Rooma 6

Muutu o hayaatane ma Iisa Masi

1Oko keeke pa, ke beneyya pe kee me? Ke nowotta pe goŋŋakite aɗe ke lewɗo zunubgee ku maa ga Mella leeɗineega ta ƴiila gidaanuwti e? 2Kaw, keeke ay tirta ɗa. Keeta pa ay aleŋ giimi ku mattenta unco zunubgeyyo o gu lekkine ɗa payya gudirane maa gu hikimiyinne. Ke gederra ɗa payya ke nuntiɗo ke lewɗo zunubgee! 3E ku lekka ɗa kabarre kadar ga kee parattine ma baatemtine deero kappenta ma Iisa Masi o ke matteero sawa ma gata? 4Ay ma baatem appe ke deeɗe kappenta oko muutti o ke deeɗe saayenta ma gata, ku maa ga keeta kulla nunticca ma hayaatane ta marawta aleŋ tanti maa gi gudirane tee ta darjanti Tatti naɗiyya min aacco giimi ku mattenta. 5A gata pa, gaa keeta deero kaƴi ka ma Masi, kee mattiɗe ma muutu ma ay aleŋ kanti, ga ay ma tirta pe ke deewa kappenta ma gata oko naɗaw ma ay aleŋ tanti.

6Ke ibina kadar gi nuntitine ta tippa maa ke lewɗo miɗɗa taata maateero ma Masi wikinne maa gu paapiyya kuruwayi. Ay goŋŋa appe gi aŋko ta tirta tee ta liyaw diiman ta zunubgeyyo masilɗo maaƴi ku maa ke alɗo dee ɗa payya ta kaw lawweeco zunubgeyyo, 7asan gaa gimu maateero ma kappo ma Masi, ga pilkica paaɗe diigane ta zunubgeetee maa ga leewe. 8A mileŋ ke matteero ma Masi, ke amanne kadar ke deeɗo nunta kulla hayaatanti ma gata. 9A gata pa keeta lekka kabarre kadar ga Masi naɗe min aacco giimi ku mattenta, o ga mataa ɗa payya ta kaw, o ga muutu gederree ɗa payya. 10A gata pa ma muutti, ga iccica gudirane maa gu zunubgee hekemeyɗine, kaytiŋ ka o ga ta kaw. Haŋka pa ga aaye ma hayaatanti o ga nowotte pe oko Mellayi ka. 11A kunta pa kulla gagoŋga kayyeetoŋ kadar ku ay aleŋ giimi ku mattenta unco zunubgeyyo o gu zunubgee lekka ɗa payya gudirane maa gu hikimiyittoŋ. Gagoŋga kayyeetoŋ kulla kadar gi hayaatantoŋ ku nowottaca oko Mellayi asan ku kappenta ma Iisa Masi.

12Kaaka pa, ku aɗoŋ duwa ɗa gu zunubgee gederriyyo oko zeneetoŋ kooko ma matakka ku maa ku jobbiyya maa gu aŋka. 13Aɗaaniyo duwa ɗa oko nussaŋgee ku zeneetoŋ gu lewɗo zunubgee. Goneka kee gu deewa pe aleŋ jollee maa ga gimu lobokkiko oko ka ɗayaŋ ɗa. Kunta pa ay aleŋ giimi ma matteero, gaa haŋka pa ga Mella birittoŋ hayaatane. Goŋŋakite pa, ku biroŋgu zeneetoŋ oko Mellayi ka, guu nussaŋgeeco zeneetoŋ ku duwɗiy aleŋ jollee maa ga lobbikiko oko ka ɗayaŋ ka. 14Zunubgee gederratoŋ ɗa payya ta kaw mileŋ ku aaye ɗa payya picco hukumnigeetee Muusa, innasoo ku aaye pe pitti gidaanuwti Mellayi.

Gasso ta kayyeetine min zunubgeyyo

15Ke aaye ɗa picco hukumnigeetee Muusa, a innasoo ke aaye pitti gidaanuwti Mellayi. Oko keeke pa ke beneyya pe kee me? Ke leewa aɗɗe zunubgee? Ta kaw saa, ke leewa ɗa. 16Kuu lobokke oko gimi kuu joboɗɗiya kanti aleŋ lawwee, ku lekka kabarre kadar ku ay lawweetee oko gimu kaaka maa ku jobokkaa kanti. Kuu jobokka ka zunubgeyyo ku deewa lawweeco, guu issittoŋ muuti. Kuu jobokka soopa ka Mellayi, ga gata garaatoŋ ɗayaŋ unti. 17Leenee barkinti oko Mellayi, asan tippa ku ay lawweeco zunubgeyyo, gaa haŋka pa, ku gassiɗe giraane ma garaatoŋga botol ka jobbiti, gaa ma ka galbigeetoŋ paratti ku jobbiyya paaɗe. 18Ku gassiy kayyeetoŋ min zunubgeyyo, kuu deeɗe pe lawweetee Mellayi o ku leewa ka ɗayaŋ.

19Iŋeekite pa, na beneyya beneyyiŋgee ma raɗɗa ɗa ibinti oko giimo, asan gi mooyitoŋ ay ta giimo ka. A gata pa tippa, gu zeneetoŋ ku berewwiy lawwee oko gaari ma negekkatoŋ unti Mellayi o ma wagee ɗa ma hukumnigeetee. Kaaka pa, gi nuntitoŋ wagee ɗa ta kaw ma kee ka Mellayi. Haŋka pa kulla gu zeneetoŋ, ku dowwoŋgu pe aleŋ lawwee oko gaari ku ɗayaŋ ku maa gi hayaatantoŋ ku nunticca oko Mellayi ka. 20Wikinne maa ku alɗo lawweeco zunubgeyyo, gi liyaw ta gaari ku ɗayaŋ tapakkitoŋ ɗa. 21Ay ini me ka samaane maa ku gasseero min oko gaartoŋ kotti? Ku ecekke pe jaalo ka, asan gi dessico gaartoŋ kotti ay muutu ka pe. 22Haŋka soopa, ku gassiy kayyeetoŋ min zunubgeyyo, kuu deeɗe pe lawweetee Mellayi. Ka samaane maa ku gasseero pa ay gi hayaatantoŋ ku nowottaca ta ƴiila oko Mellayi ka. Maa ku sarakkee pa ku gassiyya, ay hayaatane ma gakamma ɗa ta kaw. 23Haggane maa gu zunubgee pelekka ɗe ay muutu, a maa ga Mella beraaca malan̰ soopa, ay hayaatane ma gakamma ɗa ta kaw asan ke kappenta ma Miltine kee Iisa Masi.

Currently Selected:

Rooma 6: mmy

Highlight

Copy