Sir 47
47
1Samueli ku yaarugireho, yaakuratwa Natani omurangi w'omu busingye bwa Daudi.
2Nk'oku ebishaju bishoroorwa
bikaihwa omu kitambo ky'obusingye,
na Daudi nikwo yaatoorainwe omu baana ba Israeli.
3Akazaana n'entare nk'orikuzaana n'abaana b'embuzi,
yaazaana n'edubu nk'orikuzaana n'abaana b'entaama.
4Mbwenu shi obu yaabaire naakinyeeta,
taraitsire ekikaaka, akakiza abantu ekihemu,
obu aimutsya omukono akwaitse enjungu y'eibaare,
akagwisaho Goliyaati owaabaire naayetunguura?
5Manya akahoogyera Mukama Rukiraboona,
n'onu yaamuha amaani omu mukono gwe gwa buryo
okwita omushaija emanzi omu rugamba,
n'okuhimbisisa eihanga rye ahabw'amaani gaaryo.
6Baamuha ekitiinwa ahabw'abantu kakumi,
baamusingiza ahabw'emigisha ya Mukama,
obu baamujweka ekirunga ky'ekitiinwa.
7Akamaraho abazigu be aba buri rubaju,
yaahindura busha ababisha be Abafilisitiya,
amaani gaabo yaagacwekyereza
nangwa n'okuhitsya eri izooba.
8Omuri byona ebi yaakozire,
akasiima Nyakwera Rukiraboona, naamuhimbya n'ekitiinwa.
Akeeshongora eby'okumuhimbisa n'omutima gwe gwona,
yaaguma naakunda Omuhangi we.
9Akaba ata abeeshongozi omu maisho g'eitambiro,
ngu banihiize ebyeshongoro n'amaraka gaabo.
10Akanuza amagyenyi,
yaagateeraho obunaku bwago omu mwaka gwona,
haza obwo nibahimbisa eizina rya Ruhanga eririkwera;
n'Omwanya Ogurikwera niguteererwamu akaari k'okushemererwa,
okwiha kare omu kasheeshe.
11Mukama akamusaasira ebibi bye,
yaamutunguura naamuha obushoboorozi bw'ebiro byona.
Akamuha endagaano y'obugabe
n'ekitebe ky'obugabe eky'ekitiinwa omuri Isiraeli.
Solomooni
12Daudi akahungurirwa Solomooni omutabani omunyabwengye,
owaatungire akaganagana ahabwa Daudi ogwo.
13Solomooni akategyeka omu biro by'obusingye,
Ruhanga yaamuha obugogyeere aha mbaju zoona,
ngu abone kwombekyera Ruhanga Nyaruju
y'okuhaisa eiziina rye ekitiinwa,
n'okutebeekanisa Omwanya Ogurikwera ogw'okugumaho ebiro byona.
14Ebishi Solomooni okagira obwengye noonyeeta!
Omu kwetegyereza kwawe okaijura
waashandaara nk'omugyera.
15Ebiteekateeko byawe bikabuga ensi,
waagiijuza enfumu n'ebishaakuzo.
16Okurangaanwa kwawe kukahika okwo omu birwa bya hare
waakundwa ahabw'okuba omuntu w'obusingye.
17Ahabw'ebyeshongoro byawe n'enfumu n'ebigano
n'ahabw'ebi waabaire oshoboorora,
ensi yoona ekakutangaarira.
18Omu iziina rya Mukama Ruhanga,
ou beeta Ruhanga wa Isiraeli,
okarundaana ezaabu nka tiini,
waateeranira hamwe efeeza nka risasi.
19Kwonka shi okeegamirana n'abakazi,
baakuhitsya aha kutegyekwa omu biri gwawe.
20Ekitiinwa kyawe okakisiiga ekihemu,
waashiisha baijukuru baawe;
waareetera otyo abaana baawe kugirirwa ekiniga,
baayefuuza ahabw'obushema bwawe.
21Nikyo obwo bugabe bwabaganisiziibwemu.
22Kwonka Mukama tarigira bu arekire embabazi ze,
nobu kwakuba okunagiirira ebi yaakozire, bikahwerekyerera.
Tarigira bu amazireho baijukuru b'ou yaatooraine,
nobu kwakuba okucwekyereza oruzaaro rw'owaamukunzire.
Nikyo yaakwatiire Yakobo eihembe,
akatsigira Daudi ekitsintsi ky'oruzaaro rwe.
Rehoboamu na Yerobohamu
23Solomooni ku yaafiire yaashanga baishenkuru;
omu bigyere bye haazamu omwe aha batabani,
niwe Rehoboamu owaabaire ari omushema
okutakareebwaga kandi atarikwetegyereza,
owaagomeise abantu ahabw'emitwarize ye mibi;
kandi na Yeroboamu mwene Nebati,
owaareeteire Isiraeli kushiisha
akoorekyerera Efuraimu okukora ebibi.
24Ebibi byabo bikakanya byarengyesereza,
byabareetera kubingwa omu nsi yaabo.
25Manya bakasherura oburyo bwona obw'okukora ebibi,
okuhitsya obu baahikire aha kuhoorwa enzigu.
Eliya
Currently Selected:
Sir 47: RKK2008
Highlight
Copy
Compare
Share
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.