Rumawaraita 5
5
Timaarese Deus irumu yaruyari resewara
1Ape purangawaa Deus umaa yande yaxari resewara yanepia sese, asui timaarese yaiku Deus irumu sesewara kua yaneruixawa Jesus Kristu.
2Ipupe yuiri yawike arama purangawaa kiti sese kua yaikuwaa kirimbawa sese, asui suuri yasaru yamaa Deus purangasawa.
3Maa tiirumupawa, maa suuri yande yuiri yapurara irumu, nyãse yakuawate yapurara rame uxari yaiku kirimbawa xinga.
4Yaiku rame santa puranga kuri yamanduarisawa, asui puranga rame yamanduarisawa yasaru kuri yamaa.
5Ape yasaru rame yamaa tikuri sasiyara yande, nyãse Deus uyusena ugustarisawa yanepia upe irumu kua Espiritu Santu uxariwaa yande arama.
6Nyãse umanu kua Kristu sangawa upe aintaresewara kuaita puxuwerawaita pitua ramere yande.
7Iwasu yepe umanu yepe purangawaa resewara, ape amu rame suuri yepe apigawa umanu arama yepe apigawa purangawaa resewara.
8Maa Deus uxari yakuawa ugustari yande umanu resewara kua Kristu yaneresewara puxuwerawaita pukusaware yande.
9Ape umukaturu yande suwi irumu yaeskapari arama Deus ipiaiwasawa sui.
10Nyãse suanyanaita ramere yande umukaturu yande irumu umanu resewara kua Taira, ape kuiri umukaturuwaita yande umukaturu yande upakawaa resewara.
11Maa tiaenyu, maa suuri yuiri yande Deus rese sesewara kua yaneruixawa Jesus Kristu kua umukaturuwaa yande kuiri.
Adão rese Kristu rese yuiri
12Ape kuaye pekadu uwike kua mundu kiti yepe apigawa irumu, asui pekadu resewara manusawa usika yawete yuiri kua manusawa uwari aintarese panye kuaita apigawaita nyãse aintaumunya aintapekadu panye ainta.
13Pekadu uiku kua mundu upe senundere Deus uxari kua inyenga kuximawara, maa tiumbeu aintapekadu rese mame tiyamaa kua Deus nyenga kuximawara.
14Maa manusawa uiku aintapiterupi Adão uyupiru rame ate Muize aramete uiku aintapiterupi yuiri kuaita umunyawaita aintapuxuwerasawa tiwa Adão puxuwerasawa yawe. Adão rangawa kua uriwaa sakuera.
15Maa kua prezenti sikuyaraimawaa timaa yawe ae kua puxuwerawa. Umanu rame siya yepe apigawa puxuwerasawa resewara, siya xinga uriku Deus purangasawa, asui siyawaa supe arama kua prezenti uxariwaa ipurangasawa resewara irumu kua yepe apigawa serawaa Jesus Kristu.
16Asui kua prezenti sikuyaraimawaa timaa ae yawe yepe apigawa puxuwerasawa umunyawaa yawe. Nyãse kua gustarisawa uri yepe pekadu rakuera uxari tiarama aintaueskapari ainta, maa kua prezenti sikuyaraimawaa uriwaa siyawaita aintapekadu rakuera uxari purangawaa yawe Deus umaa ainta.
17Manusawa uiku rame aintapiterupi yepe apigawa puxuwerasawa resewara, turusu kuri aintauiku upakawaa kiti irumu kua apigawa Jesus Kristu panye kua usuantiwaa kua purangawaa kua prezenti sikuyaraimawaa purangawaa.
18Ape kuaye yepe apigawa puxuwerasawa uxari tiarama aintaueskapari panye kuaita apigawaita, yawete yuiri yepe apigawa umunya purangawaa uxari aintaueskapari panye apigawa aintaupaka arama kuri.
19Yawete yuiri yepe apigawa tiresewara uruyari uxari aintaumunya aintapuxuwerasawa kuaita siyawaita, yawete yuiri purangawaa Deus umaa kuaita siyawaita uruyari resewara kua yepe apigawa.
20Asui uriana kua Deus nyenga kuximawara asui umuturusu aintapuxuwerasawa, ape rame turusu aintapuxuwerasawa, ape yuiri turusu piri isui kua Deus purangasawa.
21Ape yawe pekadu uxari umanu ainta, yawete yuiri ipurangasawa uxari puranga Deus umaa ainta aintauriku arama mundu nunkawaa upawa sesewara kua yaneruixawa Jesus Kristu.
Currently Selected:
Rumawaraita 5: BBp
Highlight
Share
Copy
Want to have your highlights saved across all your devices? Sign up or sign in
© 2021 Missão Novas Tribos do Brasil
Todos os direitos são reservados à:
Missão Novas Tribos do Brasil
Rua Itália, Qd. 57 L. 5-7 - Santa Isabel
75083-310 Anápolis, GO
