Ŋúnuyɔ 69
69
Funbiɛnrɛ ti 'niʔɛ mi nɛ̄; siɛnnɛ piyē nɛ mi tíʔɛ
1Ŋúnuŋuminɔ yiɛginiwɛ wuʔu gī. Pe 'ki ŋú nɛ́ yékpoli ní nàa ni 'jo: «Luʔɔ kácuɔnyɔ yè#69.1 Ki kɔri wiì fílige nɛ̀ cɛ́nʔ. Siɛnnɛ pálì nɛ̂ tiʔɛ gáà siɛnrɛ yiʔɛ dè nɛ̀ jo: gàa 'ki ŋú nɛ́ màʔagɛlɛ kɔlini gɔri ní wè.». Dawuda wuʔu gī.
2Kulocɛliɛ yo, ‑mi suɔ !
Luʔɔ ki 'mi lìi fúɔ nɛ̀ nɔ̀ mi yétiige nɛ̄ gè !
3Mi 'cɔ̀ri fàrigɛluulo nī lè nàa ni 'cùugo lè;
miì dàawaʔala taa nɛ̀ yéri ni nɛ̄ʔ.
Mi nɛ tíri lacuugo nī gè, á lakuruyo yiī fúu nɛ waa nɛ́ mi ní.
4Mi 'fùrɔ bɛ̀ mi nɛ kòkuulo wáari lè; yékpoganʔa ki 'waʔa mi nɛ̄.
Mi nyapigele ke 'wéli nɛ̀ fùrɔ bɛ̀ mi nɛ Kulocɛliɛ siri wè.
5Nɛ́ ki cɛ́n bàli mi 'biɛn bèle, kakpiʔilile fùn lè#69.5 Wéli baa Zan 15.25.,
pe nyɛ́nì niʔɛ nɛ̀ tóri mi nyùgo nzìire nɛ̄ dè.
Mi leguulo káfinɛvinɛnɛ bálì bèle, pe ŋɔri ti 'niʔɛ nɛ̀ tóri.
Piyē nɛ caa bè mi cúʔɔ, nyùgofun leguulo bálì bèle.
Miì yɛli bè ki fuʔɔ tɔ́nʔ, gàa mi sì yùu gèʔ.
6Kulocɛliɛ yo, muɔ nyɛ́nì mi ledomɔ cɛ́n bè;
mi kolimɔ piì làri muɔ nɛ̄ʔ.
7 Yewe ŋáà wī Nyìʔɛnɛ Kapiɛngbuɔnnɔ Kàfɔli wè,
fǎga ki yaʔa mi‑ kò fìɛrɛ yɛgɛ
bàli mɛ́ piyě pe sɔ̀ngirɔ taʔa dè muɔ nɛ̄ wèʔ.
Isirayɛli Kulocɛliɛ yo, bàli pe 'muɔ caa wè,
fǎga ki yaʔa pe‑ faʔara taa mi kɛnmɛ nɛ̄ bèʔ.
8Nɛ́ ki cɛ́n muɔ kɛnmɛ nɛ̄ mi nyɛ́nì tiʔɛligɛlɛ kpàri gèle nɛ̀ cò,
a fìɛrɛ ti 'tɔ́n mi yiʔɛ nɛ̄,
9á mi 'kò nabɔnwɔ mi siinyɛninɛ mɛ́ bèle,
nɛ́ ní siɛnpuunniwɛ mi laayirinyɛninɛ mɛ́ bèle nɛ̀ pínɛ.
10Muɔ saʔa ki woli ni 'kpúʔɔ m'mɛ́ nɛ̀ tóri
fúɔ nɛ nàzɔn sóri wè mi nɛ̄#69.10 Ki siɛnrɛ ti 'juu baa Zan 2.17..
