Akolosai 2

Ngufenja Mumanye Mwino Natintare

1Gusoko nene ngufenja nyenye mumanye mwino natintaare gwa nguu gusoko anyu, na gusoko a avoo në va uLaodekia, na gusoko a voong'e nëvinanyoona usyu wane. 2Nkho yao idahe ufefeheywa mwino chu veeso vakhuvëe itambërëmwe muuyanjo, vahange ughwarë voong'e wa umanyi wa tutë na umanyi wa gëmpëhë ga Muungu uchu Kiristo, 3kunë mweeso ifihie mpamba yoong'e ya mahaa na umanyi. 4Nene ngumukhanëa nyenye, muntu nanë umwedu atamukhonge gwa nkhani ya uregheeghee. 5Nambesa nene ntiifo umwëërë, ëkëë nene nëitambërëmwe nanyëë mu unkhoo nanëyanjëte në chu nëkengee mufango wanyu uja na ukhamu wa uhuvëi wanyu kunë Kiristo.

Uduvi në ukhondie kunë Kiristo

6Mwino chu mwamughenyifie Kiristo Yesu Müküü, uvii mwëkhae mukhatë akwe, 7na ëse muhëmbëe miirë na mujengwe mukhatë akwe, na mutendeke mwakhamu mukhatë a uhuvëi wanyu, mwino chu mwasëëywe, na ëse mufunya asi.

8Raavi muntu nanë umwedu atamutendee nyenye atumwa gwa uregheeghe utufu wa mahaa a gëmuntu në afumie umasëyo agirëkea a antu na ufuma kunë mutemi wa nkho a inyonyinyonyi murëmi woong'e natiese ufuma kunë Kiristo. 9Gusoko mukhatë akwe ukhondeki woong'e wa Muungu ugikhaa mu mwëërë wakwe. 10Na nyenye mwafiwe ufanga në wijue nywe kunë mweeso, unë itwe ra utemi woong'e na udaho. 11Kunë mweesonoo nyenye mwatuwe ihungu nati ëse ihungu në ratendiwe gwa mëkhono, gwa uvëka kurengi mwëërë wa nyama mung'ë a ihungu ramwa Kiristo. 12Na nyenye mwaëkiwe itambëëmwe na mweeso mu ubadiso, në chu nyenyenoo mwafëtiye itambëëmwe mwinao u njëa a uhuvëi mu mwëmo wa Muungu, në wa mufëtëye mweeso ufuma gwa akuyi. 13Na nyenye, khae arë mukure gusoko a mahutye anyu na arë mwinatowa ihungu umëërë anyu Muungu agamutenda mwafanga itambëëmwedu na Kiristo, gwa uguonea uvai mahutye, itu oong'e 14agarëfaghua riandëko rasëë në arë rëugusitakaa sese itambëmwe na seria ayo në arë ëugudai uyi agamëjughuta unji, agamëkhoma nyeeso umusalaba. 15Mweeso agaiyunanga nguu ya atemi na aküü na utenda wikhori wao uchanya wa ginëhëya, na agavatenda veeso atughwa vakwe.

16Uvii mutamuyanjëye muntu nanë umwedu amuramwuëye nyenye umumawëyo a malëwa na a unywa, na soko sigunkuu, nambesa mweri në ufya nambesa Sabato. 17Ayai në mwimimi gutufu gu ayoo në ëjie. Ëgweeso tutë a mantu asaa në Kiristo. 18Mutayanje muntu mpa umwe amuheeye nyenye asi yanyu, gwa ususutëya winyumpi wakwe mughonjo, na ukurya va malaëka, ukwatëre na uëmëkëa ndoti, yakwe mughonjo na ugikumajua ndende gwa mahaa akwe a gëëmuntu, 19na atikwatire lii Itwe kunë chu mwëërë, woong'e, ugulëswa na ukhuvëywa itambëmwe na nongo yayo na mëërë, ugukua gwa ikua nërëfumie kunë Muungu.

Ukuya nanë uduva itambëmwedu na Kiristo

20Nyenye mwakure mwinaa Kiristo na mwakhomowe ufuma mu utemi wa nkho ya mu urëmi, asikë nëkëë nyenye muduva mwino chu nyenye mwë antu va mu urëmi urui? Asikë në nyenye mukwatëre seria? 21“Mutakwate, Mutatomie, Mutatenye,” 22(ëghokee maantu asaa oong'e ëuruëka në veeso vayatumëa) na muhongete maraghëëyo na masëyo a anantu në a ufutu? 23Na seria iyii igheete ikweti mahaa a tutë a musëngi wao wa utuntëya ukurya va malaëka na winyumpi wa uregheghe na utendea mwëërë makhasëko në makhai. Ëgweeso gutie sao a tutë a uumëya nkumbu iyii ya mwëërë.

Currently Selected:

Akolosai 2: RNT

Highlight

Copy