Yakobo 3

Keyiere nirrita lng'ejep

1Lalachera o nkanachera ainien, emincho lkumo linchi eaku laiteng'enak te nkanisa, amu iyielolo aajo kore iyioo ooiteng'enicho naa kedung'okini nkiguana nagol oleng. 2Amu kore tee iyioo pooki, ikias ake mbaa kumo naapong'o. Kake kore ilo lemeitopong tee rereii oojo, naa keisula neidim sii airrita koon too nkulie oito pooki. 3Ikindim aatipik mbartan senke nkutukie payie etum aatining iyioo, nikimerregel mechomo nikiyieu. 4Ng'ura sii aitoki melin, kore abaki era kutuaa oleng nekutaa lkutati kitok le nkare, kake nkini toki ake naata nateeyo, meeima ng'oji pooki neyieu larewani. 5Nejia sii etiu lng'ejep, nkini rubata ake te sesen kake kejo rereii sapuki oleng le nkikarra.

Keitarrap sii aitoki lkini milmiloi le nkima ntim nkima. 6Kore sii lng'ejep, naa inji etuwuana nkima. Kera rubata taatua rubat e sesen, naimu ntokitin torrok, neidim aitarruoi sesen pooki lo ltung'ani, neteoki nkichui enye pooki nkoitiei nalo nkima, neitami sii ninye nkima to lmoti le nkima. 7Kore nkajijik pooki ee ng'uesi, naaju o naasipa o ne atua nkare naa keitorei, neitoria ꞉ltung'ani ninche. 8Kake meatae ltung'ani oidim aitoria lng'ejep. Kera ninye ntoki torno nemeibooroi, nabore sayiet nayecho. 9#Ng'as 1:26Kore te ilo ng'ejep, ikisis Laitoriani oara Papa lang, nikidekie aitoki ltung'ana ooitibira ꞉Nkai te nkitanyanyukoto enye. 10Kore mayian o ldeket naa nkutuk nabo ake eing'uaa. Lalachera o nkanachera ainien, Meyiere payie eaku inji. 11Amaa, keatae lchorro oimu nkong'u nkare supat o nadua nkata nabo? 12Lalachera o nkanachera ainien, keidim lng'erriyio aatijing lcheni lo lng'aboli, tanaa lng'abolo aatijing lcheni lo lmusabibu? Meidim sii lchorro odua nkare aimunyie nkong'u nkare supat.

Ng'eno nagut naing'uaa chumata

13Kalo tung'ani taa ntae oara ng'en neata yielounoto? Nchoo eitodolu te lwuenet lenye supat asat enyena naas to mborron naing'uaa ng'eno nagut. 14Kake kore tiniatata lom torno nirara ltung'ana laa ne maate ake enya, emiinkar ake nisapsap ate aajo kebaki neatae ndedei niatata. 15Kore inia ng'eno, naa mara ng'eno nagut e Nkai kake ne nkop, mara ne Ltau Sinyati kake naa lairiruani. 16Amu kore neti lom torno nenya ltung'ana ne maate, naa ketii ng'olng'ol o mbaa pooki torrok. 17Kake kore inia ng'eno naing'uaa chumata, kore nekue naa keisinyati, neyau sii seriani o ng'iriata nening'icho, neata lng'er neiu lng'anayio supati, nemeata ngela nemeitaakino. 18Naa kore lantarara le sipata, naa keuni te seriani taatua lolo oaacham seriani.

Currently Selected:

Yakobo 3: saq

Highlight

Copy

Compare