Ŋúnuyɔ 68
68
Kulocɛliɛ wi 'leguulo jáa bèle, a siɛnsinminɛ peli ní fundaanra nɛ̄
1Ŋúnuŋuminɔ yiɛginiwɛ ŋúnugo gī. Dawuda ŋúnudanʔa gī gàa pe ŋú nɛ́ yakpuɔnrɔ ní dè.
2Kulocɛliɛ wi 'yɛ̀, a wi leguulo pe 'fɛ̀ nɛ̀ cɛrigɛ#68.2 Koliyo 2-18 siɛnrɛ tiī nɛ nyu nɛ ki tìí Kulocɛliɛ tánʔana wuʔu nɛ̄ gè nɛ̀ ki líɛ Sinayii nyagurugo nɛ̄ gè, Misa lɛ̀lɛ nɛ̄ lè, fúɔ nɛ̀ sɛ́nì nɔ̀ Siyɔn nyagurugo nɛ̄ gè, Dawuda lɛ̀lɛ nɛ̄ lè.;
bàli wi 'biɛn bèle, a pe 'fɛ̀ wi yiʔɛ mɛ́ gè#68.2 Wéli baa Tɔ́r 10.35..
3Muɔ 'pe cɛrigɛ majo bɛ̀ wírige ki cî cɛrigɛ gè;
siɛnpiile pe 'nyɛgɛ Kulocɛliɛ yiʔɛ mɛ́ gè,
majo bɛ̀ sákuro cî nyɛgɛ kàsun nī gè.
4Nɛ̀ ki yaʔa siɛnsinminɛ peli yē fundaanra nɛ̄;
piyē nɛ muguri Kulocɛliɛ yiʔɛ mɛ́ gè, piyē fundaangbuɔrɔ nɛ̄.
5Yeri ŋú Yewe mɛ́ ! Yeri yakpuɔnrɔ kpúɔn dè yeri wi míʔɛ kpóri gè !
Yeri kpuʔɔrɔ tari wi nɛ̄,
wire ŋáà wi 'tɛ́ni kàsadibarɛ nɛ̄ dè á tiī fé nɛ́ wi ní wè#68.5 Siɛnnɛ pálì nɛ̂ tiʔɛ gáà siɛnrɛ yiʔɛ dè nɛ̀ jo: wire ŋáà wi 'tɛ́ni sunʔɔ nɛ̄ gè nɛ waa waama kùlo nī lè..
Wi míʔɛ kire gī Yewe#68.5 Wéli baa Fàn 33.26. ! Yeri fundaanra kpínʔini wi yiʔɛ mɛ́ gè !
6Círile tuu wè, nɛ́ lakicɛlilɛ wélifɔli wè#68.6 Wéli baa Fàn 10.18; Ŋún 10.14.,
wire wī Kulocɛliɛ wè, ŋàa wī baa wi kòridiʔɛ wàlidɛngɛgɛ nī gè.
7Wire wi narigɛ kanʔa siɛnnɛfunvɔli mɛ́ wè,
wire wi kasuulebile yigi bèle níɛ ki kpínʔini pe kele ke nɛ̂ nyuɔ.
Nɛ̀ ki yaʔa cíimɛ siɛnnɛ peli níɛ kòrí waama kùlo nī lè.
8Cí ! Kulocɛliɛ, bà muɔ 'yiri muɔ siɛnnɛ pe yiʔɛ mɛ́ gè#68.8 Koliyo 8 nɛ́ 9 nyáà siɛnrɛ ti tàa yē Debora ŋúnugo nī gè (wéli baa Kàyu 5.4-5).,
bà muɔ 'puu nɛ tári waama kùlo nī lè, Ye‑ ŋɔ́ cɛ̀.
9a dàala ni 'cúungo#68.9 Wéli baa Yir 19.18., a nyìʔɛnɛ ni 'luʔɔ wo gè
dàala nɛ̄ lè Kulocɛliɛ yiʔɛ mɛ́ gè,
ŋàa wī Sinayii nyagurugo Kulocɛliɛ wè#68.9 Wéli baa Yir 19.18; Fàn 33.2.,
Kulocɛliɛ yiʔɛ mɛ́ gè, ŋàa wī Isirayɛliyé Kulocɛliɛ wè.
10Muɔ 'kɔli sáʔa gè nɛ̀ kàsakpuʔɔ cáan gè muɔ kɔrigɔ nɛ̄ gè,
a muɔ 'luʔɔwuʔɔ láʔa gè muɔ siɛnfurɔlɔ nɛ̄ bèle#68.10 Siɛnnɛ pálì nɛ̂ tiʔɛ gáà siɛnrɛ yiʔɛ dè nɛ̀ jo: kùlo náà ni 'puu fùrɔlɔ lè..
