Sir 40
40
1Okwehenenga munonga kukateerwaho ibara muntu,
n'omugamba guremeire ogutuura guhingamiire baijukuru ba Adamu,
okwiha obu baruga omu nda ya baanyinabo,
okuhitsya obu bagaruka omu itaka nyina wa boona.
2Ekibatuntuza kikabaitsa obwoba n'okwemereza omutima
nibamanya ngu baine ekiro ki barifeeraho.
3Okwiha aha muntu oshutama aha kitebe ky'obugabe eky'ekitiinwa,
okuta aha munaku oshutama omu mucuucu n'omu iju.
4Okwiha aha muntu ojwara ebya bujwa n'ekirunga,
okuta aha muntu ojwara ebiguniya;
5boona bagira ekiniga n'eihari n'enaku n'okutatebeekana n'okutiina okufa n'okuharikana n'okurwana.
Kandi omuntu ku abyama aha kitanda,
oturo nyekiro nabwo tumureetera ebiteekateeko nk'ebyo,
kwonka omu gundi muringo.
6Agwejegyeraho kakye, nari abura oturo.
Reero ku aba agwejegyeire
oshusha oti naareeba,
n'ebi aroota bimureetera okugira enaku, aba nk'orikuhunga aha rugamba.
7Reero ku ahika aharikushusha oti takifa, asisiimuka,
haza kimutangaaza okureeba ebi yaaba naatiina biri busha.
8Byona ebigira omubiri abantu n'enyamaishwa,
na munonga abasiisi,
9bihikwaho okufa, okwitana, okurwana, rurara, obugwe, enjara, okubonabona, n'orufu.
10Ebyo byona bikahangirwa abantu enyabibi,
kandi hoona nibo bareeteire omwegyemure kwija.
11Ebintu byona ebiruga omu itaka birigarukamu,
n'ebiruga omu maizi bigaruka omu nyanja.
Eby'amazima ebitahinduka
12Enguzi n'okutagira bwinganisa biryahwahwo,
kwonka obwesigwa buryagumaho ebiro byona.
13Eitungo ry'abanyabibi riryayoma nk'omutunga,
rihongoze nk'enkuba yaateera omu njura.
14Omuntu omugabi aryaheebwa okushemererwa,
haza enkozi z'ebibi ziremerwe kimwe.
15Abaana b'abatatiina Ruhanga tibarigina mataagi maingi;
baba nk'emizi ehongire, emezire aha rukiri rutariho itaka.
16Baba nk'ebikaabugo,
ebimera aha rubaju rw'enyanja nari rw'omugyera,
bikarahuka kukunduuka, obundi bunyaatsi butakakunduukire.
17Embabazi ni nk'omusiri gurikweza,
n'okugabira abanaku kugumaho ebiro byona.
Eby'okugyeragyeranisa
18Omuntu oine omurimo n'orikwemarira ebye, amagara gabanurira,
kwonka ozoora obutungi bombi abakira.
19Abaana n'okwombeka orurembo bihaisa omuntu eiziina rirungi,
kwonka muk'omushaija otaine ky'okuhaahuuzibwa asiimwa okukira ebyo byombi.
20Amaarwa n'ebyeshongoro bireetera omutima kushemererwa,
kwonka okukunda obwengye nikubikira byombi.
21Omukuri n'endigiri binuza ekyeshongoro,
kwonka eiraka rirungi niribihita byombi.
22Eriisho rikunda kureeba eby'ekitiinwa n'ebirungi,
kwonka obubabi bw'ebicoori obutookire nibubihita byombi.
23Munywani w'omuntu nari mugyenzi we tibagira bu baburiraine,
kwonka omukazi oine iba abakira bombi.
24Abanyaruganda n'okuhwerana bibaho omu bunaku bw'okureeba enaku,
kwonka okugabira abooro kutamba okukira ebyo byombi.
25Ezaabu n'efeeza bireetera ekigyere kwemerera kihamire,
kwonka okuha obwengye burungi nikusiimwa okukira ebyo byombi.
26Obutungi n'amaani biteera omutima omuhimbo,
kwonka okutiina Mukama nikubikira byombi.
Omu kutiina Mukama tihabamu kufeerwa,
okwine tayetenga kusherura obundi buhwezi.
27Okutiina Mukama kuri nk'omusiri guhairwe emigisha,
kuhumbika omuntu ekirikukira ekitiinwa.
Okusheega
28Mwana wangye, otariba omusheegi,
haakiri ofe okukira okushega.
29Omuntu ohanga maisho ebiri aha meeza ya mugyenzi we,
okubaho kwe kuba kutashemereire kwetwa magara.
Aba ayesiisire ahabw'okutungwa ebyokurya by'ondiijo.
Kwonka omuntu orikwetegyereza kandi oyoroirwe gye, ekyo akyerinda.
30Okushabaguza kunurira akanwa k'owaariire enshoni,
kwonka omu nda ye omuriro guba nigwaka.
Ebya rufu
Currently Selected:
Sir 40: RKK2008
Highlight
Copy
Compare
Share
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.