Okhuma 10

Nihooxo nanaathannaararu: Misoope

1Vano Yave aamweerela Moisesi: “Murowe wa Farawu*, niwoko Kohuumiha murimaawe ni mirima sa anamalakaawe weera kikwanihere sootikhiniha variyariwaya. 2Kinoopaka seiyo weera nyuwo ngwere waathalihera anamwaniinyu ni axisulwiinyu moota kaatheiyaaka awExipitu ni moota kaapakenlaaka sootikhiniha. Hiiho mmwisuwele weera Miyo ti Yave.” 3Moisesi ni Aharoni yaarowa wa Farawu* emweerelaka: “Yave, Muluku a aHeberi eenre ha: ‘Mpaka yaakhani mukhoottaka wiiyeviha ohoolowaka? Muhiyeke mulokwaaka weera wakilape! 4Mwaahitthunihera orowa, omaalo kinoorumihela misoope mweelaponimwanyu. 5Iyo osareyawaya sinookumanela mweelaponi mpaka oohooneya etthaya. Sinoowenya yeeyo ehanle vakhaani ya nihooxo na maralala nitho nyiri sootheene simphuwa ntuphini. 6Sinoosareya mmampaanimwanyu ni impa sa anamalakaanyu ni awExipitu ootheene; etthu ahitonkwaaya woona asitithinyu naari makholowaanyu okhuma nihuku yaaphiyalaaya mweelaponimu mpaka olelo.” Vano Moisesi aarukunuwa, anavenya wa Farawu*. 7Anamalakaawe Farawu* yaamweerela: “Mpaka yaakhani mulopwana ole aneeraawe akhale yoowoopopihaahu? Mwaatthunihere orowa weera yamulape Yave Mulukwaaya. Khamusuwenle weera elapo ya wExipitu ennaheleya mathala?” 8Hiiho Moisesi ni Aharoni yaaronghiwa wa Farawu* ni aaweerela: “Murowe mwamulape Yave Mulukwaanyu. Mene mukileelase: Taani anaarowe?” 9Moisesi aamwaakhula: “Ontthuneya waakuxa ootheene: asimiravo ni asitokweene, anamwaniihu asilopwana ni asithiyana, ikhondoolosahu ni imombesahu, niwoko ninkela ompakela efesta Yave.” 10Farawu* aamweerela: “Nyuwosa munoohaawela ekhavihero ya Yave miyo khootthuniherani orowa nyuwo ni anamwaniinyu! Wohooneya weera nyuwosa soowuupuwelasanyu siri moota mukina. 11Hata vakhaani! Eroweke asilopwana paahi weera yamulapeke Yave ntoko nyuwosa mvekenlaanyu.” Vano Moisesi ni Aharoni yaahoomolasiwa vamaithoni wa Farawu*. 12Mene Yave aamweerela Moisesi: “Mookoolele moono wExipitu weera misoope siwe mweelaponi yootheene ni weera siwenye mapoonda ootheene ni sootheene sihanle vahoolo wa maralala.” 13Moisesi aahookolela ekopwaawe wExipitu ni Yave aahoopiha epheyo mweelaponi eweelaka ninkhuma nsuwa nihuku nne ni ohiyu wootheene. Vano oxaawaya, epheyo ele yaaruuha misoope. 14Misoope saakwanela wExipitu wootheene ni aari nasope mwincipale aakwanenle mipatta sootheene. Khanakhale nasope, hata kharwa akhala. 15Saakwanela vathi wootheene moota wooweera elapo yaari wukaa. Saawenya sootheene saahanle vahoolo wa maralala – mapoonda ootheene ni soowiima sootheene sa nyiri. Khayaahanleru ekithi mmirini naari ntuphini mweelaponi yootheene ya wExipitu. 16Wowaakuveya Farawu* aarumiha wiitthaniwa Moisesi ni Aharoni aweerelaka: “Koomutthekela Yave, Mulukwaanyu ni kohootthekelani nyuwosa. 17Vano, mukileveleletho yootthekaaka ni mumvekele Yave Mulukwaanyu weera aronghe ottaiwaka nihooxo nna noowiiva.” 18Moisesi aavenya wa Farawu* ni aamvekela Yave. 19Yave aahoopiha epheyo etokotoko yaakhuma ninkela nsuwa ni eyo yaakuxakuxa misoope enavonyera mphareiyani yooxeera. Khawaahanleru musoope naari mmoha mweelaponi yootheene ya wExipitu. 20Yavetho aahuumiha murima wa Farawu* ni owo khaatthunihera aYixrayeli orowa.

Nihooxo nanaathannaaxexe: Epiphi

21Yave aamweerela Moisesi: “Mweemexere matata osulu ni epiphi enoosareya elapo ya wExipitu; epiphi yoohoonaniwa.” 22Moisesi aaheemexera matata osulu ni wa mahuku mararu yaakhala epiphi etokotoko mweelaponi yootheene ya wExipitu. 23Khaawo aawera woona etthu hata ovenya vanipuroniwawe wookwana mahuku mararu. Wa soothesene, aYixrayeli ootheene yaakhalano waara mmapuroni yaamankaaya. 24Vano Farawu* aalamula wiitthaniwa Moisesi amweerelaka: “Murowe, mwamulape Yave – mpaka asithiyana ni anamwane eroweke. Paahi ikhondoolosanyu ni imombesanyu sihaleke wenno.” 25Moisesitho aakhootta: “Nyuwo muneenaanyu munoonivaha axinama a sooveleela ni a soohisera weera hiyo namveleelele Yave. 26Ohiya toko hiiho, mihuwosahutho nnoorowano – hata mwaamunama mmoha khanghala! Ontthuneya waathanla akina a yaawo weera namulape Yave, Mulukwaahu, ni nihinaaye ophiya vanipuroni, khanaasuwela axinama heeni antthuneya waapaka sooveleela.” 27Yavetho aahuumiha murimaawe Farawu* ni khaatthunihera aYixrayeli orowa. 28Farawu* aamweerela Moisesi: “Mukivenyerewo va! Mwiipasoope weera muhihokoleele ovira va. Nihuku muneeraanyu mphiye varaaka, munimookhwa.” 29Moisesi aamwaakhula: “Onuukhale ntoko mweenraanyu: nkoonatho ekhovaanyu.”

Currently Selected:

Okhuma 10: VMK2021

Highlight

Copy