Kire nɛ̄, a siɛnnɛ pe muɔ teri wè, pe tiʔɛlilɛ ni nìɛ nɔ̀gí mi nɛ̄#69.10 Ki siɛnrɛ ti 'juu baa Wurɔ 15.3..
11Bà mi nɛ sún nii níɛ náari wè, a mi 'nyɛni,
a ki cɛ́nì kò mi mɛ́ dìgire.
12Bà mi 'mi kayaʔa burugo le gè, a mi 'kò pe mɛ́ kátaanra yɛgɛ.
13Bàli pe 'tɛ́ni kàʔa wìile nɛ̄ lè nɛ mi wori nyu dè,
á sungbuɔlɔ peli nɛ ŋúnuyɔ kúnminɔ mi wuʔu nɛ̄ gè.
14Nɛ̀ ki yaʔa, mi wè, Yewe, mi yē nɛ muɔ náari !
Ki n'gɛ, lɛ̀lɛ ni 'nɔ̀ muɔ‑ muɔ funjɛ̀ngɛ tìɛ gè !
Kulocɛliɛ yo, ‑mi náarigɛ lúʔu gè
muɔ bànguɔ dɛ́nigɛ nìʔɛgɛ nī gè !
Ma sí mi suɔ muɔ kányiʔɛ kaala lire kɛnmɛ nɛ̄ !
15Ma mi píle ma yige fàrigɛluulo nī lè
kire ga buu mi fǎga ní cɔ̀ri ni nīʔ !
Bàli mi sì dɛ́ni bèleʔ, ma mi cò ma yige pe kiyɛ nī yè
nɛ́ míɛni lacuugo nī gè !
16Fǎga ki yaʔa lanyiyɛ lakuruyo yi‑ kɛ́ nɛ́ mi níʔ,
nɛ́ míɛni fǎga ki yaʔa lacuugo ki‑ mi lìi !
Fǎga ki yaʔa nyɛgɛ ki‑ koli tɔ́n mi nɛ̄ʔ !
17Yewe yo, lúʔu mi mɛ́, nɛ́ ki cɛ́n muɔ bànguɔ dɛ́nigɛ kiī cɛ̀ngɛ !
Yiʔɛ mi kɔli mɛ́ gè bɛ̀ muɔ yē nyinidaaguugofɔli
feliye yi míɛni wè !
18Fǎga ní muɔ yiʔɛ làrigɛ gè mi nɛ̄, muɔ baakuɔwɔ wèʔ !
Mi yē funbiɛnrɛ nī dè; ma lúʔu mi mɛ́ fáari !
19Sìʔɛrɛ ma kpɔni mi nɛ̄, ma mi sìi fùgu wè ma suɔ !
‑Mi suɔ mi leguulo mɛ́ bèle !
20Muɔ wè, muɔ nyɛ́nì mi fìɛrɛ cɛ́n dè,
muɔ 'ki cɛ́n siɛnnɛ piyē nɛ mi teri níɛ pìye nyíɛnɛ mi nɛ̄.
Mi piɛnnɛ pe mìɛni m'bɛlɛ muɔ yiʔɛ mɛ́ gè.
21Tiʔɛlilɛ ni 'mi fungo cúʔɔ gè, a mi 'kò yaawa.
Mi puu nɛ siri pe‑ pa mi fìɛlɛ; piyè sí ki kpíʔileʔ.
Siɛntaanra juufɔlilɔ, mi sì wàa nyaa pe nīʔ.
22Pe 'sùɔmɔ#69.22 Wéli baa Mat 27.34. le bè mi suro nī dè;
bà luʔɔwuʔɔ ki 'mi taa gè, a pe 'diviɛn latanʔanigɛ kɛn m'mɛ́#69.22 Wéli baa Mat 27.48; Mar 15.36; Zan 19.28,29..
23‑Ki yaʔa pe lìigboligolo ke‑ kò gárigɛ pe mɛ́,
dí pe yanyige ki‑ kò jùɔlɔ bè pe cò#69.23 Koliyo 23-24 yi siɛnrɛ ti 'juu baa Wurɔ 11.9-10. !
