Sir 46
46
1Yoshwa mwene Nuuni, emanzi rugambwa,
niwe yaahunguriire Musa omu by'oburungi.
Nk'oku amakuru g'eizina rye gari,
akaba omurokozi mukuru w'abantu ba Ruhanga entoore,
kuhoora abazigu abaabaimukiriire,
ngu abone kutungisa Abaisiraeli ensi y'okuhungura.
2Ebishi akaba ow'ekitiinisa obu yaimutsya emikono ye,
akabangira ezo ndembo rurara!
3Mbwenu omu baamubandiize, n'oha owaabaire ahamire nkawe?
Manya we akarwana engamba za Mukama.
4Hari eizooba tirirakumiriirwe omukono gwe?
N'eizooba rimwe tirirabaire nka amazooba abiri?
5Obwo nibwo ahoogyera Rukiraboona ow'obushoboorozi,
abazigu baamufundiriize embaju zoona.
6Haza Mukama rugambwa yaamugarukamu,
yaafukunkura orubaare rw'amaani maingi munonga.
Atyo yaateera eryo ihanga n'abaabaire bamugungiire
yaabacwekyerereza aharikushuumira Beetihooroni,
ngu ago mahanga gabone kumanya amaani g'eby'okurwanisa bye,
kandi ku arikurwanira omu maisho ga Mukama;
ahabw'okuba akakuratirira kimwe Ow'obushoboorozi.
Kalebu
7Kandi omu biro bya Musa, Yoshwa akakora ekintu ky'obwesigwa,
we hamwe na Kalebu mwene Yefune;
ahabw'okuba bakeemerana n'ekimbuuro ky'abantu,
baabazibira kukora ekibi,
baatsiratsiza okwetomboita kwabo okubi.
8Haza abo bombi nibo bonka abu Mukama yaahonoire
aha bantu obusiriira mukaaga
abaabaire nibagyendesa ebigyere,
akabahitsya omu nsi ei baabaire nibaza kuhungura,
eyaabaire neehimintika amate n'obwoki.
9Mukama akaha Kalebu amaani agu yaagumire nago,
akarugaho akaba omugurusi;
atyo akainamuka omu nsi y'ebibungo,
abaana be bakagikubuura, ekaba eyaabo y'obuhunguzi,
10ngu Abaisiraeli babone kureeberaho
ku kiri kirungi okukuratira Mukama.
Abaramuzi
11Kandi n'abaramuzi nk'oku amaziina gaabo g'ekitiinwa garikukuratana,
abatararamize mandwa
kandi abataraimwire Mukama;
nibakagume nibaijukwa n'emigisha!
12Amagufa gaabo nigakagarukwemu amagara ahi gabyami;
n'eiziina ry'abo bantu b'ekitiinwa
nirikagumeho omu baana baabo!
Samueli
13Samueli owaabaire naakundwa Mukama ari omurangi we,
akataho obugabe,
yaasiiga amajuta abakama b'okutegyeka eihanga rye.
14Akaramura eryo ihanga naakuratira eiteeka rya Mukama,
Mukama nikwo kurinda Yakobo.
15Ahabw'obwesigwa akahamibwa ku ari omurangi;
ebi yaabaire naagamba bikooreka amazima g'ebi arikuragiira.
16Abazigu be ku baamufundiriize embaju zoona,
yaahoogyera Mukama ow'obushoboorozi,
yaahayo ekitambo ky'omwana gw'entaama ogurikwonka.
17Na Mukama yaahindira omu iguru,
eiraka rye ryahurirwa riine obwaku bw'amaani.
18Yaamaraho abakuru b'eihanga rya Tuuro
n'abategyeki boona ab'Abafilisitiya.
19Samueli ogwo ku yaabaire atakagwejegyeire bwamperayo,
akeeta abantu
yaabahamisiririza omu maisho ga Mukama n'omusiigwa we, ati:
Nyowe tinkatwaraga kintu ky'omuntu weena,
nobu gwakuba omugogo gw'enkaito.
Haza kwo tiharabaireho muntu waamutabaariize.
20Nangwa nobu yaabaire yaafiire, akaguma naaranga,
yaagambira omugabe eby'okufa kwe;
kandi omuri okwo kuranga,
yaimutsya eiraka rye niryema okuzimu kumaraho okutahikiirira kw'abantu.
Natani na Daudi
Currently Selected:
Sir 46: RKK2008
Highlight
Copy
Compare
Share
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.