2 Petero 1
1
1Kore ana palai naa keing'uaa Simon Petero, oara laisiaayiani o Lkipaaret le Yeso Kristo.
Kairoroki ntae lolo oichoo ꞉Nkai meiruko ana mbae e tipat aajo, kore Nkai ang nara Laitejeunoni Yeso Kristo naa loosipat, ana ake taata nikiruk.
2Metoponiki Nkai ntae munyani o seriani, ipuopuo kue aayielou ninye o Yeso Laitoriani lang.
Mbulunoto taatua ng'eno e Nkai
3Keichoo iyioo Nkai pecheu to ngolon enye ntoki pooki nayieuni te nkichon, neichoo sii aitoki iyioo ntoki pooki nayieuni payie kitum aaturia Nkai to nkoitiei naiting'id ninye. Naa kore nkoitiei nikitumie inia, naa yielounoto e ilo oipoto iyioo te nkitoo o to ngolon enye. 4Naa kore te inia golon o nkitoo enye, neichoo iyioo lekutukie lenyena oata tipat nera kutuaa oleng. Paa kore tee nenia nitumtum aatang'ar mpukunoto e Nkai, indipa apa aailanya mutai natii ana kop tankaraki ng'uarrat.
5Naa kore tankaraki ana bae, entonyok entoponiki nkurukoto inchi lwuenet supat, niponikiki lwuenet supat yielounoto e rerei le Nkai, 6niponikiki yielounoto e rerei le Nkai nkubooroto e koon, niponikiki nkubooroto e koon ng'iriata, niponikiki ng'iriata uriata e Nkai, 7kore uriata e Nkai, niponikiki nchaman ee ltung'ana ooiruko Yeso, niponikiki nchaman ee ltung'ana ooiruko Yeso nchaman ee lkulie tung'ana pooki. 8Naa kore tanaa iatata kuna pooki, nebulaa taatua ntae, naaku miakuku ltung'ana oaachal lemeiu lng'anayio laa asat supati, kake iyielouu Laitoriani lang Yeso Kristo oleng. 9Naa kore lemeata kuna, naa medolicho aitibiraki, tung'ai abaki inia, kera modooni katukul, tankaraki ketirikine ajo keidipaki aaituko ng'ok enyena e apa.
10Kore naa tankaraki ana lalachera o nkanachera, mbae e tipat abaki oleng tininyoknyok aasipaki ate nchere keipoto netegelua ntae Nkai, naa kore tiniasias kuna, nimirriaa aikata. 11Amu teinia oitiei eicho ntae ꞉Nkai entijing nkitoria nemeiting e Laitoriani o Laitejeunoni lang Yeso Kristo pecheu.
Keisiligai naibon e Nkai
12Naaku kayieu chiaake naitaparru ntae kuna baa, abaki iyielolo ninche, nintachoto aipidaki taatua inia dedei naichooki ntae. 13Naa kajo keichiaakino payie ainyoyie ntae aitaparru kuna baa ewuon aichu, 14amu kayielo ake ajo ketaa payie aper, ana /naaibalakinyie Laitoriani lang Yeso Kristo. 15Naa kanyok paa kore abaki achomo nanu, naa ipuopuo ake aaparru kuna baa pooki.
16Amu mara nkatinin naatamawuaki ta ntakano nikirukurukore apa kimbalakinyie ntae ngolon naata Laitoriani lang Yeso Kristo o neiko ninye tenechukunyie kenya, kake ikira iyioo lootodua sipata e nkitoo enye. 17#Mat 17:1–5; Mrk 9:2–7; Luka 9:28–35Ketang'amayie ninye nkanyit o nkitoo ta Nkai Papa naata nkitoo naaisul pooki, apa payie ejo, <<Ana Nkerai ai nacham, naaiting'ida ninye oleng#1:17 Kore naaiting'ida ninye oleng naa keidimi sii aigero atejo naa ninye aichoo omom ai.!>> 18Naa kore iyioo, ikitining'okita ate ilo toilo oing'uaa chumata kitii tenebo o ninye to ldonyuo sinyati.
19Naaku ikiata abaki taata sipata oleng e lkilikuai oatamautua apa loibonok le Nkai. Naa keisupat taa ntae tining'orng'or inia natejo ninche, amu inji etuwuana ana lkilang'ilang'et oilu ta naimin ana meyeu wong'an e siran, neipung'u lakira le siran taa ltauja linchi. 20Kore narepaa pooki, keyiere niyielouu aajo meatae hoo naibon too Lkigerot sinyat nayewuo eing'uaa nduata ee loibonok le Nkai maate. 21Amu eitu aikata eibonicho tankaraki ake nayieu neibonicho, kake kore netiu, Ltau Sinyati otirikoyie ltung'ana meiroro ake inia naichoo Nkai meiroro.
Currently Selected:
2 Petero 1: saq
Highlight
Copy
Compare
Share
Want to have your highlights saved across all your devices? Sign up or sign in
© 2021, Bible Translation and Literacy
