Yakobo 2
2
Entalam ngela
1Lalachera o nkanachera ainien, emipik ngela nkurukoto e Laitoriani lang Yeso Kristo oata nkitoo. 2Amu tenelotu ltung'ani obo atua ntumo inchi oata lpete le saabu o nankan naapuyiapui, o tenelotu likae omena oata nankan naaiduruk, 3nintoomonmon ilo oichopito nankan supati, nijokiki, <<Towuana iyie tene ng'oji supat e nkanyit>>, kake nijokiki ilo omena, <<Ntacho iyie tende>> tanaa <<Towuana to nkop tankalo lorika laiteleki nkejek#2:3 Kore lorika laiteleki nkejek neitodolu ajo keata apa ltung'ana lorika owuenie o loiteleki nkejek. ainien>>, 4mara naa intodolutata ngela taatua ntae niakuku ltung'ana oaaya mbaa ana nadol taa mparrunot enche torrok?
5Eng'ura ja lalachera o nkanachera ainien nacham! Amaa, mara ketegelua ꞉Nkai laisinak tana kop metaa lparakuo to nkurukoto, neaku lootum nkitoria enye naitayia Nkai lekutuk ajo keicho lolo oaacham ninye? 6Kake miatata nkanyit taa laisinak! Mara dei lparakuo ooironyokita ntae nkop, neya ntae meiguanareki? 7Mara dei ake ninche lolo oodek Kristo, laa inia arna enye e nkanyit eipotieki ntae?
8 #
Lal 19:18
Kore tanaa imbung'utata ana kitanapata naaisul Nkitanapat pooki, inia najo Lkigerot, <<Tachama le latia ino ana koon>>, naaku iasitata mbae supat. 9Kake kore tanaa intodolulu taata ngela naaku iasitata ng'oki, naa keibala tee nkitanapat ajo irara lagilak loo nkitanapat. 10Amu kore pooki ng'ae oibung nkitanapat kake negil nabo, naaku keitorno ake ana lotigila pooki. 11#Nai 20:14; Nkit 5:18, Nai 20:13; Nkit 5:17Amu kore ilo otejo, <<Miloloito>>, ninye siake aitoki otejo, <<Miar metua.>> Naaku kore tinimiloloito kake niar metua, naa itaa lagilani loo nkitanapat.
12Naaku kore to pooki niroro o niasias, entaparru nchere kedung'okini ntae nkiguana te inia kitanapata e nchaman naa ninye nalaku ntae. 13Amu kore lemeata lng'ur, naa meing'urrieki sii ninye tenedung'okini nkiguana, kake keikitok lng'ur alang nkiguana.
Nkurukoto o asat
14Lalachera o nkanachera ainien, kaa tipat eata tenejo ltung'ani, <<Kaata nkurukoto>>, nemeitodolu taa asat enyena? Keitejeu ninye nkurukoto natiu nejia? 15Amaa tanaa keatae lalache tanaa nkanache nemeata nankan tanaa ndaa nanya, 16nejoki lobo linchi ninye, <<Enchom te seriani, enchopoto aaitibiraki ninyanya ndaa aaimu>>, kake nemeitoki inchocho naanya tanaa naaichop, nyo tipat e inia? 17Nejia sii etiu nkurukoto, kore tanaa meata asat naaku ketua.
18Kake keidim ltung'ani atejo, <<Keatae ltung'ani oata nkurukoto, neatae loata asat.>> Kake kore najo naa ana, <<Ntoduaaki ja ltung'ani oata nkurukoto nemeata asat, payie aaitodol nanu nkurukoto ai taa mbaa naas.>> 19Iruk iyie ajo kore Nkai naa nabo ake. Keisupat inia! Kore abaki lairiruani naa keiruk inia, kake neikirikira to lputukuny. 20Lotung'ani ele omada, iyieu nikintodoli aajo kore nkurukoto nemeata asat naa ketua? 21#Ng'as 22:1–14Amaa, mara keikenaki apa akuyia lang Abraam aajo loosipat payie ejo ntai layieni lenye Isaka metaa lasar te lperere la lasar? 22Keibala ajo kore apa nkurukoto e Abraam o asat enyena naa kepuo tenebo, naa kore asat enyena neicho nkurukoto enye meisula. 23#Ng'as 15:6, 2Ng'a 20:7; Isa 41:8Kore tankaraki natining'o ꞉Abraam Nkai, nebaya lolo Kigerot oojo, <<Keiruko ꞉Abraam Nkai, neikeni ninye aajo loosipat>>, neipoti sii aajo sotua le Nkai. 24Naaku idol naa ajo kore ltung'ani, naa taa asat eikeni aajo loosipat, namara to nkurukoto apeny.
25 #
Yoch 2:1–21
Kore sii aitoki, mara apa taa asat eikenaki milayoi naji Raab aajo neesipat, payie eitoomon lolo aikitalak ooterewuaki inia kop enche, neisigie meima nkae oitiei?
26Kore ana natua sesen lemetii nkiyeng'et, nejia sii etiu, kore nkurukoto nemeata asat naa ketua.
Currently Selected:
Yakobo 2: saq
Highlight
Copy
Compare
Share
Want to have your highlights saved across all your devices? Sign up or sign in
© 2021, Bible Translation and Literacy