24‑Yebilige sí jíin pe nyapigele nī gèle pe fǎga ní de nyaʔaʔ !
‑Ki yaʔa pe kàduuyo yi‑ kò kùruyaʔaya súuri !
25‑Muɔ fundanʔanigɛ sùʔu gè ma wo pe nɛ̄,
dí muɔ funyɛrigɛ ki‑ sí pe cò !
26‑Ki yaʔa pe bùguro ti‑ kò waara péwu,
siɛn fǎga gbɛ̀ súɔn pe fɛ̀ni saaya nīʔ#69.26 Ki siɛnrɛ ti 'juu baa Kakpi 1.20 Zuda kùu wuʔu nɛ̄ gè. !
27Nɛ́ ki cɛ́n pe nyɛ́nì taʔa siɛn nɛ̄ wè ŋàa muɔ 'kpúɔn wè;
bàli muɔ 'luɔ bèle, piyē nɛ pe wuʔɔgɔ wori nyu dè.
28Ma kire kolimɔ fàri bè pe kolimɔ nɛ̄ bè,
fǎga tànʔa kɛn pe mɛ́ʔ !
29‑Pe míɛyɛ kurugo yè ma láʔa sìi sɛbɛ nī wè#69.29 Wéli baa Yir 32.32,33; Dan 12.1; Luk 10.20; Filip 4.3; Tìɛ 13.8; 17.8; 20.12,15; 21.27.,
kire ga buu pe míɛyɛ yi fǎga sɛbɛ nɛ́ siɛnsinminɛ woyo ní yèʔ !
30Mi wè, mi yē fɔ̀ngɔfɔli níɛ wuʔɔ.
Kulocɛliɛ, ma mi suɔ ma láʔa siɛn fǎga gbɛ̀ nɔ̀ mi nɛ̄ʔ.
31M'béri Kulocɛliɛ míʔɛ gbùʔɔrɔ́ gè ŋúnuyɔ nī yè,
m'béri wi kpuɔmɔ wori nyu dè bèri wi síɛri.
32Kire bé Yewe dɛ́ni wè bè tóri nùɔ nɛ̄ wè,
bè tóri nɛ̀piʔɛ nɛ̄ gè, gàa gī nyɛgɛlɛ ní gèle nɛ́ fèrile ní bèle#69.32 Wéli baa 50.10-14; 51.18-19..
33A fuunmɔfɔlilɔ kɛ́nì kire nyaa gè, peri fundaanra kpínʔini !
Yeli bálì bīɛlɛ ye Kulocɛliɛ caa wè, wi‑ ki yaʔa yeli sìi taa nìʔɛwɛ !
34Nɛ́ ki cɛ́n Yewe nɛ lúru fùrɔgɔfɔlilɔ mɛ́ bèle,
wi wè nɛ fìʔɛ́ nɛ́ wi wuulo ní bèleʔ, bàli bīɛlɛ kasuu nī wèʔ.
35Nyìʔɛnɛ nɛ́ dàala ni sí de ŋú wi mɛ́,
nɛ́ kuʔɔjii ní wè,
nɛ́ yɛrɛ dáà ti mìɛni dī sìi nɛ̄ wè baa luʔɔ nī gè.
36Nɛ́ ki cɛ́n Kulocɛliɛ wi bága pɛn bè ba Siyɔn kàʔa suɔ gè,
bé sí ní Zuda kàaya faan yè cígini.
Siɛnnɛ pe bé kò yi nī, bè yi taa pe woyo.
37Wi baakuɔlɔ pe siimɛ pi bé yi taa kɔrigɔ,
bàli sí bīɛlɛ Yewe 'pe dɛ́ni bèle, pe bé tɛ́ni yi nī.
Currently Selected:
Ŋúnuyɔ 69: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
