Atu 10
10
Kurneliu
1Ape Sezareya upe yepe apigawa serawaa Kurneliu, aintakapitão ae kuaita suraraita Italia suiwaraita.
2Umanduari Deus usikie isui yuiri panye aintairumu kuaita suka puraita, asui turusu uajudari yuiri pirasuawaita, yawewarawate upurandu Deus.
3Asui yepe ara karuka rame umaa yepe Deus anju uri ipiri umbeu ixupe:
4—Kurneliu! Asui umaa ixupe usikie, upurandu ae:
—Maataa reputari seirumu seruixawa? Asui anju umbeu ixupe:
—Deus umanduari kua repuranduwaa irumu panye yuiri kua rewajudariwaa pirasuawaita.
5Kuiri remundu apigawaita Jupi kiti remundu aintausenui inde arama kua Simão sera rakapira Pedru,
6Uiku Simão ruka upe kua upurakiwaa suu pirera, suka uiku parana turusuwaa rimbiwa kiti.
7Asui uyuiri rire isui kua anju upurungitawaa ixupe usenui ipiri mukuĩ upurakiwaita ixupe suka upe yepe surara yuiri umanduariwaa Deus uwajudariwaa ae.
8Asui umbeu rire ainta supe panye, umundu ainta Jupi kiti.
Pedru kerupi
9Asui wirande kiti aintausuwaa upe pee rupi kuayentu tetama sui Pedru usu uka ipewawaa iarupi upurandu arama Deus, yandara rame kurasi.
10Asui sasi ixupe yumãsi umbau putari asui aintaumunya pukusawa umbau arama ikerupi ae.
11Asui umaa uyupirari iwaka, asui uwiye yepe turusuwaa fazenda yawewaa aintaupisika kuatru upenasawa rese aintaumuye arama iwi kiti ae.
12Kua fazenda ipura panye suu, maiwa wirá yuiri.
13Asui usendu yepe nyenga umbeu ixupe:
—Pedru, repuamu reyuka rembau.
14Maa Pedru usuaxara:
—Umbaa seruixawa, nyãse umbaa kuerare hambau tenyuntuwara tiyuiri ikiawaita.
15Asui mukuĩsawa kua nyenga umbeu ixupe:
—Terembeu tenyuntuwara kua Deus uxariwaa ikiaimawaa.
16Yawe umunya musapiri viaji asui uyuiri iwaka kiti.
Kurneliu umundu ainta Pedru ipiri
17Asui tipukusawa Pedru ukuawa mayesawataa kua ikerupi umaawaa, kuaita apigawaita Kurneliu umunduwaita aintaupuamu ukara sui aintaupurandu rire mametaa Simão ruka.
18Asui aintausenui aintaupurandu sã aikue uka upe kua Simão sera rakapirawaa Pedru.
19Asui Pedru umanduari irumu sese kua ikerupiwaa, asui kua Espiritu umbeu ixupe:
—Aikue mukuĩ apigawaita aintausikari inde.
20Repuamu rewiye resu aintairumu, terexari mukuĩ remanduariwaa nyãse hamundu ainta.
21Asui Pedru uwiye usu aintapiri kuaita apigawaita, umbeu ainta supe:
—Ixete kua pesikariwaa, maa resewarataa peyuiri?
22Asui aintaumbeu ixupe:
—Kua kapitão serawaa Kurneliu apigawa purangawaa ae, umanduari Deus, puranga aintaumbeu sesewara panye kuaita judewita, yepe anju purangawaa umundu ae usenui arama inde suka kiti usendu arama nenyenga.
Pedru usu aintairumu
23Asui Pedru usenui ainta uka kiti uxari aintauiku irumu, asui wirande kiti usemu usu aintairumu, asui yepeyepe aintaimuita Kristu rese aintausu yuiri aintairumu.
24Asui wirande kiti aintausika Sezareya kiti. Ape Kurneliu usaru ainta uyumuatiri imuita ianamaita yuiri.
25Asui Pedru uwike irumu uka kiti Kurneliu usu suaxara uyurinipia ixupe ipi ruaki umee arama ixupe arama purangawaa.
26Maa Pedru usupiri ae umbeu ixupe:
—Repuamu nyãse apigawate ixe yuiri.
27Asui upurungita ramere uiku irumu ae uwike uka kiti, uwasemu aintauyumuatiri siya miraita uka upe.
