Vafilifi 3

Tutë a tutë

1Mpeoayo raunaanë, vane yanji mukhatë kunë Müküü. Uandëka mantu ayayo ayayo kunë nyenye ëtiung'utëye nene, ëgweeso ëgumunoneya nyenye.

2Mwighoje nyenye aghonjo na mbwa, ighoji na anyautenda mantu në mavë ighoji na vasaa nëvëuëta ihungu. 3Gusoko sese gwendie ihungu ra tütë, nëgumukurya Muungu mung'ë a nkho, na ugikumajua mukhatë amwa Kiristo Yesu, na gutiëkie maghonje mu mwërë. 4Mbesa nene mughonjo nëkweti soko gusoko a ighonje mu mwëërë noo. Nësa muntu woong'e ungëja ugughema mweeso ukweti soko gusoko a ighonje mu mwëërë nene nëkweti nanguu. 5Natuwe ihungu naarë naficha matiku munana, nene në Mwiisiraeli, wa ugënyamwango gamwa Benjameni, në Mweburania na nafafiwe na afafi vane vaIburania voong'e. Na gwa ukwatëra Serialii nene në Mufarisayo, 6arë në tintare urëkhasya Kanisa, na gwa tutë nëëguhangëka gwa ukwatëra seria, nene arë ntikweti ihondwë. 7Ëgweeso asaa në arë sao kunë nene, nayavariye mwino ti gëntu gusoko amwa Kiristo. 8Në tutë nëvariye mu gëntu mwino ti gëntu gusoko a uja në ukëëye oong'e wa umumanya Kiristo Yesu Müküü wane. Gusoko akwe nakhasëkie na nayaghaye mantu oong'e, na nayavariye asaa mwino gënyanji, gusoko nëdahe umuhanga Kiristo, 9na nëdahe ugëghea kunë mweeso, ntikweti tutë anë mughonjo, nëëgighea gwa seria, ëgweeso ukërëa uhuvëi kunë Kiristo, tutë asëë ufuma kunë Muungu në gwa uhuvëi gutufu. 10Uvii nene nëdahe umumanya mweeso na udaho wa ufëtyo wakwe, na nëdahe ukhuvëa makhasëko akwe, na nëkhwe na mweeso mu ikuya rakwe, 11në mbesa yudahëka nëdahe ufikëa ufëtyo wa ufuma gwa akuyi.

Nëëdurie nëfëke ugooli

12Ntiugihanya mwino nene nadahie ufika nampa nadahie utendeka nëkhondekie, ëgweeso nëëhinënkëye nëhume nëhange ngaa a uhumi, gusoko Kiristo wantendie në wakwe mughonjo. 13Aruna ane, nene ntiugigheemanëeya mwino nadahie uhanga, ëgweeso intu rëmwedu nëëngurëtendaa, a nëëwe asaa nëëunyuma ane na nene nëëntende ijaino nëfikëe asaa nëëusonge. 14Uvii nëëdurie nëëghookie ugooli gusoko nëëhume na nëhange mwampefo, në Muungu wanjëitanëe ukëërëa Kiristo Yesu. 15Vasaa mukhatë itu nëgwakhamugi munkhoo inoneye gugheme vii. Ëgweeso nëmbesa mughema angëja, Muungu ugudaha umukunukwëya nyenye laa. 16Gutufu nëgukwatëre lii tutë asaa nëgwayahangie.

17Aruna ane, mung'onge nee, vategheeyi vasaa nëvahongete wikhori në uja në sese gwamufie nyenye. 18Gusoko vaingë, namukhanëe nyenye ërëi mëhinjo mëëngë khae, na itungwee ngusukëa ayai itambëmwedu na mihori, duvi mwino arughu va ikuya ra mwa Kiristo ra unto amusalaba. 19Veeso mpeo ao vëjëumoto wa arungu va makhaa, gusoko Muungu wao në malëwa a mëërë ao. Veeso vëjaghumbue na wëjaghumbue wao ujie utendeka mënyaa ao, na veeso vëughema gutufu mantu a mu urëmi urui. 20Ëgweeso sese mëkhao itu ëgirunde, na sese ngumwiindëëre mutyoi witu, Müküü Yesu Kiristo. 21Mweeso ujie ufeura mwërë witu wa ulegheeku udahe ugikhwa na mwërë wakwe wa utako, mweeso wina udaho wa ufeura mantu a mu urëmi woong'e atendeke ëguutemi wakwe.

Currently Selected:

Vafilifi 3: RNT

Highlight

Copy