Sir 44
44
1Mbwenu ka atusingize abantu rugambwa baatatenkuriitwe,
nk'oku enzaaro zaabo zirikukuratana.
2Mukama akabahaisa ekitiinwa kihango,
yaaboorekyeramu obukuru bwe okwiha omu kutandika.
3Abamwe bakaba abategyeki omu bugabe bwabo,
baarangaanwa ahabw'obushoboorozi bwabo.
Abandi bakaba abahi b'obwengye ahabw'okwetegyereza kwabo,
baagamba eby'oburangi.
4Abandi bakaba abeebembezi b'abantu nibabahabura,
nibakyenga ebibari aha mutima,
kandi bari abanyabwengye omu bi barikwegyesa.
5Taho abaahimbire amaraka g'ebyeshongoro,
bakahandiika ebijengo;
6abantu abatungi abaine obwekoro,
abaatwire omu maka gaabo n'obusingye
7abo boona bakaheebwa ekitiinwa omu busingye bwabo,
baahimbisibwa omu bunaku bwabo.
8Bamwe omuribo bakatsiga eiziina,
abantu baaguma nibabahaisa.
9Hariho n'abandi abatakiijukwa,
abaafiire, okushusha oti bakaba batakabahoga;
nari oti tibarazairwe,
n'abaana baabo abaabakuratsire bakaba nikwo baaba.
10Kwonka aba ahaifo bakaba bari abantu b'embabazi,
abaakozire eby'okuhikiirira ebitaryeba.
11Obugogyeere bwabo buryaguma na baijukuru baabo,
ebi batungire bibe eby'abaana b'abaana baabo.
12Baijukuru baabo batuura bahamiire aha ndagaano,
n'abaana b'abaana baabo nabo nikwo bari.
13Obugogyeere bwabo buryagumizamu ebiro byona,
ekitiinwa kyabo tikirihanguuka.
14Emitumbi yaabo ekaziikwa n'obusingye,
eiziina ryabo ryagumaho ebiro byona.
15Amahanga garyarangaana obwengye bwabo,
ekigombe ky'abaikiriza kyeshongore eby'okubahimbisa.
16Reeba Enoka akagwisa gye Mukama, yaatwarwa;
yaabeera ab'obusingye bwona eky'okureberaho
eky'abantu abahindukiire kimwe aba Ruhanga.
17Noa akareebwa ari ohikiire kimwe kandi ohikiriire;
omu bunaku bw'okugirirwa ekiniga yaabarokokamu,
ensi yabona kutsigaza eihembe obu omwegyemure gwija.
18Endagaano ezitahwaho zaakorwa nawe,
ku ebintu byona ebiine amagara bitarimarwaho omwegyemure obundi.
19Aburahamu akaba ishenkuruza rugambwa ow'amahanga maingi,
kandi tiharabaireho ondiijo weena owaagizire ekitiinwa nkawe.
20Akarinda gye eiteeka rya Rukiraboona,
yaakora nawe endagaano.
Egyo ndagaano yaagihamya
naata akamanyiso aha mubiri gwe,
kandi ku yaagyeziibwe, yaashangwa ari omwesigwa.
21Mukama nikwo kumuhamiza n'endahiro
ku amahanga goona gariheerwa omugisha omu baijukuru be,
kandi ku arimukanyisa nk'omucuucu gw'aha nsi,
akatunguura baijukuru be ahaiguru nk'enyonyoozi,
akabahunguza ensi okwiha aha nyanja okuta aha ndiijo,
n'okuruga ahu omugyera guri okuhika aha mperu z'enzi.
22Akahamiza atyo na Isaaka ahabwa Aburahamu ishe.
23Omugisha n'endagaano eby'abantu boona
yaabirunda aha mutwe gwa Yakobo,
yaamuhamisa emigisha ye,
yaamuha ensi y'okuhungura,
yaagibaganisamu ebyanga,
yaabigabira enganda ikumi na ibiri.
Musa
Currently Selected:
Sir 44: RKK2008
Highlight
Copy
Compare
Share
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.