Vafilifi 2

Winyumpi na üküü wamwa Kiristo

1Uvii nësa gwina ufefeheeyi woong'e mukhatë amwa Kiristo, uyanjo nëwijue ufefeheeyi, ukhuvëi woong'e wa Mwahu, wonei woong'e wa uvai na gëhe. 2Ijurëëyi uyanjo wane gwa utendeka mwina ihaa rëmwedu, mwina uyanjo rumwedu mwina nkhoo ëmwedu na nkümbü ëmwedu. 3Mutatende gëntu mpa gëmwedu gwa gikërya mba gwa gëdida, ëgweeso gwa winyumpii ësë muvaghema antu vangëja vaja nanguu ukëra nyenye aghonjo. 4Mu muntu mukhatë anyu ataraave gutufu mantu akwe mughonjo, ëgweesonoo mantu a vangëja. 5Tendeki mwina ihaa ërëëro ërëro mukhatë anyu unë naa rë mung'ë amwa Kiristo Yesu. 6Në mbesa arë mweeso në mbukaaminë akwe në Muungu, ë ainavarya ugikhoa na Muungu gëntu ga unamantialii, 7ëgweeso mweeso mughonjo agagitenda ti gëntu agayanja uhoa wikhori wa mutughwa, agafafwa mu wikhori wa anaantu. 8Na naa wighea wë mwino muntu, agaginyumpya mughonjo na agatenda wina ikuryo faka ikuya, mbesa ikuya gunto a musalaba. 9Uvii Muungu agamuhumbua unto ino mweeso na agamufa mweeso rina rasëë nërëë unto a mu rina. 10Uvii gwa rina ramwa Yesu mu iru rinje utungama, girunde na gunto a ng'ë a fang'ë a ng'ë, 11na mu urëmë ugukumwua mwino Yesu Kiristo në Müküü gwa üküü wa Muungu Tata.

Weru wa Urëmi (Gwerya Mwino Weru mu Urëmi)

12Gwa uvii, ayanjwi vane, mwino nyenye mwatendie mwina ikuryo matiku oong'e, ti gutufu në nene nërëfo ëgweeso nanguu në nene ntifo. Utendei mwëmo utyoi wanyu aghonjo gwa goghofa na ukhakhata. 13Gusoko Muungu ugutenda mwëmo mukhatë anyu, gwa uyanji na utenda mwëmo gusoko a mafenji akwe në maja.

14Tendi mantu oong'e ti gwa unang'ana nambesa gwa ugikunguma. 15Uvii nyenye mudahe utendeka mutikweti inang'anwa na mwëvaeruchwe, vana va Muungu mukhatëkhatë a ufafo në wa gëdida na anyamahutye. Nyenye munoneye mweerye mukhatë ao mwino njota mu urëmi. 16Nyenye mukwatëre lii ukhani wa ufanga, gusoko mwitiku ramwa Kiristo nene nëdahe uhanga soko a gitenda mwino ntina mankhaa ndeende na ntinitumaa mwëmo ndeende. 17Mbesa nene ngumiminwa mwino saghami gunto a ikumbëko ra uhuvëi wanyu, nene nëyanjëte na nëyanjëte itambëëmwe na nyee nyoong'e. 18Viuyi viuyi nyenyenoo imunoneye muyanje na muyanje itambëëmwe na nee.

Timoteo nanë Efafurodito

19Nene nina ighonje mukhatë a Müküü Yesu umutuma Timoteo kunë nyenye urë, gusoko nëdahe uyanjëswa na sayu anyu. 20Nene ntikweti muntu mba umwe në wë mwino mweeso, në winjë tutë uhanga nkumbu gusoko a warëëyi wanyu. 21Antu voong'e vëufenja mantu ao aghonjo, tiëse ayoo në amwa Yesu Kiriso. 22Ëgweeso nyenye mumanyie ükümu wamwa Timoteo, mwino mwana itambëëmwe vina ihe ëgweeso watendie mwëmo itambëëmwe na nee gusoko a sayu në njija. 23Uvii nëghemete umutuma kunë nyenye uriino nëuma namanya mantu në ajie ung'anga. 24Na nene në huvëe kunë Müküü mwino gwa itungo ikufë nene mughonjo nejie noo. 25Nene naghemie mwino inoneye umutuma Ëfafurodite kunë nyenye muuna ane na mutenda mwëmo muyane na musikee muyane, na mutumwa wanyu na mutumami wane gwa mantu në nene nguyafenja. 26Mweeso unyaghwëte ino aje umuona nyenye nyoong'e na ugukhasëka ino gusoko nyenye mwategheeya mwino chu mweeso arë uwaire. 27Në tuutë tuutë mweeso arë uwaire na arë wë fifë ukuya. Ëgweeso Muungu agamwonea mweeso uvai, na tiese gutufu kunë mweeso ëgweeso na kunë nene noo, taje nene nëje uhangwa na uvai unto a uvai. 28Gwa uvii, nene nëna nkümbü nküü umutuma mweeso, uvii nyenye mudahe uyanja gwa umwona mweeso kangë, na uvii nkümbü yane idahe uhira. 29Uvii musëngëyi mweeso mukhatë a Müküü gwa uyanjo në üküü. Raghëi gëhë gwa antu woong'e nëvëmwino mweeso. 30Gusoko mweeso agaduya ufanga wakwe na agahumbea ukuya gusoko a mwëmo wamwa Kiristo, gwa umarëëya utumami wanyu kunë nene.

Currently Selected:

Vafilifi 2: RNT

Highlight

Copy