11Cí ! Kulocɛliɛ, muɔ siɛnnɛ pe 'tɛ́ni tiʔɛ nī gè
gàa muɔ 'gbòbori pe mɛ́ gè muɔ funjɛ̀ngɛ nī gè,
bè fuunmɔfɔlilɔ tɛ́ngɛ bèle ki nī.
12 Kàfɔli wi 'wi siɛnrɛ juu dè,
a cɛlilɛ gbokpuɔlɔ ni 'fɛ̀ nɛ̀ kɛ́ nɛ̀ sɛ́nì kataanna siɛnrɛ jáari dè#68.12 Cɛlilɛ bálì pe 'kataanna siɛnrɛ juu dè, ki 'puu bà Kulocɛliɛ wi yé fànʔa taa wi leguulo nɛ̄ bèle. Wéli baa Yir 15.20-21; 23.22-23,27-28,31; Fàn 7.10-24; Sam1 18.6-7..
13Kùlofɔlilɔ bálì pe leguulo kapiɛngbuɔnnɔ yiʔɛ kínigi gè,
a peli 'fɛ̀. Cí ! Pe 'fɛ̀ !
Cecɛ̀nminɛ bálì pe kòrí saʔa nī gè,
peli 'kapiɛnnɛ tɔ̀ni yɛrɛ liɛlɛ dè.
14Gòtolo náà pe faan lè, pe 'ni fíkɛnyɛ fèri yè nɛ́ wali ní wè;
ni síiye yiī namiige céri tiɛ cɛ̀nwɛ ní wè#68.14 Pàli nɛ sɔ̀ngí gòtolo ni 'puu fìɛ kapiɛngbuɔnnɔ mɛ́ bèle; pàli nɛ sɔ̀ngí ni 'puu kapiɛnnɛ tɔ̀ni..
Yeli nàguɔlɔ bèle, yeli bé sí kò sínɛnɛ lé
sìnbaduuyo sunʔɔmɔ nī bè wī lé#68.14 Wéli baa Kàyu 5.16. ?
15Lɛ̀lɛ líì nī Ŋɔri Ti Mìɛni Kulocɛliɛ wi 'kùlofɔlilɔ cɛrigɛ bèle,
ki cé puu majo nɛ̀wirile#68.15 Eburu siɛnrɛ ti 'ki juu nɛ́ jo: nɛzi. Wire wi wè náʔa weli kùlo nī lèʔ. ni tíri nɛ tun
Salimɔ nyagurugo nɛ̄ gè#68.15 Salimɔ nyagurugo, ki kɔri wire wi: «Nyaguruwuʔɔ». Dùʔɔ ki bé gbɛ̀ nyaa ki nyagurugo ki 'puu Sikɛmi kàʔa táanni (wéli baa Kàyu 9.46-48); dùʔɔ ki 'puu nyagurugo gáà ki 'puu Basan kùlo lìʔɛlɛ nī lè cɛngɛnyɛnifolimɛ bè, gàa ki 'puu kàdɛniwuɔrɔ wuʔu gè..
16Basan nyagurugo ki yē nyagurucɛ̀njɛngɛ;
Basan nyagurugo gè, ki kpàʔaladiɛyɛ yi 'niʔɛ.
17ʔé ! Nyagurugo muɔ, muɔ ŋáà nɛ̄ kpàʔaladiɛyɛ yi yē nìʔɛyɛ yè,
gáa nɛ̄ yejaʔa yē muɔ nī nyagurugo gíì nɛ̄ gè
gàa Kulocɛliɛ 'nyíɛnɛ nɛ̀ kɔ̀n nɛ̀ tɛ́ni ki nɛ̄ gè#68.17 Nyagurugo gáà nɛ̄ Kulocɛliɛ 'tɛ́ni gè, Siyɔn nyagurugo kire gī. ?
ʔaan, Yewe bé ki kpíʔile wire kòridiʔɛ súuri !
18Kulocɛliɛ wi suɔnyɔ wotorilo piyē nìʔɛnɛ
fúɔ nɛ̀ ki yaʔa siɛn sǐ gbɛ̀ jaa bè pe tɔ́riʔ;
wotorilo piyē siramuʔɔyɔ siramuʔɔyɔ#68.18 Wéli baa Kùlo2 6.17; Yab 3.8,15..
