ኢሳይያስ 40
40
ንህዝቢ እግዚኣብሄር ዘፀናንዕ ቃል
1“ኣፀናንዑ፤ ንህዝበይ ኣፀናንዑ”
ይብል ኣምላኽኩም።
2ንልቢ ኢየሩሳሌም ተዛረቡ፤
ዝተቘፀረትሉ ወርሓት ከም ዝተፈፀመ፥
መከራኣ ከም ዝተወድአ፥
በደላ ኸም ዝተሓድገላ፥
ስለ ዅሉ ሓጢኣታ ድማ፥
ካብ ኢድ እግዚኣብሄር፥
ዕፅፊ ኸም ዝተቐበለት ናብኣ ኣውጁ።
3 #
ማር. 1፡3፥ ዮሓ. 1፡23። ድምፂ ኣዋጅ ነጋሪ፥ ከምዙይ ይብል፦
“መንገዲ እግዚኣብሄር ኣብ ምድረ በዳ ፅረጉ፤
ኣብ ምድሪ ኣፃምእ ኸዓ፥ ንኣምላኽና ፅርጊያ ፅረጉ።
4ስንጭሮ ዝኾነ ልዕል ይበል፤
ኵሉ እምባታትን ኰረብታታትን ድማ፥
ትሕት ይበል፤
ቀይናን ይቕናዕ፤
ድንጕር ከዓ ሰጥ ዝበለ ሜዳ ይኹን።
5 #
ሉቃ. 3፡4-6። ኣፍ እግዚኣብሄር ተዛሪቡ እዩ እሞ፥
ክብሪ እግዚኣብሄር ክግለፅ፥
ኵሉ ስጋ ዝለበሰ ኸዓ፥ ሓቢሩ ኽሪኦ እዩ።”
6ድምፂ፥ “ኣውጅ” በለኒ፤
“እንታይ ኢለ ኽእውጅ” በልኩ።
“ኵሉ ስጋ ዝለበሰ ሳዕሪ እዩ፤
ኵሉ ኽብሩ ኸዓ ኸም ዕምበባ ምድረ በዳ እዩ።
7እስትንፋስ እግዚኣብሄር ይነፍሶሞ፥
ሳዕሩ ይነቅፅ፤ ዕምበባኡውን ይረግፍ።
ብሓቂ እቲ ህዝቢ ሳዕሪ እዩ።
8 #
ያቆ. 1፡1-11፥ 1 ጴጥ. 1፡24-25። ሳዕሩ ይነቅፅ፤ ዕምበባኡውን ይረግፍ፤
ቃል ኣምላኽና ግና፥ ንዘለኣለም ፀኒዑ ይነብር።”
9ኣቲ ብስራት እተብስሪ ፅዮን፥
ናብ ነዊሕ እምባ ደዪቢ፤
ኣቲ ብስራት እተብስሪ ኢየሩሳሌም፥
ድምፅኺ የመና ልዕል ኣብሊ፤
ልዕል ኣብሊ፤ ኣይትፍርሒ፤
ንኸተማታት ይሁዳ፥
“እንሆ ኣምላኽኩም ይመፅእ ኣሎ” ኢልኪ ንገሪ።
10 #
ኢሳ. 62፡11፥ ራእይ 22፡12። እንሆ፥ እግዚኣብሄር ኣምላኽ፥
ብሓይሊ ይመፅእ፤
ብቕልፅሙ ድማ ይገዝእ፤
እንሆ ዋጋኡ ምስኡ እዩ፤
ስራሑውን ኣብ ቅድሚኡ እዩ።
11 #
ሕዝ. 34፡15፥ ዮሓ. 10፡11። ንሱ ንመጓሰኡ ኸም ጓሳ የውፍረን፤
ንመሓሲኡ ኣኪቡ ኣብ ሕቝፉ ይስከመን፤
ነተን ዘጥብዋ ድማ ብህድኣት ይመርሐን።
ኣምላኽ እስራኤል መወዳድርቲ የብሉን
12ንማያት ብሕፍኑ ዝሰፈረ፥
ንሰማያት ከዓ ብስድሩ ዝለክዐ መን እዩ?
ንሓመድ ምድሪ ብመስፈሪ ኣኪቡ ዝሓዘ፥
ንእምባታት ብሚዛን፥ ንዀረብታታት ድማ ብሚዛናት ዝመዘነኸ መን እዩ?
13 #
ሮሜ 11፡34፥ 1 ቆሮ. 2፡16። ንመንፈስ እግዚኣብሄር “ዝኣዘዘ፥
ወይ መኻሪ ኾይኑ ዝመሃሮኸ መን እዩ?
14ምስ መን ተማኸረ? ወይ መን መኸሮ?
ንመንገዲ ፍትሒኸ መን መሃሮ?
ንፍልጠትከ መን መሃሮ?
መንገዲ ምስትውዓል ዘርኣዮኸ መን እዩ?
