Vafilifi 4

Maraghëëyo hiya hiya

1Gwa uvii, aruuna ane, në nëmwanjëte nëna nkümbü nküü gusoko anyu, uyanjo wane na ngaa ane, në mwëmëke sësë vii mukhatë a Müküü, anyanjwi vane.

2Ngumuromba, Euodia na ngumuromba Sintike, ëse vina isëgho rëmwedu kunë Müküü. 3Na nyenye noo, në mwina uhuvëi rumwedu ginanyu, ngufenja nyenye muvaarëye akhema vasaa. Gusoko veeso gwatendie mwëmo ukaakuno itambëmwe nanee wa utanantya Sayu në Njija, Kelemensi na antu vangëja voong'e në vatendie mwëmo, itambëmwe ginao në mina ao arëfo mugëtabu ga ufanga ga Muungu.

4Yanji mukhatë a Müküü matiku oong'e. Kangë nguhanya yanjëchi. 5Ufoo wanyu umanyëke na antu voong'e. Müküü wë fife uja. 6Mutagisaghëësaghëe gwa gëntu mpa gëmwedu, ëgweeso gwa mantu oong'e ëse mumuromba Muungu, na umwinenera gwa mihori itambëëmwe na urumba, mafenji anyu na amanyëke kunë Muungu. 7Na majëghana a Muungu, nëakëye umanyi woong'e, injë umughoja nkhoo yanyu na mahaa anyu kunë Kiristo Yesu.

Yaghemi mantu ayai

8Mpeo ayo, aruunane, asaa në atutë, asaa oong'e në akweti ukumu, asaa oong'e në atutë, asaa oong'e në asasëa, asaa oong'e në a uyanjo, asaa oong'e në amboto, nëmbesa gërëfo kangë nëgëkweti ikuryo, nëmbesa gërefo koong'e nëginoneye ukuriwa, ghemi mantu asaa. 9Mantu në mwisëiye ufuma kunë nene na mwayahangie na mwayategheeye na mwayaune kunë nene, yatendi; na Muungu wa majëghana ugutendeka itambëmwe nanyee.

Irumbi Gusoko a Vifewa

10Nina uyanjo üküü kunë Müküü chu itungwee mpeo ayo nyenye mwafëtya masëgho anyu kangë gusoko anë nyenye arë tutë munsëghanëye nene uduvi wane. Ëgweeso nyenye mwinahanga itungo. 11Tiese nene ngurighëëtya vii gusoko ngufenja gëntu, gusoko nene nisëiye nduve uyanja ong'e na udëa ufëfa mugëntu nënëgëkweti. 12Nene nëmanyie ginyumpya, na nëmanyie uhanga në maingë. Munduve oong'e na mantu oong'e nene nësëëye gëmpëhë gëkuta na uona njaa, uhanga mingë na ukefëwa. 13Nguyadaha mantu oong'e mukhatë akwe mweeso nëugumpaa nguu.

14Ëgweeso nyenye mwatendie ija nëmwakhuvëe makhasëko ane. 15Na nyenye Afilifi aghonjo mumanyie mwino chu mwandyo wa sayu në njija, naarë nahegha uMakedonia gutie kanisa nearingëe guukhuvëi itambëmwe nanee ufunya na ughenyifa, ëgweeso nyenye mwatufu. 16Gusoko nanë uTesaloniki nyenye mwandëtee nene waarëyë na tiese muhënjo umwedu. 17Tiëse nene ngufenja gëfewa; ëgweeso nene ngufenja nkhari nëigiongeya mu mari anyu. 18Nahangie mantu nëëjue na ukëanëya. Nahangie mantu nëijue nywee ufuma kunë Efafrodito vifewa në nyenye mwandëtee, munyuku wa makuta a musalaka dahwa, në ëyanjëtwe na a umuyanjësya Muungu. 19Na Muungu wane ugumufa mugëntu nëmugësëghëëte ugining'ana na ughwarë wakwe mu üküü mukhatë amwa Kiristo Yesu. 20Üküü utendeke kunë Muungu witu na Tata witu khae na khae. Amini.

Iramucho ra umpeo

21Varamuchi antu voong'e va Muungu mukhatë amwa Kiristo Yesu. Akiristo voong'e në gwëëtambëmwe nanee vëumuramucha nyenye. 22Antu voong'e në vëhafai vëumuramucha, ino vasaa nëvëutendaa mwëmo ukhaya mwa Kaisari. 23Mboto a Müküü Yesu Kiristo ikhae na nkhoo yanyu.

Currently Selected:

Vafilifi 4: RNT

Highlight

Copy