awEfeso 4

Omoharu wa erutthu ya Kristu

1Ntoko ootthukiwa mwa Apwiya, kinoodyoonttelelani weera mweettele mukhalelo woophwanelela wiitthaniwa mwaakhenlaanyu. 2Mukhale oowiiyevihaxa, oomaala murima, oopixa murima, muvilelanaka moosivelani. 3Mwiilipihere weera muthokorore omoharu wa Munepa ni yookumanela ya murettele. 4Yookhala erutthu emoharu ni ori Munepa mmoharu paahi, mooteene yoowo ntoko nyuwo mwiitthaniwaanyu mwa nroromelo nimoha paahi, 5ari Apwiya amoharu paahi, nroromelo nimoharu paahi, opatiso omoharu paahi, 6Muluku mmoharu paahi ori Atiithi a ootheene, wa ootheene, ni mwa ootheene. 7Vano, wa khula mutthu a hiyo oovahiwa mahala mwaha wa muringo ovahiwe ni Kristu. 8Tivawo ehimmwalaaya: “Awelakaru wiirimu, yaakuxiwa ootthukiwa ottuliwawe ni aahaavaha atthu samahala.” 9Nsu neenre “Awelakaru” nintaphulela ni ekhaikhai weera, ehinaaye yeeyo, Owo aakhuruwelatho moowiixera wa etthaya. 10Owo aakhurungwe ti Yoowo aawenle osulu erimu yootheene weera asarihe itthu sootheene. 11Vano Owo ohaathanla akina weera ekhale arummwa, akina maprofeeti, akina anamalaleiya a masu ooreeraxa, akina akukhuli, ni akinatho ahusiha. 12Hiiho aatthuna waarehererela ootteela mutekwaaya, weera erutthu ya Kristu ekhale yoowunnuwihiwa, 13mpaka hiyo ootheene niphiye wa omoharu wa nroromelo ni wa omusuwela Mwaana a Muluku, ni mpaka niphiyetho wootokweeneni nikwaniheraka muringo wookwanela wa Kristu. 14Hiiho hiyo khanikhalatho anamwane, nikuxiwe wa mpatta mukina ni mukhwaaya ni mitekuteku, hata khannoopeliwa wa nno ni iwe ni epheyo yootheene ya mahusiho makina, naari niwoko na soovaanela soolokottha soowootha sa atthu anaathweeleliha akina mphironi ya ekhaikhai. 15Ohiyanawaya, nittharaka ekhaikhai mwa osivela, hiyo ninunnuwa mwa sootheene mwa Yoole ori muru, eyo tiiyo Kristu. 16Ti mwa Yoowo erutthu yootheene enkhalaaya yoolipeene, ekumanihiweene ni mikumano sootheene, ni enunnuwaaya, nitho eniipuhihaaya mwaneenaaya moosivelani, mipatta sootheene sivaraka mitekosaya.

Mweettelo wa anamwane a waara

17Hiiho miyo kinooleelani, ni mwa Apwiya kinnanyeserera, weera muheettetho ntoko amalapo, aneetta mwa soowuupuwelasaya sa siiyo. 18Soowuupuwelasaya siri sooriipihiweene, ni awo aamwalamwaxiwa ni okumi wa Muluku niwoko na ohisuwela ori mwa yaawo onrweela wa wuuma mirimasaya. 19Atthweene yaawo, eriheiyeene soowuupuwela sa nnene, yaahiiveleela moohuureyani, epakaka ni ohiisuumaaliha murima mikhalelo sootheene sa ohitteela. 20Wa soothesene, khamuxuttenre nyuwo mooteene yoola omusuwela Kristu. 21Mwa yeeyo, nyuwo mohiiwa yuulummwaka ya Yoowo ni mwa Yoowo mooxuttihiwa mwaha wa ekhaikhai eri mwa Yeesu. 22Vano, mwaha wa mweettelo wa khalayi, nyuwo mwaaxuttihiwa weera mwiirule wa mutthu a khalayi, oniinanariha ni soohaawela soolokottha, 23weera sitatuxiwe sinyowani soowuupuwelasanyu sa mmunepani, 24ni weera mungwaretho mutthu munyowani, opakiwe weera alikane ni Muluku moororomeleyani ni muntteelihoni na ekhaikhai. 25Tivawo khula mutthu a nyuwo ahiye wootha ni uulume ekhaikhai wa mukhwaawe, niwoko ootheene nri mipatta sa erutthu emoharu yeeyo. 26Nyuwo mwaanyoonyiwaka, muhittheke. Ni ohiile nyuwo nlelo munyoonyiweene, 27nitho muhimvahe nipuro Satana. 28Yoowo iiya, ahiiyetho. Ohiyanawaya, avare muteko, apakaka etthu yootthuneyaxa ni matataawe weera akhalane etthu yoomvaha yoowo ori moohaawani. 29Ehikhume mmwaanomwanyu masu oonanara, mene masu paahi angwera waapuhiha akina ntoko entthuneyaaya weera yaavahe mahala yaale aniiwa. 30Muhithananihe Munepa Wootteela wa Muluku, mwa Yoowo nyuwo mohiiyaatheriwa eneneero wa nihuku na ovuluxiwa. 31Mwiixoopole wa soowaawa, owali, onyoonyiwa, waakhulana, waapa, nitho wa soonanara sootheene. 32Mureerelane murima mmorelanaka ikharari mukina ni mukhwaawe, mulevelelanaka ntoko Muluku oolevelenlaaweni mwa Kristu.

Currently Selected:

awEfeso 4: VMK2021

Highlight

Copy

Compare