15እንሆ፥ ኣህዛብ ኣብ ቅድሚኡ፥
ኣብ ዕትሮ ኸም ዘላ ሓንቲ ነጥቢ ማይ እዮም፤
ኣብ ሚዛን ከም ዘላ መንገፍ እዮም ዝቝፀሩ፤
ንደሴታትውን ከም በነንታ የልዕሎም።
16ሊባኖስ ንምንዳድ፥
እንስሳኡውን ንዝቃፀል መስዋእቲ ኣይኣኽሉን።
17ኵሎም ኣህዛብ ኣብ ቅድሚኡ፥
ኣብ ቍፅሪ ዘይኣትዉ እዮም፤
ከም ዘይረብሑ ኸም ከንቱ ነገር ይቘፅሮም።
18ንእግዚኣብሄር ብመን ክትምስልዎ ኢኹም?
ምስ መንከ ኽተመዓራርይዎ ኢኹም?”
19 #
ግ.ሓ. 17፡29። ንዝተቐረፀ ምስሊ በዓል ሞያ እዩ ዝሰርሖ፤
ኣንጠረኛ ድማ ብወርቂ ይልብጦ፤
ሰንሰለት ብሩር ከዓ ይገብረሉ።
20እቲ ኽሳዕ ክንድዙይ ከውፅእ፥
ዓቕሚ ዘይብሉ ድኻ ድማ፥
ዘይነቅዝ ዕንፀይቲ ይመርፅ፤
ከም ዘይነቓነቕ ምስሊ ገይሩ፥
ዘቑመሉ ኽኢላውን ይደሊ።
21ኣይፈለጥኩምን ዲኹም?
ወይ ኣይሰማዕኹምን ዲኹም?
ካብ ጥንቲዶ እዙይ ኣይተነገረኩምን እዩ?
ምድሪ ኻብ እትምስረት ጀሚሩዶ ኣየስተውዓልኩምን ኢኹም?
22ንሱ እዩ ልዕሊ ኽቢ ምድሪ ዝቕመጥ፤
እቶም ኣብኣ ዝነብሩ ኸዓ ኸም ኣንበጣ እዮም፤
ንሰማያት ከም መጋረጃ ይዝርግሖ፤
ንመንበሪ ድማ ኸም ድንኳን ይዝርግሖ።
23ነሕሉቕ ከም ከንቱ፥
ንፈራዶ ምድሪ ኸዓ ኸም ዘይነበሩ ይገብሮም።
24ገና ምስ ተተኸሉን ምስ ተዘርኡን፥
ኣብ ምድሪ እውን ሱር ምስ ሰደዱ፥
ንሱ ኡፍ በሎምሞ ነቐፁ፤
ንፋስ ኣውሎ ከዓ ኸም ብቝቡቝ ፀራረጎም።
25ምስ መን ደኣ ኽተመዓራርዩኒ ኢኹም?
ምስ መንከ ኽተመሳስሉኒ ኢኹም?
ይብል እቲ ቕዱስ።
26ኣዒንትኹም ናብ ሰማይ ቈላሕ ኣቢልኩም ረአዩ፤
ነዚኣቶም ዝፈጠሮም መን እዩ?
ንሰራዊቶም ብቝፅሮም ዘውፅኦም፥
ንዅሎምውን በብስሞም ዝፅውዖም ንሱ እዩ፤
ካብ ዕብየት ሓይሉን ካብ ብርትዐ ኽእለቱን ዝተልዓለ፥
ሓደ እኳ ኣይሰኣኖን።
27ኣታ ያእቆብ፥ ኣታ እስራኤልውን፥
ንምንታይ “መንገደይ ካብ እግዚኣብሄር ተሰዊራ እያ፤
ፍርደይ ድማ ኻብ ኣምላኸይ ሓሊፋ እያ” እትብል?
ንምንታይከ ኸምዙይ ኢልካ እትዛረብ?
28ኣይፈለጥካን ዲኻ፥ ኣይሰማዕኻን ዲኻ?
እግዚኣብሄር ዘለኣለማዊ ኣምላኽ፥
ፈጣሪ ወሰናት ምድሪ እዩ፤
ኣይደክምን፤ ኣይሕለልን፤
ምስትውዓሉውን ኣይምርመርን እዩ።
29ንሱ ንድኹም ሓይሊ ይህብ፤
ሓይሊ ንዘይብሉ ኸዓ ብርትዐ ይውስኽ።
30ኣጕባዝ ይደኽሙን ይሕለሉን፤
መንእሰያት ድማ ፈፂሞም ይወድቁ።
31እቶም ንእግዚኣብሄር ተኣማሚኖም ዝፅበዩ ግና፥
ሓይሎም ይሕድሱ፤
ከም ንስሪ በኽናፍ ይድይቡ፤
ይጐዩ እሞ ኣይሕለሉን፤
ይኸዱ እሞ ኣይደኽሙን።
Currently Selected:
ኢሳይያስ 40: ትመ15
Highlight
Share
Copy
Want to have your highlights saved across all your devices? Sign up or sign in
