awEfeso 5

1Tivawo, mukhale anamatakiha a Muluku ntoko anamwane oosiveleya, 2ni mukhale moosivelani, ntoko Kristu onisivenlaawetho ni iivaherenre wa hiyo ntoko yoovaha ni yoowiiveleela yoomusiveliha Muluku. 3Variyariwanyu ohikhale hata wuuluma wa oraruwa, hata wa mukhalelo mukina wa ohitteela, naari wa wiinlela mihakhu, niwoko itthu iya khasintthuneya wa ootteela. 4Muhiromoletho masu oowuuliha muru, hata nyaha sa ololo, hata iperwa sa ohuureya siri soohiphwanelela. Ohiyanawaya, muulumeke masu ootthapela. 5Vano nyuwo musuweleke nnenesene yeeyo: Khaawo namahuureya, hata oohitteela, naari namwiinlela mihakhu (eyo tiiyo olapa miluku sikina) anaakhele omwene wa Kristu ni Muluku. 6Ahikhale anoolokottheni ni masu a siiyo. Siri niwoko na itthusene seiyo isara sa Muluku sinaakhuruwela atthu oohiiwelela. 7Tivawo, muhipake itthusene seiya vamoha ni yaawo. 8Vano, khalayeene mwaari epiphi, mene vano muri waara mwa Apwiya. Mweetteke ntoko anamwane a waara, 9niwoko yoowiima ya waara eri oreera murima, ororomeleya, ni ekhaikhai. 10Mwaase osuwela yeeyo enaasiveliha Apwiya. 11Muhiiraaneke ni miteko sihiniima sa epiphi. Ohiyanawaya, moonihereke iyo ntoko sa epiphi. 12Vano, hata oromola seiye awo ampakaaya mpiphini ti soowuuliha muru. 13Vaheera sootheene sinkuxiwa mwa waara, sinthatuwa soowooneya, 14niwoko waara ommwaleela itthu sootheene. Tivawo yeeriwaaya: “Muvenye, nyuwo munkona, muvenyerere mookhwaani, ni waara wa Kristu oniwoomwaleeleni.” 15Mwiipasoope ni mweettelowaanyu – khaahiyono ntoko alolo, mene ntoko asuweli, 16mvarelaka muteko nnenesene ehuhu yootheene, niwoko mahuku ala ari oonanara. 17Tivawo, muhikhale alolo, mene musuwele ti heeni otthuna wa Apwiya. 18Muhihapaliwe ni eviinyu, niwoko mwemmo wookhalamo olavilavi, mene muhiye woosareyeni Munepa, 19muulumaka variyariwanyu ni masalmu ni icipo soohiyanahiyana sa Munepa, mwiipaka ni mwaattottopelaka Apwiya, 20muntthapelaka mahuku ootheene Muluku Atiithi wa itthu sootheene mwa Nsina na Apwiyaahu Yeesu Kristu. 21Mwiiwelelaneke mukina ni mukhwaawe moomoovani Kristu.

Sootthuneya sa oothelana

22Axaara, ngwiiweleleke asiiyinyu ntoko wa Apwiya, 23niwoko mulopwana ti muru wa muthiyana, ntokotho Kristu ti Muru ni Mvuluxa wa ekerexa, eri erutthwaawe. 24Hiiho, ntoko ekerexa emmwiiwelelaaya Kristu, ewiiweleleketho axaara asiiyaya mwa soothesene. 25Asilopwana, mwaasiveleke axaarinyu ntoko Kristu osivenlaawe ekerexa ni ohiixinnyerera wa yeeyo 26weera atteelihe, arapihaka ni maahi niwoko na masu, 27ni weera yiixoonihere wa Yoowo mwaneenaawe ntoko ekerexa yoovuwa woohikhala malepa, naari makunyantta, hoye hoye etthu yoolikana, mene yootteela ni yoohikhala ni nthowa. 28Mooteene yoowo, asilopwana ontthuneya weera yaasiveleke axaaraya ntoko erutthwaaya. Yoowo onimusivela mwaariye, oniisivela mwaneenaawe. 29Vekhaikhai, khaawo otonke othanya erutthwaawe. Ohiyanawaya, owo onoociha ni onookosoopa, ntokotho Kristu ompakaawe ni ekerexa, 30niwoko nri mipatta sa erutthwaawe. 31“Tivawo, mulopwana anaahiye atithawe ni amayawe, ni anaathukumane ni mwaariye, ni ooweeli awo eniithatuwe erutthu emoha paahi.” 32Nno ti ntikhinelo noowiixera, mene kinghima wa Kristu ni ekerexa. 33Wa soothesene, khula mulopwana a nyuwo amusiveleke mwaariye ntoko mwaneenaawe, ni mwaara amuttittimiheke iyawe.

Currently Selected:

awEfeso 5: VMK2021

Highlight

Copy