamba muyuununi; ngwanreene ikwakwaatta, ni ekopo mmatatani. Mukhuureke mwaakuvihaka. Ola ti mPaska* a Yave. 12Ohiyuweene yoowo kinooviravira mweelaponi yootheene ya wExipitu ni kinimwiiva matthaara ootheene okhuma a atthu mpaka a axinama. Nkaanyoke ni nthorihelo mwa miluku sootheene sa wExipitu. Miyo ti Yave. 13Ephome eniikhale eneneero yoothoonyera impa muneeraanyu mukhale. Miyo koona ephome, kinoopwaherera. Nihooxo na onyoka khanirwa noophwanyaani Miyo kaawiinlihaka awExipitu. 14Nihuku nno nikhaleke noowuupuweleliwa nyuwosa ni ekhapiraanyu. Khula eyaakha vanihukuni nno mmuupuwelele mumpakelaka efesta Yave, ntoko nlamulo noohimala. 15Wa mahuku mathannameeli ontthuneya weera muceeke ipaawu soohikhalano eferementu. Munihukuni noopacera mukhumihere vaate eferementu, niwoko yoowo aneera ace yakhalaru etthu yooheliwa eferementu okhuma nihuku noopacera mpaka nanaathannameeli anoomoliwe mwa aYixrayeli. 16Mulattule muthukumano wootteela munihukuni noopacera ni mukina nihuku nanaathanameeli. Muhivareru muteko mahukweene yaawo erehereriweke paahi yooca ya atthu ootheene. Ti yeeyo paahi mutthuniheriwaanyu opaka. 17Muupuwelele efesta eyo ya epaawu yoohikhalano eferementu, niwoko naari nihuku nenenenno Miyo khaakhuminghaaka anakhottwaanyu wExipitu. Muupuwelele nihuku nno ntoko nlamulo noohimala wa ikhapirasanyu sootheene. 18Wa mweeri woopacera muceeke epaawu yoohikhalano eferementu okhuma wiila wa nihuku na naamuloko ni maxexe mpaka wiila wa nihuku na naamiloko miili ni nimoha. 19Wa mahuku mathannameeli nyuwosa muhikhalaneru eferementu owaani. Yoowo anaace yakhalaru etthu yooheliwa eferementu, hata akhalaka namarwa naari muYixrayeli, anoomoliwe munlokoni wa aYixrayeli. 20Muhice yakhalaru etthu yooheliwa eferementu. Weiwo muneeraanyu mwamake, mwaceeke epaawu yoohikhalano eferementu.”
Nihooxo nanaamuloko: okhwa wa matthaara
21Vano Moisesi aawiitthana asitokweene ootheene a aYixrayeli, anaweerela: “Muthanle eputtiputthi hoye hoye epuri wa khula emusi. Mpake yooveleela weera nimuupuwelele mPaska*. 22Muruweye iphandi sa hisopo* mphomeni eneera ekhale mpasiyani, ni muttikitthele musereemuni sa masele. Ahikhale a nyuwo aneera akhume mpaani mpaka oxa. 23Yave aaviraviraka mweelaponi weera awiive awExipitu, onimoona ephome musereemuni sa masele ni onoopwaha mulakweene yoowo. Mwa yeeyo, khamuntthunihera namanyoka ovolowa mmampaanimwanyu weera awiivaseni. 24Mwiiwelele ikano iya ntoko nlamulo noohimala wa nyuwo ni ikhapirasanyu sootheene. 25Mwaavolowaka mweelaponi Yave ororomelinghaawe woovahani, muupuwelele efesta ela. 26Vano anamwaniinyu yookohasani: ‘Efesta ela entaphulela eheeni?’ 27Mwaathalihere: ‘Ti yooveleela ya mPaska* wa Yave, mwa Yoowo aaviravinre mmampaani sa aYixrayeli wExipitu ni uurenle impasahu Owo awiivaka awExipitu.’” Vano muloko waahuurama omulapaka. 28aYixrayeli yaarowa enapaka yeeyo Yave aamulamunlenlaawe Moisesi ni Aharoni. 29Vano, ohiyu eriyari Yave aahiiva matthaara ootheene a wExipitu, okhuma ntthaara na Farawu*, namukalampa, mpaka ntthaara na namatthukiwa aari mukaliposo, nitho a mihuwo sootheene. 30Ohiyu eriyari, Farawu* vamoha ni anamalakaawe ni awExipitu ootheene yaaheemela. Yaakhala ekuttho etokotoko wExipitu, niwoko khayaariwo empa ahaakhanlaawewo nookhwa.