Kàfɔli wi nyɛ́nì kɔ́n nɛ́ pe ní Sinayii nyagurugo nɛ̄
nɛ̀ sɛ́nì jíin wi saawalidɛngɛgɛ nī gè#68.18 Eburu siɛnrɛ nī dè náʔa gè, siɛnrɛ dáà tiì fíligeʔ; siɛnnɛ pálì nɛ̂ tiʔɛ gáà siɛnrɛ yiʔɛ dè nɛ̀ jo: a Kàfɔli wi yē pe sunʔɔmɔ nī; Sinayii yē saawalidɛngɛgɛ nī gè..
19Bà muɔ 'tánʔa tiɛkpaʔaligɛ nɛ̄ gè, a muɔ 'siɛnnɛ cò bèle nɛ̀ kɛ́.
A muɔ 'kpuʔɔrɔ yɛrɛ taa siɛnnɛ mɛ́ bèle#68.19 Sɛbɛliɛwɛ ŋáà pe 'yiʔɛ girɛki siɛnrɛ nī dè nɛ́ ŋàa pe 'yiʔɛ sirii siɛnrɛ nī dè, ti 'ki juu nɛ́ jo: muɔ 'kpuʔɔrɔ kɛn siɛnnɛ mɛ́ bèle. Koligo gáà siɛnrɛ ti 'juu baa Efɛ 4.8 nɛ̀ yɛli nɛ́ girɛki sɛbɛ ní wè.,
nɛ́ míɛni siɛnciile tíimɛ mɛ́ bèle.
Yewe yo, Kulocɛliɛ yo,
píra ŋáà nī wè muɔ 'ki kpíʔile muɔ kòridiʔɛ.
20 Kpuʔɔrɔ 'yɛli de tari weli Kàfɔli nɛ̄ wè cɛngɛ ó cɛngɛ,
wire ŋáà wiī nɛ weli fùrɔgɔ turu gè#68.20 Wéli baa 55.23; Eza 46.4..
Kulocɛliɛ wire wī weli suɔfɔli wè. Ye‑ ŋɔ́ cɛ̀.
21Kire Kulocɛliɛ wiī nɛ weli suu wī;
Kàfɔli Yewe, weli Kulocɛliɛ,
wire wiī nɛ weli píle nɛ suu kùu mɛ́ wè.
22ʔaan, Kulocɛliɛ wiī nɛ wi leguulo nyùyɔ muʔɔrɔ yè,
bàli pe nyùyɔ yiī tuɔyɔ yè, á peli nɛ waa yiʔɛmɛ pe kolimɔ nī bè.
23Kàfɔli wi 'juu nɛ́ jo:
«M'bé mi leguulo kɔ́ri bèle bè yige Basan kùlo mɛ́ lè#68.23 Wéli baa Tɔ́r 21.33-35.,
bè pe kɔli bè yige kuʔɔjii wi táanmɛ gè,
24kire ga buu yeli bálì bīɛlɛ mi siɛnnɛ bèle,
yeli gbɛ̀ tɔliyɔ le yè pe sìsiɛn nī gè,
dí yeli pɔ̀nminɔ pe sí pe liɛlɛ taa lè leguulo nī bèle.»
25Kulocɛliɛ yo, muɔ pɛngɛnmɛ pi nyɛ́nì nyaa,
mi Kulocɛliɛ pɛngɛnmɛ bè, mi Kùlofɔli wè,
wi saawalidɛngɛgɛ nī gè.
26Ŋúnuŋuminɔ piyē yiʔɛ mɛ́,
siɛnnɛ bálì piyē nɛ yakpuɔnrɔ kpúɔn dè peli sí yē kàduʔu mɛ́,
nɛ́ sinborilo ní bèle bàli pe pìnbigele kpúɔn gèle#68.26 Wéli baa 33.3; Kaj1 13.8; 15.16..
27A pe sí nɛ ŋú nɛ́ jo#68.27 Weli 'tiʔɛ gáà siɛnrɛ taʔa dè baa wī bè ti lúʔugɛnnɛ cìile lè.:
«Yeri kpuʔɔrɔ tari dè Kulocɛliɛ nɛ̄ yeli gbuʔulo nī gèle,
yeri kpuʔɔrɔ tari dè Yewe nɛ̄, yeli bálì bīɛlɛ Isirayɛli siimɛ bè.»
28Bɛnzamɛ n'ŋɛ, ŋàa wī Isirayɛli pìsɛnwɛ wè,
wire wi 'pe yiʔɛ kíni gè#68.28 Isirayɛliyé kùlofɔpeliwe Sawuli wè, wi 'puu Bɛnzamɛ saʔa tùlugo wuu wè (wéli baa Sam1 9.21).;
Zuda kàfɔlilɔ m'bɛlɛ nɛ́ pe gbokpuɔlɔ ní lè,
nɛ́ Zabulɔn kàfɔlilɔ ní bèle, nɛ́ Nafitali kàfɔlilɔ ní bèle#68.28 Wéli baa Kàyu 5.18..
