2 Petero 2

Laiteng'enak le sapare

1Kake keatae apake loibonok le sapare taatua ltung'ana le Isirael, ana napuonu sii laiteng'enak le sapare atua ntae kenya. Kore lolo tung'ana naa keyaki ntae nkiteng'ena e sapare nayau mutai, neany abaki ilo Aitoriani oinyieng'ua ninche, neyaki ate mutai nairrachu ninche asioki. 2Keirukurukore lkumo mbaa enche e anyit, naa kore tankaraki ninche nedeki nkoitiei e ndedei. 3Kore to luboi enche, nenyok aaitorogony ntae taa natinin nemeti sipata aayayie ntae ropiyiani. Kake keanyita ake ninche ꞉nkiguana natudung'oka apa Nkai, nelotuta mutai enche.

4Amu eitu epal ꞉Nkai lmalaikani payie eas ng'ok, kake ketanag'aka ninche lmoti le nkima omisimis, eena tee senke neichooyo metumo nkiguana naitaanyuaki. 5#Ng'as 6:1—7:24Neitu sii epal ltung'ana otii apa ana kop lemeurie Nkai eitu edung'oki nkiguana torno, kake keirrita Noa ilo oara lalikoroni loosipat, o lkulie tung'ana sapa inia kata apa payie eicho nkare metumuta nkop. 6#Ng'as 19:24Nedung'oki sii lkerenket le Sodom o Gomora nkiguana torno neidakie metaa nkuron, neitaa nkitodolunoto e ntoki naanyita ltung'ana lemeurie ninye. 7#Ng'as 19:1–16Neitejeu ꞉Nkai ltung'ani oji Lot oara apa ninye loosipat oitemioto ltau lenye ꞉mbaa e anyit naasita lolo aitarruok. 8Ketowuana ninye taatua ninche era loosipat, neitemeito ꞉mbaa e anyit ltau naadolita nening'ito easita ninche mparri o mparri. 9Naaku mara keyielo naa ake Laitoriani neiko teneitai taatua ntemat lolo oourie ninye, neitaanyu lolo torrok mparri e Nkiguana, epikita ng'udi? 10Naa keiteme ꞉Nkai oleng lolo tung'ana torrok oopuoyie mpukunoto torno e ltung'ani eirukurukore ng'uarrat naayau mutai, nemen Laitoriani.

Kore kulo tung'ana naa meitoki eurie, mbaa enche ake eparraa nemeurie abaki edek lolo oaata nkitoo te chumata. 11Naa kore lmalaikani abaki egol neata nkitoo kitok alang kulo tung'ana, medung'oki lolo oaata nkitoo nkiguana e lmena tekue Laitoriani. 12Kedekicho kulo tung'ana taa mbaa nemeyielo. Naaku inji ake etuwuana ninche ana ng'uesi naatiwuaki ake payie eibung'i neri metuata, nemeitoki eparraa kake kemuso ake apeny. Kore ana naar ltung'ana ng'uesi metuata, kemut Nkai kulo tung'ana. 13Kore mion natum ninche naa inia nalaaki ꞉Nkai ninche tankaraki ntorno nataasa. Kecham ninche aataas mbaa naaiting'id seseni lenche eitache ndama. Kore tininyanya ndaa tenebo, nepik ntae rachat torrok, neitam ntae anyit eiting'id ate taa saparia enche. 14Ntomononi naasie loloito ake eyieita ninche nkata pooki nemeitirring'a eitu eas ng'oki. Kerruach ꞉ninche lolo oaachal metaasa ng'oki, netatakanikita ltauja lenche lubo. Naa kore tankaraki ana kediaa ninche. 15#Nki 22:4–35Ketung'aitie ninche nkiteng'ena nadede, nepong'ori aairukurukore nkoitiei e Balam layieni le Beor, oacham apa ropiyiani naalaki to ntorno naas. 16Kake keitaraki Balam kusaka tankaraki inia torno nataasa. Naa ana kusaka etumo ninye, nchere kore sikiria nemeyielo airoro ana ltung'ani, neiro ana ltung'ani aibooyo madai e ilo oiboni.

17Kore kulo tung'ana naa lchorroi ootimitete nera lopir le nchan ookutaa lkutati. Keitaanyuta ninche ꞉Nkai ng'oji netii naimin piid. 18Amu kore lolo tung'ana eimer too lomon lemeitoki, neirukurukore ng'uarrat e mpukunoto torno e ltung'ani, nesapaa lolo oaataa keilany ltung'ana oaas ntorrok metaasa mbaa e anyit. 19Kejoki ꞉ninche ltung'ana keata lakunoto naasie ntoki pooki nayieu neas, nera ninche maate rrindiki ooitore ꞉mbaa e anyit naamut kenya ninche. Amu kera ltung'ani rrindik le ntoki pooki namir ninye, neitore. 20Kore tanaa keilanya apa mbaa torrok e ana kop inia kata payie eyielou Laitoriani o Laitejeunoni lang Yeso Kristo, neitoki nenia baa torrok aarruach nerrek ninche, naaku kerroyo oleng netiu te siedi alang netiu apa tekue. 21Naikach apake teneitu eyeilou nkoitiei e sipata, alang teneyielou neitoki aaibelekenya aaing'uaa nkiteng'ena sinyati naitarasakaki ninche. 22#Rach 26:11Kore nataasa ninche naa ana nejoito kuna dung'eta e rache nchere, <<Kerrinyokino ldia rrugumat enyena>>, naa <<Kerrinyokino lbitir oitukoki aiperiperare sordo.>>

Currently Selected:

2 Petero 2: saq

Highlight

Copy

Compare