28Asui umbeu ainta supe:
—Penyete pekuawa timaa judeu upuderi uyumuatiri aintairumu kuaita amu miraita tiyuiri upuderi umusuaki ainta, maa Deus umukame hamaa tiarama hamanduari tenyuntu amuita tiyuiri ikiawaita ainta.
29Asui aintausenui irumu ixe hayuiri, timukuĩ hamanduariwaa. Asui kuiri hapurandu penye marantaa pesenui ixe?
30Asui Kurneliu umbeu ixupe:
—Urikuana kuatru ara karuka rame kurasi kuiriwaa yawe, hapurandu Deus irumu seruka upe, asui hamaa yepe apigawa upuamu hamaa irupa umuturi puranga.
31Asui umbeu:
—Kurneliu Deus usendu kua repuranduwaa irumu, asui Deus umanduari nyã reajudariwaa pirasuawaita.
32Ape remundu yepe apigawa Jupi kiti usenui arama Simão sera rakapirawaa Pedru uikuwaa suka upe nyã upurakiwaa suu pirera serawaa Simão, uikuwaa parana turusuwaa rimbiwa kiti.
33Ape kutara hamundu aintausenui inde, asui remunya purangawaa ixe arama reyuiri resewara. Ape kuiri yayumuatiri Deus umaa ike yaputari yasendu neirumu panye umunduwaa rembeu kua yaneruixawa.
34Asui Pedru uyupiru umbeu:
—Kuiri hakuawa supiwate timaa Deus uparawaka umaa kuaita miraita.
35Maa mayewaa aintasuiwara kuaita miraita panye aintaumanduari Deus aintaumunya yuiri purangawaa Deus usuanti kuri ainta.
36Deus umundu inyenga aintapiri kuaita Israel rimiariruita uxari irumu aintaukuawa kua nyenga purangawaa uxariwaa timaarese ainta Jesus Kristu irumu. Aete aintaruixawa panye.
37Pekuawate kua nyenga aintaumbeuwaa panye Judeya kiti, aintauyupiru Galileya kiti sakakuera kua batizmu Juão umbuewaa rese.
38Pekuawate maye Deus uxari Espiritu Santu sese kua Jesus Nazare suiwara uxari ixupe ukuawasawa yuiri, asui uwata umunya puranga umukaturu panye kuaita Yurupari upukuariwaita, nyãse Deus irumu.
39Asui yandete yamaa panye umunyawaa aintaretama upe kuaita judewita Jeruzalẽ kiti yuiri. Asui aintauyuka ae aintauxari uyari kurusa rese.
40Maa Deus usupiri ae musapiri ara rire, asui uxari yamaa ae.
41Maa tiuxari muiri mira umaa ae, maa uxari yamaa ae yande uparawakawaita yambeu arama sesewara, yande yambauwaita irumu yauwaita yuiri irumu uyuiri rire upaka manusawa sui.
42Asui umundu yambue kuaita miraita yambeu arama ainta supe aete kua Deus uxariwaa umbeu arama aintapekadu kuaita upakawaita kuaita umanuwaita yuiri.
43Panye kuaita utitikawaita aintaumbeu sesewara awa uxari ipia sera rese uperduari kuri isui ipekadu.
Espiritu Santu uwiye aintarese
44Pedru upurungita ramere uiku kua nyenga Espiritu Santu uwari aintarese muiri kuaita usenduwaita kua nyenga.
45Asui kuaita uruyariwaita sirkunsizão uriwaita Pedru irumu aintaakayemu aintaumaa nyãse kua Espiritu Santu uwari aintarese kuaita tiwaita judeu yuiri.
46Nyãse aintausendu aintaupurungita apekatuwaraita nyenga rupi, aintaumee purangawaa Deus supe. Asui Pedru umbeu:
47—Maitaa yapuderi yasaisu aintasui ii yabatizari arama kuaita urikuwaita Espiritu Santu kuaye yaneyawe?
48Asui umundu aintaubatizari arama ainta Jesus Kristu rera rese. Asui aintaupurandu ae uiku aramare aintairumu yepeyepe ara.
Currently Selected:
Atu 10: BBp
Highlight
Share
Copy
Want to have your highlights saved across all your devices? Sign up or sign in
© 2021 Missão Novas Tribos do Brasil
Todos os direitos são reservados à:
Missão Novas Tribos do Brasil
Rua Itália, Qd. 57 L. 5-7 - Santa Isabel
75083-310 Anápolis, GO
