Sir 45
45
1Omuri baijukuru ba Yakobo
Mukama akaimutsyamu omushaija w'embabazi,
owaasiimirwe abantu boona, akakundwa Ruhanga n'abantu,
niwe Musa ou abarikumwijuka baine omugisha.
2Mukama akamuha ekitiinwa kirikwingana n'eky'abandi barikwera,
yaamuhindura mukuru, abazigu be baamutiina.
3Ahabw'ebigambo bya Musa,
Mukama akaragiira eby'amaani byarekyera aho;
yaamuhaisa ekitiinwa omu bagabe,
akamuha ebiragiro kuba eby'abantu be,
yaamworeka ekitiinisa kye.
4Ahabw'obwesigwa bwe n'obucureezi bwe akamweza,
yaamutoorana omu bantu.
5Akamuhuriza eiraka rye,
yaamutaasya omu kicu ky'omwirima ndindindi,
yaamukwatsa ebiragiro nibareebana;
niryo iteeka erireeta amagara n'okumanya,
ngu abone kwegyesa Yakobo endagaano ye,
na Isiraeli emicwere ye y'emanja.
Arooni
6Mukama akatunguura Arooni mukuru wa Musa,
omuntu orikwera nkawe, ow'omu ruganda rwa Leevi.
7Yaakora nawe endagaano etarihwaho,
yaamuha omurimo gw'okuhongyerera abantu.
Akamuhunda ebijwaro birikumwamwatikana,
yaamujweka bushuuti y'ekitiinwa.
8Akamuha ekitiinwa kirikukira eby'abandi,
yaamujweka ebirikworeka obushoboorozi bwe:
empare ndaingwa ya kitaani n'ekanzu erikwera n'ekizibaho ky'okutungikaho.
9Akamuzinguurutsya amakomamahanga
n'enjogyera nyingi munonga z'ezaabu,
kuguma nizigamba naagyenda,
okurangira kwazo kukahurirwa omuri Nyaruju,
kwine eki kurikwijutsya abaana b'abantu be.
10Akamuhumbika ekijwaro kirikwera ky'erangi ya zaabu
na bururu na bujwa, ekyakozirwe omutarizi;
kandi aha kifuba kye yaataho endagu zirikwetwa Urimu na Tumini,
ezirikumanyisa oku baraacwe emanja z'Abaisiraeli omu buryo.
11Yaataho ekintu kya karari ekirukirwe omunyamyoga,
kiriho amabaare g'obuguzi bwingi agashariirweho ebihandiiko,
gatairwe omu zaabu kandi gakozirwe omunyamyoga waago.
Ago mabaare gakaba gashariirwe omu nyuguta,
ezirikwijutsya omubaro gw'enda z'Abaisiraeli.
12Aha kikwemba kye eky'aha mutwe,
hakaba hariho ekirunga ky'ezaabu,
ekishariirweho akamanyiso “Oburikwera”,
eihunde ry'omutaano eririkutangaaza munonga,
eryahunzirwe gye omuhangu eririkushemeza amaisho,
13Arooni atakabaireho hakaba hatakabahoga bintu birungi nk'ebyo.
Tihariho ondi weena otari w'omuryango gwe owaabaire abijwara,
kureka abatabani bonka n'abaijukuru ebiro byona.
14Ebitambo bye bikaba biba eby'okwokyeza kimwe kabiri
buri izooba, bitarikwosha.
15Musa atyo yaamushoroora, naamusiiga amajuta agarikwera.
Ekyo kyamubeera endagaano etarihwaho,
we n'abaijukuru ebiro byona,
ebi eiguru ririmara rikiriho,
kuguma naaheereza Mukama ari omuhongyerezi,
n'okuguma naaha abantu be omugisha omu iziina rye.
16Akamutoorana omu bantu kutoijera Mukama ebitambo,
obubaani n'eby'emigaju erikutaamirana,
kuba ekiijutsyo ky'okukarabira abantu be.
17Yaamukwatsa ebiragiro bye,
yaamuha obushoboorozi bw'okureeberera ebyatairweho n'okucwa emanja,
ngu abone kwegyesa Yakobo ebi yaaragiire,
n'okuhwezesa Isiraeli eby'eiteeka rye.
18Abatari b'omuryango gwe bakamugiira omu naama y'okumurwanisa,
baamugiririra eihari omu ihamba;
nibo Daatani na Abiraamu n'abantu baabo
n'ab'ekigombe kya Koora, baine ekishinjo n'ekiniga.
19Mukama ekyo akakireeba, tiyaakisiima.
Nikwo kubacwekyereza ain'ekishinjo n'ekiniga,
akabakoraho eby'okutangaaza,
akabamarisaho omuriro gurikunaga enkobe.
20Kwonka Arooni we, Mukama yaamwongyera ekitiinwa,
yaamuha obuhunguzi bw'omutaano, ahabw'okuba akamuha omugabo gw'emiganuro,
yaamuteekateekyera ebyokurya byayo bingi.
21Manya abahongyerezi bakaba barya ebitambiirwe Mukama,
ebi yaahaire Arooni n'abaijukuru kuguma nibarya.
22Kwonka Arooni tarahairwe itaka ry'obuhunguzi
eri abandi bantu be baabagaine,
ahabw'okuba akaba atabainemu mugabo.
Manya Mukama nyakabara
niwe yaabaire ari omugabo gwe kandi obuhunguzi bwe.
Fenehaasi
23Fenehaasi mwene Eleyazaari niwe wa kashatu omu kitiinwa,
ahabw'okuba akagira omuhimbo gw'okutiina Mukama,
yaahama obu abandi bantu baagoma,
kandi ahabw'okuguma aine omutima murungi,
akakora eby'okukarabira Isiraeli.
24Nikyo endagaano y'obusingye yaakoreirwe nawe,
kuba omukuru w'Omwanya Ogurikwera kandi ow'abantu be,
ngu we n'abaijukuru
batungye obukuru bw'obuhongyerezi ebiro byona.
25Nk'oku endagaano yaakoreirwe Daudi mwene Yese
ow'oruganda rwa Yuda,
ngu omu kuhungura obugabe
omwana agume ahungurire ishe;
n'okuhungurira Arooni nikyo kwagumiire kuri okw'abaijukuru;
26Mukama abahe omutima gw'obwengye,
mucwere abantu be emanja omu bwinganisa,
obugogyeere bwabo burekye kuhwaho,
n'ekitiinwa kyabo kigumeho omu nzaaro zaabo zoona.
Yoshwa
Currently Selected:
Sir 45: RKK2008
Highlight
Copy
Compare
Share
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.