29Isirayɛli yo,
muɔ Kulocɛliɛ wi 'ki juu nɛ̀ gbɛ̀ngɛ nɛ́ jo muɔ bé ŋɔri taa.
Kulocɛliɛ yo, muɔ ŋáà ma weli sáʔa wè,
‑muɔ ŋɔri tìɛ dè !
30Bè muɔ yaʔa baa muɔ Gbùʔɔrɔsaʔa nī gè, gàa gī Zerizalɛmi kàʔa naamɛ gè,
tiʔɛ gíì nī kùlofɔlilɔ pe báan nɛ pe kpuʔɔrɔ yɛrɛ kanʔa dè,
31‑muɔ kapiɛngbuɔn kòkuulo wáa lè nyàʔayɛgɛ kúrugu gè
gàa gī nyàʔanivɛgɛ tiire nī dè#68.31 Nyàʔayɛgɛ gè, ki bé gbɛ̀ puu wócuɔn kire ga laa dùru; kiī fìɛ nɛ Ezipiti kùlo kɛnmɛ tìí bè, peli bálì bīɛlɛ Isirayɛliyé leguulo bèle (wéli baa Ezek 29.3). Nyàʔanivɛgɛ tiire, ti 'puu nɛ fíin Niili cáʔa gògoyo nɛ̄ yè, Ezipiti kùlo nī lè (wéli baa Yir 2.3.),
nɛ́ kùlogolo nɛ̄ gèle gàli ke 'gbuʔulo gèle,
majo nɛ̀piʔɛlɛ gboli nī, nàa nɛ̀piɛlirigele nɛ ke yiʔɛ kíni gè,
fúɔ bè taa kùlogolo siɛnnɛ pe pa pìye cɛ́rigɛ
bé sí de muɔ sàrí, Kulocɛliɛ, nɛ́ pe walifiiwe walikpeye ní yè.
‑Kùlogolo cɛrigɛ gèle, gàli gīɛlɛ kapiɛnnɛ ni 'ke dɛ́ni gèle !
32Tundunminɔ#68.32 Siɛnnɛ pálì nɛ̂ tiʔɛ gáà siɛnrɛ yiʔɛ dè nɛ́ jo: kányiɛrɛ yɛrɛ. pe 'kɔ́n Ezipiti kùlo mɛ́ lè.
Kusi kùlo#68.32 Ki kùlo náà ni 'puu Nubi kùlo, nàa ni 'puu Siɛnnɛwuɔlɔ kùlo láà. Ni 'puu Niili cáʔa ki kpàanjali nɛ̄ wè, Ezipiti kùlo lìʔɛlɛ nī lè, kàliige kɔli mɛ́. ni 'kiyɛ sáʔa yè, níɛ fé nɛ báan Kulocɛliɛ mɛ́ wè.
33Dàala kùlofɔliyɔ, yeri ŋú Kulocɛliɛ mɛ́ wè !
Yeri yakpuɔnrɔ kpúɔn dè Kàfɔli mɛ́ wè ! Ye‑ ŋɔ́ cɛ̀.
34Yeri ŋú wi mɛ́ ŋàa wi tɛ̀ní nyìʔɛnɛ nɛ̄ lè majo sunʔɔ gī,
nyìʔɛnɛ náà ni 'tíi nɛ̀ faan faʔa faʔa gè.
N'ŋɛ, wi yékpogbuɔlɔ niī nɛ kpɛ̀ní nɛ́ fànʔa ní !
35Yeri ki jáari ye jo Kulocɛliɛ wiī nɛ́ ŋɔri ní !
Wi kpuɔmɔ pi yē Isirayɛli siɛnnɛ nɛ̄ bèle,
wi fànʔa kiī nɛ nyaʔa nyìʔɛnɛ nī lè.
36Muɔ wè, Kulocɛliɛ, muɔ yē fíɛrɛ wuu
a muɔ 'yiri muɔ saawalidɛngɛgɛ nī gè.
Isirayɛliyé Kulocɛliɛ wire wi fànʔa nɛ́ ŋɔri kanʔa siɛnnɛ mɛ́ bèle.
Kulocɛliɛ wi 'yɛli nɛ́ kpuʔɔrɔ ní !
Currently Selected:
Ŋúnuyɔ 68: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
