Sir 41
41
1Iwe rufu, ebishi okukwijuka kureetera obushaarirwa
omuntu orikuganaganira omu bi atungire,
otaine birikumurabanisamu,
ou byona birikugyendera gye,
kandi okiine amaani g'okunanurwa ebi arikurya!
2Iwe rufu, buhitsya yaawe ka neeyakiirwa gye
omuntu okyenire, ohwairwemu amaani,
okuzire munonga, orikurabanisibwamu ibara kintu,
kandi otamiirwe kimwe amagara, atakiine gagumisiriza!
3Otatiina buhitsya ya rufu;
ijuka ebiro byawe ebya ira, n'oku amagara gagira muheru.
Manya ekyo n'eki Mukama yaaragiire ebintu byona ebiine omubiri.
4Mbwenu iwe noobaasa ota kwanga eki Rukiraboona yaasiimire?
Yaaba amagara gaba ag'emyaka ikumi
nari igana nainga rukumi!
Ekyo owa Nyamuteza tikibuuzibwayo.
Omuheru gw'enkozi z'ebibi
5Abaana b'enkozi z'ebibi banugwa,
ahabw'okuba tiboosha kuteeranira mu myanya y'abatatiina Ruhanga.
6Obuhunguzi bw'abaana b'enkozi z'ebibi buryahwerekyerera,
na baijukuru baabo baryaguma nibajumwa.
7Abaana baryayetomboitera ishebo otarikutiina Ruhanga,
ahabw'okuba babonabona nibajumwa ahabwa ishebo.
8Ebishi muryakareeba, imwe abatatiina Ruhanga,
abaatsigireho eiteeka rya Ruhanga Rukiraboona!
9Manya ku muzaarwa muzaarirwa omukyeeno
kandi mufa, omukyeeno nigwo guba omugabo gwanyu.
10Kyona ekiruga omu mucuucu kigaruka omu mucuucu,
n'abatatiina Ruhanga nikwo baruga omu mukyeeno,
bakaza omu kuhwerekyerera.
11Abantu bacurira abafu baabo,
kwonka eiziina ribi ry'abasiisi tiririgumaho.
12Rinda ekitiinwa ky'eiziina ryawe,
ahabw'okuba riryakugumiraho omwanya muraingwa
ogurikukira ogw'amabiikiro mahango rukumi ag'ezaabu.
13Amagara marungi gagira ebiro byago,
kwonka eiziina rirungi rigumaho ebiro byona.
Okugirirwa enshoni
14Baana bangye mute omutima aha bi ndikubahabura.
Mbwenu obwengye busherekirwe n'eitungo ritoorekirwe,
ebyo byombi hariho ekiine omugasho?
15Manya omuntu oshereka obushema bwe
ahita oshereka obwengye bwe.
16N'ahabw'ekyo ebi ndaabagambire, mubigirire eifubo,
ahabw'okuba ekintu kyona tikishemereire kugirirwa enshoni,
nobu kwakuba okusiimirwa kimwe ibara muntu.
17Kwonka ebi ogume obigirire enshoni,
okukorera eby'obushambani omu maisho g'abazaire baawe.
Okugamba ebishuba omu maisho g'omukama nari omutegyeki;
18okuhendera eiteeka omu maisho g'omuramuzi weena, yaaba mukuru nari muto,
okukorera ebitahikire ah'abantu bateeraniire,
okutaba mwesigwa ahari mugyenzi waawe nari munywani waawe;
19ab'omu kyanga ki otwiremu okukukwata noiba,
okugirira enshoni amazima ga Ruhanga n'endagaano ye,
okugira emitwarize mibi aha byokurya,
okuha omuntu ekintu nari okukyakiira noogayana,
20okwanga kwetaba owaakuramutsya,
okuhanga amaisho omukazi twariire-enshoni,
21okwima omunyabuzaare eki yaakushaba,
okuryangatanisa ekintu ky'omuntu nari eki baamuha,
nobu kwakuba okukuratsa eriisho muk'ondi,
22nari okwetaasya omu by'omuzaana we, nainga okwiririra ekitanda kye;
okujumiiranira omu maisho ga bagyenzi baawe,
nari eki waagaba okukikuratsa ekigambo kitahikire;
23okugirira enshoni ebi waagamba n'okuzonzya orukuru nainga okwata enaama.
Obwo nibwo oryoreka ku oine enshoni z'amazima,
okakundwa ibara muntu.
Eby'okutagirirwa nshoni
Currently Selected:
Sir 41: RKK2008
Highlight
Copy
Compare
Share
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.