Okhuma 9

Nihooxo nanaathanu: Okhwa wa mihuwo

1Vano Yave aamweerela Moisesi: “Murowe wa Farawu* ni mwamuleele: ‘Yave, Muluku a aHeberi eenre ha: ‘Muhiye mulokwaaka orowaka weera wakilape. 2Nyuwo mwapwaherera ohiiha orowa ni wooceeliha, 3vano musuwele weera moono wa Yave onooruuhela nihooxo noowoopiha mihuwo sa Farawu* siri mmamattani: Ikavalu*, abuuru, ikamelu*, imombe ni ikhondoolo ni ipuri. 4Yavetho onoohiyanyiha mihuwo sa aYixrayeli ni sa awExipitu. Hata mwaamunama mmoha a aYixrayeli kharwa akhwa.’” 5Yave aavaha ehuhu: “Omaalo Yave onoopakela elapweene yeela yeeyo ororomelinghaawe.” 6Vano waaxawaya Yave aapaka yeeyo: Mihuwo sootheene sa awExipitu saahookhwa, vaheera wa aYixrayeli hata muhuwo mmoha khawaakhwiiye. 7Farawu* aarumiha owehawehiwa ni aahoonelela weera mihuwo sootheene sa aYixrayeli saari ni okumi. Hata hiiho, murimaawe waapwaherera wuuma ni khaatthunihera orowa muloko.

Nihooxo nanaathannamosa: Ithuku sootathareya

8Vano Yave aamweerela Moisesi ni Aharoni: “Munyoottole ettuura vaniikhoni ni Moisesi amwaramwaxele musulu ohoolo wa Farawu*. 9Eyo enoothatuwa ntoko ntthupi nootteettheya mweelaponi yootheene ya wExipitu ni ithuku sootathareya sinookhumelela mwaatthuni ni mwaaxinamani a wExipitu.” 10Vano yaanyottolasa ettuura ya muniikhoni, enarowano wa Farawu*. Moisesi aamwaramwaxela osulu ni ithuku sootathareya saapacera waakhumelela atthu ni axinama. 11Khaawo a anamacitta aawera ophwanyaneya aaraawewo Moisesi, niwoko yaasareya makhwatta ntoko awExipitu ancipale akina. 12Mene Yave aahuumiha murima wa Farawu* ni owo aakhootta omwaakhulela Moisesi ni Aharoni, ntoko Yave aamuleenlaawe Moisesi.

Nihooxo nanaathannameeli: Maralala

13Vano Yave aamweerela Moisesi: “Mpeherere ovenya, murowe wa Farawu* ni mwamuleele: ‘Yave, Muluku a aHeberi eenre ha: ‘Muhiye mulokwaaka orowaka weera wakilape! 14Mwaaheera hiiho, emaara ela, kinimoorumihelani mahooxowaaka ootheene ni anamalakaanyu ni mulokwaanyu weera nyuwo musuwele weera khawowo mukina ntoko Miyo mweelaponi ya vathi yootheene. 15Miyo kaangwera wookola moono koovulalihakani nyuwo ni mulokwaanyu ni mahooxo yeera ewiiveeni mulaponi. 16Mene Miyo koowuurelani mpaka vaanaanova keerelaka owooniherani ikurusaka ni weera Nsinanaka nilaleiwe mweelaponi yootheene. 17Wa soothesene, nyuwo nlelo munnyeserera wooceeliha mulokwaaka muhitthuniheraka orowa. 18Omaalo, ehuhuweene yeela, kinoorumiha epula ya maralala matokotoko ahitonko omorela mwExipitu, okhuma epaceriwaaya mpaka olelo. 19Vano, mulamulele okukhuleliwa mihuwosanyu ni sootheene murinaanyu mmatta weera siroihiwe mmwiikitthoni. Yaamoraka maralala, eniyaamorele atthu ni axinama ootheene eneera ehikhale mpuwa ni eniikhwe.” 20Anamalaka a Farawu* yoova nsu na Yave, yaahaakuveya okukhulela mpuwa ipotthasaya ni mihuwosaya. 21Vaheera yaale yahaapwatthenle nsu na Yave, yaahiya ipotthasaya ni mihuwosaya mmatta. 22Vano Yave aamweerela Moisesi: “Mweemexere moonowaanyu osulu weera emorele maralala mweelaponi yootheene ya wExipitu – mwaatthuni, mwaaxinamani ni mmapoondani ootheene a wExipitu. 23Moisesi eemexerakaru ekopwaawe osulu, Yave aahoopiha itari ni maralala, ni waakhala overinya. Hiiho Yave aamoroxela maralala mwExipitu. 24Yaamora maralala ni yannaaleleya erimu ni overinya mipatta sootheene. Kheenakhale ettheku ya maralala ntoko yeele wExipitu wootheene okhuma ethatuwakaru elapo. 25wExipitu wootheene maralala yaamorela sootheene sahaakhanle mpuwa, okhuma atthu mpaka axinama. Yaaphwata mapoonda ootheene ohiya ophwatiwa wa nyiri sootheene. 26Elapo ya oGoxeni paahi, yaaraayawo aYixrayeli, yahaamorenlaayawo maralala. 27Vano Farawu* aarumiha wiitthaniwa Moisesi ni Aharoni aweerelaka: “Emaara ela koottheka. Yave ti oororomeleya ni miyo ni mulokwaaka nookhalano nthowa. 28Mumvekele Yave, niwoko itari ni maralala a Muluku aatepa. Kinimoohiyani murowaka – khoontthuneyatho okhala mu.” 29Moisesi aamweerela: “Vaava kimvenyaaka, musidade, kinimweemexa matata kimvekaka Yave. Itari nsimaale ni kheemoratho maralala. Hiiho mmusuwele weera elapo ya vathi ti ya Yave. 30Koosuwelatho nnenesene weera nyuwo ni anamalakaanyu khamummoova Yave.” 31Vano eliinyu* ni esevada* yaaphwatiwa, niwoko esevada* yaathapuruwa ni eliinyu* yaamuttuva. 32Wa soothesene, etrigu ni esenteyo* khayaaphwatiwe, niwoko ti soopisa wiitthwa. 33Hiiho Moisesi aavenya wa Farawu*, anakhuma musidade. Aamweemexera matata Yave. Itari ni maralala yaamala ni epula yaamaaxa. 34Farawu*, oonaka weera epula, maralala ni itari yaamala, aatthekatho. Owo vamoha ni anamalakaawe yaahuumiha mirimasaya. 35Murimaawe Farawu* waapwaherera wuumihiwa ni owo khaatthunihera orowa aYixrayeli, ntoko Yave eenraawe mwa Moisesi.

Currently Selected:

Okhuma 9: VMK2021

Highlight

Copy