Rooma 5

Ay Iisa Masi ma taacinee ma Mella

1Mella gaarinee ɗayaŋ unti asan ke dowwiy galbigeetine oko Iisa Masi. Ay kaaka appe ke nowoɗɗe ma aapiya ma gata saananti Miltine kee Iisa Masi. 2Ay Iisa Masi ma iyyine botol ku maa ga Mella leeɗineega gidaanuwti asan ke dowwiy galbigeetine oko Iisa Masi. Gaa gidaanuwti pa, ay gata appe maa ke nowotte talta aatti. Ma parhankine pa ay ucawtine maa ke asicca gassa haggantine tee ta darjanti Mellayi. 3Ay taata ɗa ka ma ay parhantine. Ma parhankine payya pa kulla ay diigaŋgee maa ke ecekke asan ke lekka kabarre kadar gu diigaŋgee esekkeene baatiynuwe. 4Baatiynuwe pa esekkeene nunto ta dandal, o nunto taata pa esekkane ucawtí haggantine maa ga Mella akkineeca bira. 5Ucawtine teete pa daɓallane ɗa, asan ga Mella onokkineegu paaɗe galbigeetine ma ƴekkiti ma Ruuhanti maa ga birne.

6A gata pa oko wikinne maa ga keeta alɗo lekka ɗa gudirane ke cimmiɗiy kayyeetine min zunubgeyyo, ga Masi pa maateero gaddantine oko keeta ma bakammikiki ɗa ka Mellayi. Muutti pa ay oko wikinne saa maa ga Mella caaɗe. 7Raɗɗa pe ga gimu oyyiɗo muutu gaddanti oko gimu ma ɗayaŋ. Gaddanti oko gimu ma leewa ka samaane soopa, walaŋ pe ga gimu asarraca galbanti maa ga maatiɗo gaddanti. 8A innasoopa ga Masi maateero gaddantine wikinne maa ke lewɗo missa zunubgee. Gata pa ay keeke appe ma garaa kadar ga Mella ƴekkane. 9Haŋka ga Mella gaarinee ɗayaŋ unti ma baartee Masi. Mileŋ ga ay goŋŋakite pa, ga ay ma tirta saa pe ga Iisa Masi akkine najjiya min bogorti Mellayi. 10A gata pa wikinne maa ke alɗo kasiimigee ma Mella, ga gata pa taacinee ma gata ma muuti Runti. Mileŋ ga ay goŋŋakite pa, ga ay ma tirta saa pe kulla ga akkine najjiya ma hayaatanti Runti. 11Gata pa ay keeke ɗa ka, innasoopa ke parhanne kulla oko Mellayi ma Miltine kee Iisa Masi, maa ga ma gata haŋka ke gassica taaco ma Mella.

Adam o Iisa Masi

12Zunubgee un̰n̰eero dunuuniti ma gimu kaƴi ka ma leelo latta kaƴi ka miɗɗa#5.12 Gimu ka kaƴi ma issiy zunubgee dunuuniti kaaka pa, ay Adam. Elloŋ Diilo ta Lawwi Paracco 3., guu asikkiki muutu. Ay kaaka appe ga muutu sariyyoo oko giimi paracco mileŋ ga paracco gu leelo zunubgee. 13A gata pa, omma min maa ga Mella alɗeegu beraa ɗa missa hukumnigee oko Muusa, gu giimi ku dunuuniti leewa paaɗe zunubgee. A mileŋ gu hukumnigee pa aaye ɗa missa wikinne kaaka, ga Mella kulla ketepeyyiyoogu ɗa zunubgeeco. 14Muutu soopa, gederriyoo paaɗe oko giimo min oko wikinniti Adam namma ya oko ka Muusa, ya oko giimi kulla ma leewe ɗa zunubgee aleŋ ta Adam ma kaawiya beneyti Mellayi. Adam pa, gata ay gaaro tee ta gimu ma akka asa#5.14 Gimu ma akka asa kaaka pa, ay Iisa Masi..

15A innasoopa gi niŋgiti Adam, gita jagenta ta kaw ma birawti Mellayi. Niŋgiti gimu kaƴi ka itiryoo muutu oko giimi ku maani. Mileŋ ga ay goŋŋakite pa, ay tirta saa pe ga gidaanuwti Mellayi deeɗiyoo ma kaawo oko giimi maani, ma biraw ta gidaanuwti saananti gimu kaƴi, gata ma ay Iisa Masi. 16Maa gi birawti Mellayi pa eterra, jagenta min oko kanti gimu ka kaƴi ma leewa zunubgee. Niŋgiti gimu kaƴi ka askiti parlanti Mellayi ma baagiy giimi. A innasoo, ma saananti birawti Mellayi taata, ga gaariy giimi ɗayaŋ unti, caŋ gu nigaakico maani kulla. 17Ma niŋgiti gimu kaƴi ka, ga muutu gederriyoo oko giimo, saananti gimu ka kayti kaaka ka. Mileŋ ga ay goŋŋakite pa, ay tirta saa pe ga ma saananti gimu ka kaƴi ma ay Iisa Masi, gu gasakkaa ka samaane ƴiila. A giimi maa ga Mella leyyooga gidaanuwti ma kakee pa, ga garay ɗayaŋ unti. Guta kotti pa akkica gassa hayaatane, guu hikimiyɗo.

18Ay kaaka appe, ga ma saanantí niŋgo kaƴi ka gi parlanti Mellayi baagiɗiy giimi paracco, o ga ma lubbi ka ɗayaŋ kaƴi ka, ga Mella gaariɗiy giimi paracco ɗayaŋ unti. Ay ma kaaka appe ga Mella biriyyoo hayaatane. 19Ma pooco ta jobbiti beneyti Mellayi tee ta gimu kaƴi ka, gu giimi ku maani un̰n̰e zunubgeyyo. A ma oyyo ta jobbiti kanti Mellayi tee ta gimu kaƴi ka, gu giimi maani deewa ɗayaŋ unti Mellayi. 20Hukumnigeetee Muusa pa guta aseero ku maa gu zunubgee deeɗo maani. A were soopa maa gu zunubgee deeɗe maani, ga gidaanuwti Mellayi deero kaawenta. 21Goŋŋakite pa, ga aleŋ maa gu zunubgee garawɗica gudiranco ma muutu min tippa, ga haŋka pa kulla ga gidaanuwti Mellayi garaaca ta ƴiila gudiranti wikinne maa ga gaarinne ɗayaŋ unti. Ay ɗakko appe, ga ma saananti Miltine kee Iisa Masi ke gasaɗɗica hayaatane ma gakamma ɗa ta kaw.

Currently Selected:

Rooma 5: mmy

Highlight

Copy