Okhuma
31Ohiyuweene yoole Farawu* aalamulela wiitthaniwa Moisesi ni Aharoni, anaweerela: “Mukivenyere woowaakuveya wa mulokwaaka nyuwosa ni aYixrayeli. Muroweke mwamulape Yave ntoko mumvekelaanyu. 32Mukuxe mihuwosanyu ntoko mwaahimalaanyu ni mukireelihe miyotho.” 33awExipitu yaahaanyesereriha aYixrayeli weera evenye woowaakuveya mulaponi yeeraka: “Ootheene hiyo nnikhweeke!” 34Vano muloko waakuxa ephepa yooweetheiwa yahaaheliwe eferementu ni waathatela yeetheliwaayamo ehuruwenleene mukuwonimwaya. 35aYixrayeli yaahaakhulela nlamulo na Moisesi ni yaahaavekela awExipitu itthu sa iyuuma soorikaxa ni ikuwotho. 36Yave aatava mirima sa awExipitu weera ewoonihere onnene aYixrayeli, moota wooweera yaahaavaha yeeyo aYixrayeli yaavekenlaaya. Hiiho awosa yaahaahuhula awExipitu. 37aYixrayeli yaavenya oRamesese erowaka oSukota. Yaari wookwanaka asilopwana 600 000 ooweetta waahiya asithiyana ni anamwane. 38Nakupa mutokotoko a moota wootheene wa anamarwa aarongwe ni yaawosa, ohiya waatta wa mihuwo sa imombe, ikhondoolo ni ipuri. 39Vano, yaapaka ipaawu soohikhalano eferementu evarelaka muteko ephepa yaawaannaaya wExipitu. Ephepa yaari yoohikhalano eferementu, niwoko noowoomolasiwa wExipitu ehikhalanaka ehuhu yooreherera yooca. 40Vano ehuhu aYixrayeli yaakhalaaya wExipitu, yaari ya iyaakha macira maxexe ni miloko miraru. 41Nihuku yaakwaniheraaya iyaakha macira maxexe ni miloko miraru, anakhotto ootheene a Yave yaavenya wExipitu. 42Woonaka weera Yave aahaawehaweha aYixrayeli ohiyuweene yoole weera aakhumihe wExipitu, vano ontthuneya weera aYixrayelitho ewehaweheke mwa ikhapirasaya sootheene ohiyuweene yoola weera emuttittimihase Yave.
Ikano sa omvoleela mPaska
43Yave aamweerela Moisesi ni Aharoni: “Ikano sa mPaska* ti iya: Khoontthuniheriwa weera namarwa amuceno. 44Epottha yoothummwa emuceeke mPaska* yiineliwaru. 45Vaheera namarwa hoye hoye namuteko ahikhanle muYixrayeli ahimuce. 46Munceeke ntthoko nimoha paahi. Muhikhumihere vaate naari entthuri emoha hata muhipwexeru nikhuva. 47Muloko wootheene wa aYixrayeli ompakeke mPaska*. 48Akhalaru namarwa omanke variyariwanyu ontthuna ompaka mPaska* a Yave, awiineleke asilopwana a emusaawe yootheene. Vahoolowaya amuceekeno ntoko neethi a mulaponi. Ahikhale oohiineliwa aneera amuceno. 49Ikanosene seiya seetteliweke wa muYixrayeli ni namarwa omankemo.” 50Vano aYixrayeli ootheene yaapaka yeeyo Yave aamulamulenlaawe Moisesi ni Aharoni. 51Nihuku nenenenne Yave aahaakhumiha aYixrayeli wExipitu attharihaka mipatta soohiyanahiyana sa anakhottwaaya.
Currently Selected:
Okhuma 12: VMK2021
Highlight
Share
Copy
Want to have your highlights saved across all your devices? Sign up or sign in
Makhua Shirima Bible © Christelike Lektuurmaatskappy NPC, 2021.
