Sir 48
48
1Bwanyima omurangi Eliya akaimuka nk'omuriro,
ebigambo bye byayaka nk'orumuri.
2Akabareetera kuteerwa enjara,
n'ahabw'eihato rye omubaro gwabo gwatuuba.
3Ahabw'ekigambo kya Mukama akakinga eiguru,
kandi yaaragaritsya omuriro kashatu.
4Iwe Eliya, ebishi okagira ekitiinwa
ahabw'eby'okutangaaza bi waakozire!
Mbwenu n'oha oine eky'okumwehimbisisa nk'ekyawe?
5Ahabw'ekigambo kya Rukiraboona
okahimbuura omuntu ofiire, waamwiha okuzimu!
6Iwe owaahanwire abagabe okabacwekyereza,
n'abakuru rugambwa okabaiha aha bitanda byabo.
7Iwe owaahuriire okujuukirira ahari Sinaayi,
n'encwa y'okuhoora enzigu ahari Horebu.
8Iwe owaasiigire amajuta abagabe b'okuhoora enzigu,
okagasiiga n'abarangi b'okukuhungurira.
9Iwe owaatwairwe akasoorora k'omuyaga gw'omuriro
omu kigaari kirikunyururwa embaraasi z'omuriro.
10Iwe oyeteekateekire omu bunaku obwatairweho,
nk'oku kyahandiikirwe,
kugwisiriza ekiniga kya Ruhanga kitakabugumire
kuba ekishinjo, kuhindura emitima ya baishe abaana
bakagarukana na batabani baabo,
n'okugaruraho enganda za Yakobo.
11Ebishi abarikureeba n'abaafiire nibakukunda n'abaafiire nibakukunda n'abahiirwa;
kandi naitwe buzimazima turyagira amagara.
Elisha
12Eliya ku yaaburiire omu kasooroora k'omuyaga,
omutima gwe gwaijura Elisha.
Omu biro by'amagara ge byona
tihariho mutegyeki n'omwe owaamutetemeise,
nobu yaakuba owaamutegyekire.
13Tihaine kintu na kimwe ekyamugumiire,
kandi ku yaafiire omutumbi gwe gwaranga.
14Nk'oku yaakozire eby'okutaangaza akihuriire,
nikwo yaakozire n'ebindi by'amahano yaafiire.
15Kwonka ebyo byona nobu byabaireho,
abantu tibareegarukiremu,
kandi tibararekire kukora ebibi,
okuhitsya obu baihirwe omu nsi yaabo,
bakatwarwa bari enkwatwa,
bakataataanira omu nsi yoona.
Abaatsigaireho bakaba bakye munonga,
kwonka baaguma baine abategyeki baabo ab'omu muryango gwa Daudi.
16Bamwe omuribo bakakora ebi Ruhanga arikusiima,
kwonka abandi baatungikirira ebibi aha bindi.
Hezekiya
17Hezekiya orurembo rwe akarwombekaho ebigo,
yaareeta amaizi ahagati yaarwo.
Akashorogotorora orukiri n'ebyoma
yaarutamu eiziba.
18Omu biro bye Senakeribu akateera ensi,
yaayohereza Rabushake.
Rabushake yaabangira Siyooni omukono,
yaayetunguura munonga aine amaryo.
19Abayudaaya emitima yaabo yaasharara,
n'emikono yaabo yaatetema,
baagira obusaasi nk'obw'omukazi orikurumwa.
20Kwonka baahoogyera Mukama ow'embabazi
bamushashaanuriire emikono.
Na Nyakwera tiyahwama,
yaabahurira naayema omu iguru;
yaabajunisa omukono gwa Isaaya.
21Mukama atyo yaateera orusiisira rw'Abaasiriya,
maraika we yaabahwerekyereza.
22Hezekiya ogwo akakora ebirikugwisa gye Mukama,
yaahamira omu mitwarize ya Daudi ishenkuruza
ei omurangi Isaaya yaamuhabwire.
Manya Isaaya ogwo akaba ari mukuru,
naayesigwa omu bi arikworekwa.
23Omu biro bye eizooba rikagaruka enyima,
n'emyaka y'amagara g'ogwo mugabe yaayongyerwaho.
24Ahabw'amaani ga Mutima akaranzya ebiribaho,
yaahuumuriza abaabaire nibacurira omuri Siyooni.
25Akabashuuruurira ebiribaho
okuhitsya aha muheru gw'obwo bunaku,
n'ebisherekirwe ebirimara omwanya muraingwa bitakabaireho.
Yosiya
Currently Selected:
Sir 48: RKK2008
Highlight
Copy
Compare
Share
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.