Akolosai 3

Uduvi në Ufya Mukhatë amwa Kiristo

1Nembesa nyenye mwafëtëye itambëmwe mwinaa Kiristo, yafenji mantu asaa nëëunto kunë Kiristo wikhee u mukhono wa gëlëko wa Muungu. 2Ëki masëgho anyu u mantu nëëunto ti ëse mantu asaa nëë mu urëmi. 3Gusoko nyenye mwakure, na ufanga wanyu ufihiwe itambëmwe na Kiristo kunë Muungu. 4Nëhikwi Kiristo në ufanga witu wadwëëra, na nyee noo mujie udwëëra itambëmwe gü üküü.

Uduvi wa khae na uduvi në ufya

5Uraghi uvii asaa në a murëmi në utendaa mwëëmo mukhatë anyu: uramatwë, uvaaya, uhunukwa, masëgho në mavë na uhunukwa gwëkhwete na ikuryo ra sanamu#3:5 Sanamu: Intu nërëtendiwe gwa mëkhono a antu nërëkhweti na intu rëngaja, ëgweeso ti ryeso. 6Gusoko a maantu asaa makuo a Muungu ëujaa guvasaa në vëumuhitaa mweeso. 7Mukhatë ayai nyenye aghonjo khae arë mwenenda nayo, itungo në nyenye arë muduvaa mukhatë ayo. 8Ëgweeso itungwee yajughuti asaa oong'e kuengëja: siimba, makuo, uvë utukana na nkhani ya uraghanëa itafume umëomo anyu. 9Mutagikhanëe uregheghe muntu na muyakwe, raavi mwino chu nyenye mwayue untu wa khae itambëmwe na ntendo yayo, 10na mwayaire untu në ufya, në ugutendwaa ufya mukhatë a mahaa winëng'ane ija na matunda wayo. 11Haafo gutie Muyunani nanë Muyahudi, utowa ihungu nanë undëa utowa ihungu, mughenyi, nanë musenji, mutughwa, na anya uhagharo, ëgweeso Kiristo në oong'e na mukhatë oong'e.

12Gusoko nyenye mwë antu va Muungu nëvëhwaniywe, veru nanë ayanjwi. Uvii inoneye nyenye oghonjo muyae nkhoo a gëonëa uvai, untu në uja, winyumpi, ufoo, nanë ughimëyi. 13Mwighiimëye mu muntu na muyaakwe nambesa, muntu ukweti ukhani na muyaakwe, amwonee uvai muyaakwe, mwino Müküü wamwonee uvai nyenye. Uvii inoneye nyenyenoo mwionee uvii. 14Na ukëra ayai oong'e yai uyanjo nëgëtungo mugëkaku gëntu itambëëmwe muuyanjo në ukhondekie. 15Na reki majëghana amwa Kiristo ateme u nkhoo yanyu, unë nyenye tutë mwaëtaniwe mung'ë a mwëërë umwe. Na ëse mwanya ufunya asi. 16Reki ukhani wamwa Kiristo wikhae mukhatë anyu gwa wingë, ëse mugisëya na ugihughua mu muntu na muyaakwe mukhatë a mahaa oong'e, na ëmbi saburi na nyëmbo na nyëmbo ya u nkhoo itambëëmwe na umurumba Muungu u nkhoo yanyu. 17Na mugëkaku gëntu në mugëtenda gwa ukhani na ntendo, tendi mu gëntu mu rina ra Müküü Yesu mu murumbe Muungu Tata ukëërëa kunë mweeso.

18Nyenye akhema, vategheyi aghosya vanyu mwino chu inoneye kunë Müküü. 19Aghosya, vayanji akhema vanyu na mutaje ëse mwakhai kunë veeso. 20Nanyee, vana vategheeyi afafi vanyu mu mu ugëntu, gusoko uyi uguyanjëswa Müküü. 21Nanyee vatata, mutavahumie makuo ana anyu, vataje uujuka. 22Nanyee atughwa vategheeyi mu gëntu vasaa në aküü vanyu va mu urëmi tiese mutende në vamuraavie u miho mwino antu në vëgilombia, ëgweeso tendi gwa nkhoo ëmwe gutufu ëse mu muoghofete Müküü. 23Mugëntu në mugëtenda, gëtendi, na nkhoo ëmwe mwino mu mutumëkëa Müküü na tiese a antu, 24mumanye mwino ufuma kunë Müküü nyenye mujie ufewa usai mwino genyamwëëmo ganyu, mu mutumikea Müküü Kiristo. 25Gusoko nëugutendaa në mavë ujie urëfwa në mavë në mweeso wayatendie, na haafo gutie ubaghui.

Currently Selected:

Akolosai 3: RNT

Highlight

Copy