Rooma 7

Zunubgee o hukumnigee

1Seneeta, na beneyyatoŋ oko kuŋ ma ibiniy paaɗe hukumnigeetee Muusa. Kuŋ pa lekka kabarre kadar gu hukumnigee gederriyee oko gimi wikinniti maa ga alɗe mataa ɗa missa. 2Keeke pa, na garaatoŋga ma masaltí daate ma ecekke miiɗi. Gita pa onnenta ma hukumnigee ku jiizanti oko mittí wikinniti maa ga alɗe mataa ɗa missa. Gaa maate soopa, gi onnenta ɗa payya ma hukumnigee kotti ma kapakkiy. 3A innasoo, gii deero daatti oko miiɗi kaƴi wikinne maa ga mittí alɗe mataa ɗa missa, ga kaaka pa gi isse miiɗi. Wikinne maa gaa mittí maateero soopa, ga kaaka pa gu hukumnigee kotti ma onokkica ma gata lekkiti ɗa payya botol, o gi gederra gi icciɗo miiɗi kaƴi. Ma goŋŋakite pa gi isse ɗa miiɗi.

4Kantoŋ pa kulla seneetaw, katee ka ma keeke. Ku matteero sawa ma Masi. Ay kaaka appe gu hukumnigee lekkittoŋ ɗa payya gudirane ku maa gu hikimiyittoŋ. Goŋŋa ku gederra ku deeɗo pe koo ku gimu kaƴi, gata ma naɗeero min aacco giimi ku mattenta. Ke deero gimtee ku maa ke lubbiyyee ka samaane oko Mellayi. 5A gata pa tippa wikinne maa ke joboɗɗo kantine ka, gu hukumnigee meneeneeca aŋko ta liyaw ta zunubgeyyo. Aŋko taata pa, lobokka nussaŋgee ku zeneetine ku maa ke lewɗo gaari ku miɗɗa ma katawkine muuti. 6A haŋka soopa, ga Mella cimminee min gudiranco hukumnigee ma bakamminee asan ke matteero ma Masi. Ay ma goŋŋakite pe ke gederriɗo ke loboɗɗee oko Mellayi ma gudirantí Ruuhanti. Teete pa ay nunto ta marawta. Lubbitine keeke pa, ay aleŋ ka tippa ɗa maa gu hukumnigee gederɗine.

Lubbico hukumnigeyyo

7Oko keeke pa haŋka, ke beneyya pe kee me? Hukumnigee soo ay zunubgee aɗɗe? Kaw, ay seene ɗa! Innasoo ga ay ma guta na ibinɗiy zunubgee. Guu hukumnigee alɗe beneyya ɗa goo: «Addo aŋakka ɗa lawtee giicum#7.7 Elloŋ Oomiti min Masir 20.17.», ke gederra ɗa ke ibinɗo baŋ gi aŋko ta lawco gittine ay ini me. 8Beneyyi keeke soopa, biryoo botol oko zunubgeyyo ku maa gu issiyyaw aŋko pay pay ta miɗɗa. A gata pa, guu hukumnigee lekka ɗa, gu zunubgee ay aleŋ latta ka maatenta. 9Tippa maa na alɗiy ibina ɗa missa hukumnigee, na nowotte giyyenta. A maa na giyyiyya soopa beneyyi keeke ma beneyye gaa: «Addo aŋakka ɗa lawtee giicum», gu zunubgee naɗeero, 10naata pa maateero. Beneyyi keeke pa ma esekkano ampane kee hayaatanti issinoo pe muuti. 11A gata pa, maa na giyyiyya, gu zunubgee gasseero botol gu daɓallinnoo, gaa ma guta na maatiɗe. 12Ay kaaka appe, gu hukumnigee alɗo ku Mellayi o gaarco maa gu gaare ku jobbiti o ma ay ku jobbiti ɗa kulla ay ku Mellayi o gu ɗayaŋ o gu samaane.

13Koo ku samaane soo deero aɗɗe botol ka muuti oko naa? Kaw, ay seene ɗa! Ay zunubgee soo ma deero botol ka muuti. Guta pa un̰n̰eero ma ka samaane ku maa gu issinnoo muuti. Ay keeke pe ma garaa kadar gu ay zunubgee. Gaa beneyco hukumnigeyyo pa gaariɗe saa pe kadar gu zunubgee miɗɗa ta kaw.

Nikiro ma zunubgee

14Keeta pa lekka kabarre kadar gu hukumnigee asaa min oko Ruuhanti Mellayi. A naata soopa ay gimu ma jobokka kanni ka maa gu geɗeɗɗikino lawwu oko zunubgeyyo. 15A gata pa naata ibinya ɗa maa na leewa, asan na leewaa ɗa maa na aŋka, gaa maa na ɗakatte liyawti, na leeɗiya. 16A gata pa naa leewaa maa na aŋka ɗa liyawti, na oyee ma keeke kadar gu hukumnigee samaane. 17Haŋka pa, ay naata ɗa ma leewaa maa na aŋka ɗa liyawti, innasoo gu ay zunubgee ma aayaw. 18Naata pa lekka kabarre kadar ga ka samaane aayaw ɗa oko naa ma ay gimu ma jobokka kanni ka. Aŋko ta liyaw ta samaane, na lekkica. Gudirane soopa tee ta liyaawi na lekka ɗa. 19Kaaka pa, gi samaane maa na aŋka liyawti tee na leewaca ɗa, gii miɗɗa soopa maa na aŋka ɗa liyawti na leeɗica. 20A gata pa, naa leewaa maa na aŋka ɗa liyawti, ga ay naata ɗa ma leewaa, innasoo gu ay zunubgee ma aayaw.

21Naata saa ma kayaatu ibinya keeke: Wikinne maa naa aŋka liyaw latta ka samaane, ga ay ka miɗɗa ka ma kattamma. 22Ɗakko galbantu gu hukumnigeetee Mellayi daanaw. 23A innasoopa, na akaa ziitu hukumne kaƴi ma lobokka. Gita pa nekerkiti hukumne maa gi galbantu aŋka na joboɗɗica. Hukumne maa na aŋka ɗa taata pa, leewano lawwico zunubgee ma hekemeyyiya ziitu. 24Hay, hay, elloŋ ƴa soo keeke! Ziitu katawkino muuti. Ay we ma akkino cimma min oko keeke paratti? 25Na leewee barkinti oko Mellayi asan ga cemekkano ma Miltine kee Iisa Masi.

Ay kaaka pe, na loboɗɗo ma galbantu aleŋ lawwu oko hukumnigeetee Mellayi. A innasoopa, ga ma jobbo ta kanni ka, na lobokka pe aleŋ lawwití hukumne maa gu zunubgee ka aŋka.

Currently Selected:

Rooma 7: mmy

Highlight

Copy